Mumbai,તા.15
હેરી બ્રુકના નેતૃત્વ હેઠળની ઇંગ્લેન્ડ ક્રિકેટ ટીમે દક્ષિણ આફ્રિકા સામેની બીજી T20Iમાં 300 રનનો આંકડો પાર કરીને ઇતિહાસ રચ્યો. આ પહેલી વાર હતું જ્યારે T20I માં કોઈ ફુલ મેમ્બર ટીમ સામે 300 રનનો સ્કોર બનાવાયો હોય.
અગાઉ ટીમ ઇન્ડિયા 2024માં બાંગ્લાદેશ સામે 297 રન બનાવીને આ સીમાચિહ્ન હાંસલ કરતા ચૂકી ગઈ હતી. તે જ સમયે આ T20 ક્રિકેટના ઇતિહાસમાં ત્રીજો સૌથી મોટો સ્કોર છે. પહેલા બેટિંગ કરતા ઇંગ્લેન્ડે ફિલ સોલ્ટની તોફાની સદીના આધારે 2 વિકેટ ગુમાવીને 304 રન બનાવ્યા હતા, જેના જવાબમાં દક્ષિણ આફ્રિકાની ટીમ 158 રનના સ્કોર પર જ આઉટ થઈ ગઈ હતી.
ટોસ હાર્યા બાદ પહેલા બેટિંગ કરવા ઉતરેલી ઈંગ્લેન્ડની શરૂઆત શાનદાર રહી. ફિલ સોલ્ટ અને જોસ બટલરની ઓપનિંગ જોડીએ પ્રથમ 10 ઓવરમાં 100 રનનો આંકડો પાર કર્યો. બટલર 30 બોલમાં 83 રનના વ્યક્તિગત સ્કોર પર આઉટ થયો. બટલરના આઉટ થવા છતાં સોલ્ટે રનની ગતિ ધીમી ન થવા દીધી અને એક છેડેથી ચોગ્ગા અને છગ્ગા વરસાવતો રહ્યો.
સોલ્ટે 60 બોલમાં 15 ચોગ્ગા અને 8 જબરદસ્ત છગ્ગાની મદદથી 141 રનની અણનમ ઇનિંગ રમી, જ્યારે જેકબ બેથેલે 26 અને કેપ્ટન હેરી બ્રુકે અણનમ 41 રન બનાવ્યા. 305 રનના વિશાળ સ્કોરનો પીછો કરવા ઉતરેલી દક્ષિણ આફ્રિકાની ટીમ સંપૂર્ણ 20 ઓવર પણ ટકી શકી નહીં. દક્ષિણ આફ્રિકા 16.1 ઓવરમાં 158 રનમાં ઓલઆઉટ થઈ ગઈ. ઇંગ્લેન્ડે 146 રનના માર્જિનથી મેચ જીતી લીધી જે ટી20 આંતરરાષ્ટ્રીયમાં ઇંગ્લેન્ડની સૌથી મોટી જીત અને દક્ષિણ આફ્રિકાની સૌથી મોટી હાર છે. ફિલ સોલ્ટને તેની શાનદાર ઇનિંગ બદલ પ્લેયર ઓફ ધ મેચનો એવોર્ડ એનાયત કરવામાં આવ્યો.
ફૂલ મેમ્બર ટીમ સામે T20I માં હાઈએસ્ટ સ્કોર
304/2 ઇંગ્લેન્ડ વિરુદ્ધ દક્ષિણ આફ્રિકા, માન્ચેસ્ટર 2025
297/6 ભારત વિરુદ્ધ બાંગ્લાદેશ, હૈદરાબાદ 2024
283/1 ભારત વિરુદ્ધ દક્ષિણ આફ્રિકા, જોહાનિસબર્ગ 2024
278/3 અફઘાનિસ્તાન વિરુદ્ધ આયર્લેન્ડ, દેહરાદૂન 2019
267/3 ઇંગ્લેન્ડ વિરુદ્ધ વેસ્ટ ઇન્ડીઝ, તારોઉબા 2023
T20I ક્રિકેટના ઇતિહાસમાં આ ફક્ત ત્રીજી વખત છે જ્યારે કોઈ ટીમ 300 રનનો આંકડો પાર કરવામાં સફળ રહી છે. ઈંગ્લેન્ડ પહેલા ઝિમ્બાબ્વે અને નેપાળે આ સિદ્ધિ હાંસલ કરી છે. જેમણે આ રેકોર્ડ કોઈ ફૂલ મેમ્બર ટીમ સામે નહોતો નોંધાવ્યો.
T20I મેચમાં અત્યાર સુધીનો સૌથી મોટો સ્કોર
344/4 ઝિમ્બાબ્વે વિરુદ્ધ ગામ્બિયા, નૈરોબી 2024
314/3 નેપાળ વિરુદ્ધ મંગોલિયા, હાંગઝોઉ 2023
304/2 ઈંગ્લેન્ડ વિરુદ્ધ દક્ષિણ આફ્રિકા, માન્ચેસ્ટર 2025
297/6 ભારત વિરુદ્ધ બાંગ્લાદેશ, હૈદરાબાદ 2024
286/5 ઝિમ્બાબ્વે વિરુદ્ધ સેશેલ્સ, નૈરોબી 2024
