Ahmedabad,તા.૨૯
ગુજરાતમાં અછતગ્રસ્ત વિસ્તારોના ખેડૂતોને આપવામાં આવતી સહાયને લઈને રાજકીય ગરમાવો જોવા મળી રહ્યો છે. આમ આદમી પાર્ટીના પ્રદેશ પ્રમુખ Isudan Gadhviએ ખેડૂતોના પ્રશ્નોને લઈને રાજ્ય સરકાર પર આકરા પ્રહાર કર્યા છે. તેમણે આક્ષેપ કર્યો છે કે ગુજરાત સરકારે ૧૦૮ અછતગ્રસ્ત તાલુકાઓમાંથી માત્ર ચાર જિલ્લાઓમાં ખેડૂતોને મર્યાદિત સહાય આપીને ૫૪ લાખ ખેડૂતો અને માલધારીઓની મજાક કરી છે. તેમણે ખેડૂતોને પ્રતિ હેક્ટર ૫૦,૦૦૦ની સહાય આપવા અને ખેડૂતોનાં દેવા માફ કરવાની માગ કરી છે.
Isudan Gadhviએ પત્રકાર પરિષદમાં જણાવ્યું હતું કે રાજ્ય સરકારે અછતગ્રસ્ત ખેડૂતો માટે પ્રતિ હેક્ટર ૮,૫૦૦ની સહાય જાહેર કરી છે, જેમાં બે હેક્ટરની મર્યાદા હેઠળ વધુમાં વધુ ૧૭,૦૦૦ની સહાય મળી શકે છે. તેમના મતે, ખેતીમાં બિયારણ, ખાતર, ટ્રેક્ટર, નિંદામણ અને વીજળીના બિલ સહિતના ખર્ચને જોતાં આ રકમ પૂરતી નથી. તેમણે દાવો કર્યો હતો કે ખેડૂતોને વીઘા દીઠ ખેતી પાછળ અંદાજે ૨૦,૦૦૦થી ૨૧,૦૦૦ સુધીનો ખર્ચ થાય છે, જ્યારે સરકાર દ્વારા આપવામાં આવતી સહાયની રકમ તેની સરખામણીએ ઘણી ઓછી છે.
આપના પ્રદેશ પ્રમુખે પંજાબ સરકારની સહાયનો ઉલ્લેખ કરીને ગુજરાત સરકારની નીતિ સામે સવાલો ઉઠાવ્યા હતા. તેમણે દાવો કર્યો હતો કે પંજાબમાં ખેડૂતોને પ્રતિ હેક્ટર ૫૦,૦૦૦ની સહાય આપવામાં આવી હતી, જ્યારે ગુજરાતમાં ખેડૂતોને પૂરતી આર્થિક મદદ મળી રહી નથી. તેમણે મહારાષ્ટ્ર અને અન્ય રાજ્યોમાં ખેડૂતોનાં દેવા માફી તથા આર્થિક સહાયનાં પગલાંનો ઉલ્લેખ કરીને ગુજરાતમાં પણ ખેડૂતોને રાહત આપવાની માગ કરી હતી.
Isudan Gadhviએ એવો પણ આક્ષેપ કર્યો હતો કે ગત વર્ષે કમોસમી વરસાદને કારણે થયેલા નુકસાન માટે રાજ્ય સરકારે પ્રતિ હેક્ટર ૨૨,૦૦૦ના દરે સહાય જાહેર કરી હતી અને અંદાજે ૧૦,૦૦૦ કરોડનું પેકેજ આપ્યું હતું. તેમણે સવાલ ઉઠાવ્યો હતો કે જો અગાઉ ખેડૂતો માટે આટલી મોટી સહાય જાહેર થઈ શકે છે, તો અત્યારે અછતગ્રસ્ત ખેડૂતો માટે પૂરતું પેકેજ કેમ જાહેર કરવામાં આવતું નથી?
ઇસુદાન ગઢવીએ મગફળીની ટેકાના ભાવે ખરીદી અને અગાઉનાં સહાય પેકેજનાં નાણાંનો મુદ્દો પણ ઉઠાવ્યો હતો. તેમણે દાવો કર્યો હતો કે મગફળીની ટેકાના ભાવે ખરીદી સાથે સંકળાયેલા ૭,૦૦૦થી ૮,૦૦૦ કરોડ અને અગાઉના પેકેજનાં નાણાં ઉપલબ્ધ હોવા છતાં ખેડૂતોને પૂરતી સહાય આપવામાં આવતી નથી.
તેમણે દેવભૂમિ દ્વારકા, જામનગર, પોરબંદર અને કચ્છ સહિતના વિસ્તારોમાં ખેડૂતોની આર્થિક સ્થિતિ અત્યંત ખરાબ હોવાનો દાવો કર્યો હતો. તેમના જણાવ્યા અનુસાર, ઘણા ખેડૂતો પાસે રોજિંદા ખર્ચ માટે પણ પૂરતી રોકડ રકમ નથી. ખેતીની સાથે પશુપાલન કરતા માલધારીઓ અને ખેતમજૂરોની મુશ્કેલીઓ પણ વધી રહી છે.
આપના પ્રદેશ પ્રમુખે અછતગ્રસ્ત વિસ્તારોમાં સિંચાઈના પાણી, પીવાના પાણી અને ઘાસચારાની વ્યવસ્થાને લઈને પણ સરકારની ટીકા કરી હતી. તેમણે આક્ષેપ કર્યો હતો કે ખેડૂતોને ખેતી માટે પૂરતું પાણી મળતું નથી, જ્યારે ઉદ્યોગોને પાણી આપવામાં આવે છે. માલધારીઓ અને પશુપાલકો માટે ઘાસચારાની યોગ્ય વ્યવસ્થા ન હોવાનો પણ તેમણે દાવો કર્યો હતો.
ગઢવીએ ગુજરાતમાં જળસંચય અને સિંચાઈના આયોજન અંગે સવાલ ઉઠાવતાં ’સૌની યોજના’ને લઈને પણ સરકાર પર પ્રહાર કર્યા હતા. તેમણે જણાવ્યું હતું કે રાજ્યમાં લાંબા સમયથી સત્તામાં હોવા છતાં ખેડૂતોને પાણીની સમસ્યામાંથી કાયમી રાહત મળી નથી.
