Mumbaiતા.૮
એનસીપીના અજિત પવાર જૂથમાં ચાલી રહેલ ઝઘડો શાંત થવાના કોઈ સંકેત દેખાતા નથી. ચૂંટણી રણનીતિકાર પ્રશાંત કિશોર (પીકે) અને નાયબ મુખ્યમંત્રી સુનેત્રા પવાર વચ્ચેની મુલાકાતથી એનસીપીની અંદર ઉથલપાથલ વધી ગઈ છે. સૂત્રોના જણાવ્યા અનુસાર, પીકેએ એનસીપીના પ્રદેશ પ્રમુખ સુનીલ તટકરેને બદલીને એક યુવાન નેતાને નિયુક્ત કરવાનું સૂચન કર્યું છે. પ્રશાંતની ટીમ ટૂંક સમયમાં એનસીપી અજિત જૂથ માટે મહારાષ્ટ્રમાં એક સર્વે કરશે, જેના પગલે પાર્ટીમાં મોટા સંગઠનાત્મક ફેરફારોની અપેક્ષા છે. આ મુદ્દા વિશે પૂછવામાં આવતા, પ્રદેશ પ્રમુખ સુનીલ તટકરેએ કહ્યું, “હું સિદ્ધાંતમાં નહીં, વ્યવહારિકતામાં માનું છું.” તેમણે એમ પણ કહ્યું કે તેઓ પ્રશાંત કિશોરને પાર્ટીના વ્યૂહાત્મક સલાહકાર હોવા અંગે અજાણ હતા.
જોકે, એનસીપીના નેતા અને કૃષિ મંત્રી દત્તાત્રેય ભરણેએ સ્વીકાર્યું કે પ્રશાંત કિશોરને એનસીપી નીતિ અને રણનીતિ ઘડવાની જવાબદારી સોંપવામાં આવી છે. પ્રશાંત સાથેની બેઠકમાં હાજર રહેલા રાજ્યસભાના સભ્ય પાર્થ પવારે એવા અહેવાલોને નકારી કાઢ્યા હતા કે તેમણે તટકરેને હટાવવાનું સૂચન કર્યું હતું. એવું કહેવામાં આવી રહ્યું છે કે બિહારમાં બાંકીપુર વિધાનસભા પેટાચૂંટણીમાં પ્રશાંતે ભાજપના ઉમેદવારને હરાવ્યા હોવાથી પ્રશાંત કિશોરની વ્યૂહાત્મક સલાહકાર તરીકે નિમણૂક અંગે ભાજપ પણ અસ્વસ્થ છે.
પ્રશાંત કિશોર સાથેની આ મુલાકાત મુંબઈમાં સુનેત્રા પવારના દેવગિરી બંગલા ખાતે થઈ હતી. પાર્થ પવાર અને પ્રશાંત કિશોર બંને આ બેઠક માટે ચાર્ટર્ડ પ્લેન દ્વારા મોડી રાત્રે દિલ્હીથી મુંબઈ ગયા હતા. ત્યારબાદ, પાર્થ પવાર, સુનેત્રા પવાર અને જય પવારે દેવગીરી બંગલામાં પ્રશાંત કિશોર સાથે છ કલાકની બેઠક કરી. બેઠકમાં પ્રશાંત કિશોરના બે સહયોગીઓ પણ હાજર હતા. તેમણે એનસીપીને સંગઠનાત્મક રીતે મજબૂત બનાવવા માટે કેટલાક સૂચનો પણ આપ્યા. સૂત્રોના જણાવ્યા અનુસાર, જય પવારે પીકેને રાજ્ય નેતૃત્વમાં ફેરફારનું કારણ પૂછ્યું. પ્રશાંતે જવાબ આપ્યો, “બે-ત્રણ બેઠકો થઈ ચૂકી છે. અમે તે સમયે કેટલીક સૂચનાઓ આપી હતી, પરંતુ તેનું પાલન કરવામાં આવ્યું ન હતું. જ્યાં સુધી અમે રાજ્ય નેતૃત્વ સાથે કામ નહીં કરીએ, ત્યાં સુધી અમારા માટે રાજ્યમાં કામ કરવું મુશ્કેલ બનશે. જો છેલ્લી ત્રણ બેઠકોમાં કહેવામાં આવેલી બાબતોનો અમલ નહીં થાય, તો કામ કરવું મુશ્કેલ બનશે. જો હું ભવિષ્યની ચૂંટણીઓ માટે કામ કરવાની અપેક્ષા રાખું છું, તો પ્રદેશ પ્રમુખ પદ અંગે નિર્ણય લેવો પડશે.”
શુક્રવારે, સુનિલ તટકરેએ કહ્યું કે સુનેત્રા અને પ્રશાંત વચ્ચેની મુલાકાત ભલે ઔપચારિક હોય, પણ મને ખબર નથી કે ત્યાં શું ચર્ચા થઈ. વધુમાં, અમે ક્ષેત્રમાં કામ કર્યું છે; અમે આઠ વખત આખા મહારાષ્ટ્રનો પ્રવાસ કર્યો છે. તેથી, અમને રણનીતિકારોની જરૂર નથી. તટકરેએ કહ્યું, “મેં શરદ પવાર, અજિત દાદા અને અન્ય નેતાઓ સાથે કામ કર્યું છે. મેં મારા જીવનમાં ક્યારેય ચૂંટણી સર્વે કર્યો નથી. મને કોઈ રણનીતિકારો કે સર્વેની જરૂર નથી. મેં આઠ વખત મહારાષ્ટ્રનો પ્રવાસ કર્યો છે અને રાજ્યના દરેક ખૂણાને જાણું છું. તેઓ રણનીતિકાર હોઈ શકે છે, પરંતુ મને ખબર નથી કે તેઓ અમારી પાર્ટી માટે કામ કરે છે કે નહીં. જો પ્રશાંત કિશોરની નિમણૂક થઈ હોત, તો મને તેના વિશે ખબર હોત.” તટકરેએ એમ પણ કહ્યું કે અમે ૨૦૨૩ થી એનડીએમાં છીએ. અજિત પવારના નિધન પછી, હું પાર્ટીના તમામ નિર્ણયોમાં સામેલ હતો.
