Virpur,તા.૨૪
વિરપુરમાં ‘જય જલારામ માર્કેટીંગ’, ‘જલારામ બચત સહકારી મંડળી’ અને જે કે એમએમ ઓટો માર્કેટીંગના નામે સ્કીમો ચલાવી રોકાણકારોને પાકતી મુદતે રકમ પરત ન આપી હોવાનો આક્ષેપ; વિરપુર પોલીસે નાસ્તા ફરતા આરોપીને ઝડપી કાયદેસરની કાર્યવાહી હાથ ધરી.
યાત્રાધામ વિરપુર (જલારામ) પોલીસ સ્ટેશન વિસ્તારમાં અલગ-અલગ લોભામણી બચત તથા ઈનામી યોજનાઓ ચલાવી રોકાણકારો પાસેથી લાખો રૂપિયા એકત્ર કરી પાકતી મુદતે પરત નહીં આપવાના ગુનામાં નાસ્તા ફરતા આરોપીને વિરપુર પોલીસે અમદાવાદ ખાતેથી ઝડપી પાડ્યો છે. પોલીસના જણાવ્યા મુજબ આરોપીઓએ વિવિધ સ્કીમોના નામે રોકાણકારોને વધુ રકમ, વ્યાજ તેમજ મોટરસાઇકલ આપવાની લાલચ આપી અંદાજે રૂ.૯૯,૨૯,૫૫૦/-ની માતબર રકમ એકત્ર કરી હતી.
રાજકોટ રેન્જ પોલીસ મહાનિરીક્ષક નિર્લિપ્ત રાય, રાજકોટ ગ્રામ્ય પોલીસ અધિક્ષક વિજયસિંહ ગુર્જર તથા નાયબ પોલીસ અધિક્ષક આર.એ. ડોડીયાની સૂચના અને માર્ગદર્શન હેઠળ વિરપુર પોલીસ દ્વારા અલગ-અલગ લોભામણી સ્કીમો મારફતે લોકો પાસેથી નાણાં મેળવી પરત નહીં આપતા તત્વો સામે કાર્યવાહી હાથ ધરવામાં આવી હતી.
પ્રાપ્ત માહિતી મુજબ આરોપીઓએ ‘જય જલારામ માર્કેટીંગ’ના નામે ઈનામી યોજનાની સ્કીમ ચલાવી હતી. જેમાં રોકાણકારો પાસેથી દર મહિને રૂ.૧,૦૦૦ મુજબ ૪૦ મહિના સુધી કુલ રૂ.૪૦,૦૦૦ ભરાવવામાં આવતા અને પાકતી મુદતે રૂ.૫૦,૦૦૦ અથવા તેના બદલે મોટરસાઇકલ આપવાની લાલચ આપવામાં આવતી હતી. આ ઉપરાંત ‘જલારામ બચત સહકારી મંડળી લિમિટેડ’ના નામે દૈનિક બચત યોજનાઓ ચલાવી રોજના રૂ.૧૦૦, રૂ.૨૦૦ તથા રૂ.૫૦૦ જમા કરાવવાની અને તેના બદલામાં ૬ ટકા વ્યાજ આપવાની જાહેરાત કરવામાં આવી હોવાનો પણ ગુનામાં ઉલ્લેખ છે.તે જ રીતે જે કે એમ એમ ઓટો ’ના નામે પણ દર મહિને રૂ.૧,૦૦૦ ભરાવી ૪૦ મહિના બાદ રૂ.૫૦,૦૦૦ અથવા મોટરસાઇકલ આપવાની લોભામણી ડ્રો સ્કીમ ચલાવવામાં આવી હોવાનું પોલીસ ફરિયાદમાં જણાવાયું છે.
પોલીસના જણાવ્યા મુજબ વિવિધ બચત યોજનાઓ તથા ઈનામી ડ્રો સ્કીમોના નામે રોકાણકારોને વધુ વળતર અને મોટરસાઇકલની લાલચ આપી તેમની પાસેથી રકમ એકત્ર કરવામાં આવી હતી. ત્યારબાદ પાકતી મુદતે રોકાણકારોને રકમ પરત નહીં આપી નાણાંનો અંગત ઉપયોગ કરવામાં આવ્યો હોવાનો આરોપ છે. સમગ્ર મામલે વિરપુર પોલીસ સ્ટેશનમાં ગુનો નોંધાયો હતો.ગુનાની તપાસ દરમિયાન વિરપુર પોલીસ સ્ટેશનના પોલીસ ઇન્સ્પેક્ટર એસ.જી. રાઠોડ તથા તેમની ટીમ આરોપીઓને ઝડપી પાડવા માટે તપાસમાં હતી. દરમિયાન મળેલી હકીકતના આધારે પોલીસે કાર્યવાહી કરી રાજુભાઈ ભલુભાઈ ઉર્ફે લાલભાઈ મેવાડા, રહે. અમદાવાદને અમદાવાદ ખાતેથી ઝડપી પાડ્યો હતો.
