New Delhi, તા. 8
વર્ષ 2002 માં રમાયેલી નેટવેસ્ટ ટ્રોફી તો તમને યાદ જ હશે. ફાઇનલ મુકાબલો ભારત અને ઇંગ્લેન્ડ વચ્ચે લોર્ડ્સના મેદાન પર રમાયો હતો, જ્યાં ભારતીય ટીમ સામે પક્ષે મળેલાં 326 રનનાં વિશાળ લક્ષ્યનો પીછો કરીને બે વિકેટે જીત મેળવવામાં સફળ રહી હતી.
ફાઇનલ મેચમાં મળેલી આ જીત બાદ તે સમયનાં કેપ્ટન સૌરવ ગાંગુલીએ લોર્ડ્સની બાલ્કનીમાં પોતાની શર્ટ ઉતારીને જશ્ન મનાવ્યો હતો, જેની તસવીરો આજે પણ સોશિયલ મીડિયા પર વાયરલ થતી રહે છે.
નેટવેસ્ટ ટ્રોફી સિરીઝને લગભગ 24 વર્ષ વીતી ગયા છે, છતાંય ક્રિકેટ પ્રેમીઓના મનમાં આજે પણ તે ક્ષણ જીવંત છે. તે જ યાદગાર ક્ષણોમાંથી એક રસપ્રદ કિસ્સો તે સમયનાં પૂર્વ ક્રિકેટર હરભજન સિંહે લોકો સાથે શેર કર્યો છે. તેમણે જણાવ્યું કે તે સમયે તેઓ પણ શર્ટ ઉતારીને જશ્ન મનાવવા માંગતાં હતાં, પરંતુ રાહુલ દ્રવિડે ના પાડતાં તેમણે શર્ટ નહોતો ઉતાર્યો.
હરભજન સિંહે કહ્યું
`ચીકી સિંગલ્સ’ના તાજેતરનાં એક એપિસોડમાં હરભજન સિંહે કહ્યું “તેમણે (રાહુલ દ્રવિડે) મને રોકી લીધો હતો. રાહુલ દ્રવિડે મને મારી શર્ટ ઉતારવા ન દીધી. જો મેં પણ ત્યાં શર્ટ ઉતારી દીધી હોત તો ગાંગુલીની જેમ મારો ફોટો પણ વાયરલ થઈ ગયો હોત.
શર્ટ ઉતારવાનો વારો મારો જ હતો. હું પણ એ જ કરવાનો હતો જે આપણાં કેપ્ટને કર્યું હતું. સારું થયું કે રાહુલ દ્રવિડ ત્યાં હાજર હતા. જો યુવરાજ મારી બાજુમાં હોત તો તે પોતે જ મારી શર્ટ ઉતારી દેત. આ માટે હું દ્રવિડનો ખૂબ આભારી છું.”
