દુષ્કાળ જેવી પરિસ્થિતિમાં ખેડૂતોની આંખોમાં આંસુ, બળદોની આંખોમાં વેદના
જીવદયાની અવિરત સેવા,ભવિષ્યમાં ૧ લાખ બળદોને આશ્રય આપવાનું કાર્ય શરુ
Rajkot તા.૨૯ઃ
સૌરાષ્ટ્રના અનેક વિસ્તારોમાં ઓછા વરસાદ અને દુષ્કાળ જેવી પરિસ્થિતિને કારણે ખેડૂતો માટે પોતાના પશુઓની સંભાળ રાખવી મુશ્કેલ બની રહી છે. ખાસ કરીને પોરબંદર, દેવભૂમિ દ્વારકા, જામનગર અને કચ્છ જિલ્લાના ખેડૂતો પાણી અને ઘાસચારાની અછતને કારણે પોતાના વહાલસોયા બળદોને સાચવવામાં મુશ્કેલી અનુભવી રહ્યા છે. આવી પરિસ્થિતિમાં રાજકોટના કાલાવડ રોડ પર દેવગામ નજીક આવેલા સદભાવના બળદ આશ્રમ ખાતે છેલ્લા ૨૦ દિવસમાં જ આશરે ૬,૦૦૦ બળદોનો ઉમેરો થયો છે.
આવી સંવેદનશીલ પરિસ્થિતિમાં રાજકોટના કાલાવડ રોડ પર દેવગામ નજીક આવેલું સદભાવના બળદ આશ્રમ હજારો બળદોની સેવા અને સંભાળ માટે સતત પ્રયત્નશીલ છે. સંસ્થાના જણાવ્યા અનુસાર આશ્રમમાં હાલમાં આશરે ૮,૦૦૦ થી વધુ બળદોને આશ્રય આપવામાં આવી રહ્યો છે. આટલી મોટી સંખ્યામાં અબોલ જીવોને ભોજન, પાણી, સંભાળ અને જરૂરિયાત મુજબ સારવાર પૂરી પાડવી એ સતત આયોજન, માનવબળ, સાધનસામગ્રી અને આર્થિક સંસાધનો માગતું વિશાળ સેવાકાર્ય છે. આશ્રમનો મુખ્ય સંકલ્પ એ છે કે કોઈ બળદ ભૂખ્યો ન રહે, તરસ્યો ન રહે અને પરિસ્થિતિના કારણે રસ્તા પર રખડવા મજબૂર ન બને.
સૌરાષ્ટ્રના કેટલાક વિસ્તારોમાં વરસાદની અનિયમિતતા અને ઓછા વરસાદને કારણે ખેડૂતોની ચિંતા વધી છે. પોરબંદર, દેવભૂમિ દ્વારકા, જામનગર અને કચ્છ સહિતના વિસ્તારોમાં પાણી અને ઘાસચારાની અછતનો સામનો કરતા કેટલાક ખેડૂતો પોતાના બળદોનો નિભાવ કરી શકતા નથી. ખેતીમાં વર્ષો સુધી સાથ આપનાર બળદોને પોતાની પાસેથી દૂર કરવાનો નિર્ણય તેમના માટે અત્યંત પીડાદાયક બની રહે છે.
સદભાવના બળદ આશ્રમના સેવાકાર્યમાં આ પરિસ્થિતિને ધ્યાનમાં રાખીને બળદોને આશ્રય આપવાની પહેલ કરવામાં આવી છે. આશ્રમના જણાવ્યા મુજબ, અગાઉ આશ્રમમાં આશરે ૧,૫૦૦થી ૨,૦૦૦ બળદોની સંખ્યા જળવાતી હતી. ત્યારબાદ ટૂંકા ગાળામાં મોટી સંખ્યામાં બળદો આવવા લાગ્યા અને છેલ્લા ૨૦ દિવસમાં જ આશરે ૬,૦૦૦ બળદોનો ઉમેરો થયો. પરિણામે આશ્રમમાં આશ્રિત બળદોની સંખ્યા ૮,૦૦૦થી વધુ થઈ છે.
આ બળદોમાં માત્ર વૃદ્ધ કે બીમાર બળદો જ નહીં, પરંતુ ખેતીમાં કામ કરી શકે તેવા સશક્ત બળદોનો પણ સમાવેશ થાય છે. પાણી અને ઘાસચારાની અછતને કારણે કેટલાક ખેડૂતો માટે તેમને પોતાની પાસે રાખવા મુશ્કેલ બન્યું છે. આવા સંજોગોમાં બળદોને સુરક્ષિત આશ્રય મળે અને તેમનો નિભાવ થઈ શકે તે માટે આશ્રમ દ્વારા વ્યવસ્થા કરવામાં આવી રહી છે.
આશ્રમ સાથે જોડાયેલા સેવાકર્મીઓના જણાવ્યા અનુસાર, કેટલાક ખેડૂતો બળદોને મૂક્યા પછી પણ તેમની યાદમાં વ્યથિત રહે છે. કેટલાક કિસ્સાઓમાં ખેડૂતો પોતાના બળદને ફરીથી ઘરે લઈ જવા માટે પણ આવ્યા છે. તેઓ જણાવે છે કે બળદ વિના ઘર કે વાડી સૂની લાગે છે અને પરિવારના સભ્યો પણ તેની ગેરહાજરી અનુભવતા હોય છે.
સદભાવના બળદ આશ્રમમાં હજારો બળદોની સેવા માટે દરરોજ મોટું આર્થિક આયોજન કરવું પડે છે. સંસ્થાના જણાવ્યા અનુસાર, ઘાસચારો, નિભાવ, સારવાર, દવાઓ અને અન્ય જરૂરી વ્યવસ્થાઓ સહિત આશરે ૧૨ લાખનો દૈનિક ખર્ચ થાય છે. આ ખર્ચ બળદોની સંખ્યા અને તેમની જરૂરિયાતોને અનુરૂપ સતત થતો રહે છે.સદભાવના બળદ આશ્રમનું સેવાકાર્ય માત્ર એક સંસ્થાની કામગીરી નથી; તે સમાજની સંવેદનશીલતા અને સહિયારી જવાબદારી સાથે જોડાયેલું છે. ખેડૂતો, પશુપાલકો, દાતાઓ, જીવદયાપ્રેમીઓ અને સામાન્ય નાગરિકો પોતાના યોગદાનથી આ કાર્યમાં ભાગીદાર બની શકે છે.
સદભાવના બળદ આશ્રમ, રાજકોટસ્થળ કાલાવડ રોડ, ખીરસરા અને દેવગામની ધાર, ગુફેશ્વર મહાદેવ મંદિર નજીક, ભૂમિ એગ્રોની પાછળ, રાજકોટ.
