Tapi,તા.૯
ગુજરાતના વિવિધ વિસ્તારોમાંથી સમયાંતરે દીપડાના હુમલાના કિસ્સા સામે આવી રહ્યા છે. જિલ્લાના ડોલવણ તાલુકાના ઉમરકચ્છ ગામમાંથી પણ એક હચમચાવી નાંખતો કિસ્સો સામે આવ્યો છે. મરકચ્છ ગામમાં દીપડાના હુમલામાં ૫૮ વર્ષીય મહિલાનું મોત નીપજ્યું હોવાની ઘટના સામે આવી છે. દિવાળીની રાત્રિના આશરે ૩ વાગે દીપડો કાચા ઘરમાં ઘૂસી મહિલાને ખેંચી ગયો હોવાની પ્રાથમિક માહિતી છે. આજે સવારે મહિલાનો મૃતદેહ ઘરની બહારથી મળી આવ્યો હતો. ઘટનાને પગલે સમગ્ર પંથકમાં ચકચાર મચી ગઈ છે અને સ્થાનિકોમાં ભયનો માહોલ સર્જાયો છે.
મળતી માહિતી મુજબ, ઉમરકચ્છ ગામે કાચા ઘરમાં એકલી રહેતાં કીર્તિબેન દિનેશભાઈ ચૌધરી પર રાત્રિ દરમિયાન દીપડાએ હુમલો કર્યો હતો. આશરે ૩ વાગ્યે દીપડો ઘરમાં ઘૂસી તેમને બહાર ખેંચી ગયો હોવાની માહિતી સામે આવી છે. સવારે ઘરની બહારથી તેમનો મૃતદેહ મળી આવતાં ઘટનાની જાણ થઈ હતી. ઘટના બાદ ગામ અને આસપાસના વિસ્તારોમાં લોકોમાં ભય ફેલાયો છે. સ્થાનિકો દ્વારા દીપડાને વહેલી તકે પકડી પાડવાની માંગ કરવામાં આવી રહી છે. ઘટનાની ગંભીરતાને ધ્યાનમાં રાખીને વન વિભાગની ટીમ દીપડાને પકડવા માટે કામે લાગી છે.
મહિલાના મોત બાદ પંથકમાં દીપડાની અવરજવર અંગે ચિંતા વધી છે. સ્થાનિકો દ્વારા દીપડાને પકડી પાડવા અને લોકોની સુરક્ષા માટે તાત્કાલિક પગલાં લેવાની માંગ ઉઠી છે. વન વિભાગની ટીમ દ્વારા દીપડાને શોધી પકડવા માટે કાર્યવાહી હાથ ધરવામાં આવી રહી છે.
થોડા દિવસ પહેલા પણ વડોદરા જિલ્લાના વાઘોડિયા તાલુકામાં દીપડાએ બે પશુ પર હુમલો કર્યો હોવાનો બનાવ બનતાં પશુપાલકોમાં ભય ફેલાયો હતો. પ્રાપ્ત વિગતો મુજબ. વાઘોડિયાના ફ્લોડ ગામે અગાઉ પણ દીપડે ત્રાટક્યો હોવાથી લોકોએ દીપડાને પાંજરે પુરવા માગણી કરી હતી.આમ છતાં દીપડો વારંવાર ત્રાટકી રહ્યો છે. રાત્રે દીપડાએ બે ઢોર પર હુમલો કર્યો હતો.જે પૈકી એક ભેંસનું મોત થયું હતું.બનાવની જાણ થતાં ફોરેસ્ટ વિભાગ દ્વારા તપાસ કરવામાં આવી હતી. ગ્રામજનોએ ફોરેસ્ટ વિભાગના અધિકારીઓને દીપડાથી રક્ષણ મળે તેવા પગલાં લેવા અપીલ કરી હતી
