Mumbai,તા.૩૦
નીતેશ તિવારીની “રામાયણ”નું ટ્રેલર આખરે આવી ગયું છે, જેમાં ચાહકોને ભગવાન રામ તરીકે રણબીર કપૂર, સીતા તરીકે સાઈ પલ્લવી અને રાવણ તરીકે યશની ઝલક જોવા મળી રહી છે. ટ્રેલરના વિઝ્યુઅલ્સની પ્રશંસા થઈ રહી છે, પરંતુ લોકોએ એક મુખ્ય પાત્ર ગાયબ જોયું. ભગવાન હનુમાનનું પાત્ર ભજવનાર સની દેઓલ ટ્રેલરમાં બિલકુલ દેખાતો નથી, જેના કારણે ચાહકોને આશ્ચર્ય થયું કે નિર્માતાઓએ તેમને શા માટે શામેલ કર્યા નથી. તાજેતરમાં દિલ્હીમાં ફિલ્મના ટ્રેલર લોન્ચ ઇવેન્ટ દરમિયાન સનીએ તેના પાત્ર વિશે વાત કરી હતી.
નિર્માતાઓએ ૧૮ જુલાઈ, ૨૦૨૬ ના રોજ દિલ્હીના ભારત મંડપમ ખાતે સ્ટાર કાસ્ટની હાજરીમાં પસંદગીના લોકોના જૂથ માટે “રામાયણ” ટ્રેલર લોન્ચનું ખાસ સ્ક્રીનિંગ રાખ્યું હતું. આ કાર્યક્રમમાં બોલતા, ભગવાન હનુમાનનું પાત્ર ભજવનાર સની દેઓલે ખુલાસો કર્યો કે તેણે તાજેતરમાં જ ફિલ્મ પર કામ કરવાનું શરૂ કર્યું છે અને હજુ ઘણું કરવાનું બાકી છે. આ સૂચવે છે કે “રામાયણ”નો પહેલો ભાગ રામના વનવાસ સાથે સમાપ્ત થશે.
તેમણે કહ્યું, “મેં અત્યાર સુધી ફિલ્મ પર ખૂબ જ ઓછું કામ કર્યું છે. મારે હજુ લાંબી મજલ કાપવાની બાકી છે. હું હનુમાનનું પાત્ર ભજવવાની તક આપવા બદલ વાહેગુરુનો આભાર માનવા માંગુ છું. આ યાત્રાનો ભાગ બનવા બદલ હું ખરેખર ધન્ય અનુભવું છું. હનુમાનનું પાત્ર ભજવવું સરળ નથી, પરંતુ તે એક અદ્ભુત અનુભવ હશે કારણ કે તે નિર્દોષ, મજબૂત અને શક્તિશાળી છે. સૌથી અગત્યનું, આપણે બધાના આશીર્વાદની જરૂર છે કારણ કે આપણે આટલો મોટો પ્રોજેક્ટ હાથ ધર્યો છે.”
જ્યારથી સની દેઓલની ભૂમિકાની જાહેરાત થઈ છે, ત્યારથી ચાહકો ભારતીય પૌરાણિક કથાઓના સૌથી પ્રિય પાત્રોમાંના એક તરીકે તેમની શૈલીની ઝલકની આતુરતાથી રાહ જોઈ રહ્યા છે. “રામાયણ”ના ટ્રેલરમાં હનુમાન તરીકે સની દેઓલની ગેરહાજરીથી ઘણા ચાહકો નિરાશ થયા છે અને સોશિયલ મીડિયા પર પોતાની નારાજગી વ્યક્ત કરી રહ્યા છે.
એક ચાહકે લખ્યું, “કાસ્ટિંગ પરફેક્ટ છે. દ્રશ્યો મહાન છે, પણ હનુમાન ક્યાં છે?” બીજા એક ચાહકે પૂછ્યું, વીએફએકસ અદ્ભુત હતું… એવું લાગ્યું કે ડેવિડ વિરુદ્ધ ગોલિયાથ, પણ ટ્રેલર ઉતાવળમાં આવ્યું. ફક્ત ચાર મિનિટમાં ઘણું બધું થઈ રહ્યું હતું, છતાં હનુમાન દેખાયો નહીં.” બીજા એક યુઝરે ફિલ્મના ઘણા પાત્રોની પહેલી ઝલક શેર કરતાં લખ્યું, “તેઓએ હનુમાનને પણ બતાવવું જોઈતું હતું.” બીજા એક યુઝરે લખ્યું, “મને આશા છે કે આપણે આગામી ભાગમાં સની પાજીને હનુમાનની ભૂમિકા ભજવતા જોઈશું.”
નમિત મલ્હોત્રાના પ્રાઇમ ફોકસ સ્ટુડિયોએ ડ્ઢદ્ગઈય્ અને યશના મોન્સ્ટર માઇન્ડ ક્રિએશન્સ સાથે મળીને “રામાયણ” નું નિર્માણ કર્યું છે. ફિલ્મમાં રણબીર કપૂર, સાઈ પલ્લવી, યશ, સની દેઓલ, રવિ દુબે, લારા દત્તા, અરુણ ગોવિલ, રકુલ પ્રીત સિંહ અને વિવેક ઓબેરોય અભિનય કરે છે. ફિલ્મનું સંગીત હંસ ઝિમર અને એ.આર. રહેમાન દ્વારા રચિત છે.
