Rajkot,તા.૧૩
ગોંડલ તાલુકાના ત્રાકુડા ગામમાં એક ચોંકાવનારી હત્યાની ઘટના સામે આવી છે. વાડીમાં કામ બાબતે થયેલી સામાન્ય બોલાચાલી અને ઠપકાનો બદલો લેવા એક ભાગીયાએ વાડી માલિક મહિલાની ઘાતકી હત્યા કરી નાખી છે. આરોપીએ ખેતીના ઓજાર પાવડાથી મહિલાના માથા અને શરીરના ભાગે ઉપરાઉપરી ઘા ઝીંકી મોતને ઘાટ ઉતારી દીધી છે. હત્યા કર્યા બાદ આરોપી ફરાર થઈ ગયો હતો, પરંતુ ગોંડલ તાલુકા પોલીસે ગણતરીના કલાકોમાં જ તેને ઝડપી પાડી હત્યાનો ભેદ ઉકેલી નાખ્યો છે
મળતી માહિતી મુજબ, જીતેન્દ્રભાઈ પોતાની પત્ની જોશનાબેન ઉર્ફે જ્યોત્સનાબેન સાથે વાડીમાં રહેતા હતા. વાડીમાં ખેતીકામ માટે મધ્યપ્રદેશના જાંબુઆ જિલ્લાના ચૌરા ગામના ૨૯ વર્ષીય રાજુભાઈ રમેશભાઈ ડોડીયારને ભાગીયા તરીકે રાખવામાં આવ્યો હતો. જોકે, વાડીના કામકાજ બાબતે રાજુભાઈ અને વાડી માલિક દંપતી વચ્ચે અવારનવાર બોલાચાલી થતી હતી. કામમાં બેદરકારી બદલ મળતા ઠપકાને લઈને આરોપીના મનમાં મનદુઃખ હતું.
બનાવના દિવસે પણ વાડીના કામ બાબતે જીતેન્દ્રભાઈ અને જોશનાબેને રાજુભાઈને ઠપકો આપ્યો હતો. આથી ઉશ્કેરાયેલા રાજુભાઈએ પોતાનો ગુસ્સો ગુમાવ્યો અને વાડીમાં પડેલું પાવડું હાથમાં લઈ લીધું. ત્યારબાદ જોશનાબેન પર પાવડાથી માથાના ભાગે અને શરીર પર ઉપરાઉપરી ઘા ઝીંકી દીધા હતા. આ દરમિયાન જીતેન્દ્રભાઈએ વચ્ચે પડી બચાવ કરવાનો પ્રયાસ કર્યો હતો, પરંતુ આરોપી સાથે ઝપાઝપી થઈ હતી. હુમલામાં ગંભીર ઈજાઓ પહોંચતા જોશનાબેનનું ઘટનાસ્થળે જ કરુણ મોત નીપજ્યું હતું. હત્યા કર્યા બાદ આરોપી રાજુભાઈ ઘટનાસ્થળેથી ફરાર થઈ ગયો હતો. એક સામાન્ય બોલાચાલીએ અંતે એક મહિલાનો જીવ લીધો અને પરિવારને કાયમ માટે શોકમાં ગરકાવ કરી દીધો હતો.
ઘટનાની જાણ થતાં જ ગોંડલ તાલુકા પોલીસનો કાફલો ઘટનાસ્થળે દોડી ગયો હતો અને તપાસનો ધમધમાટ શરૂ કર્યો હતો. આ મામલે ગોંડલ તાલુકા પોલીસ સ્ટેશનમાં ભારતીય ન્યાય સંહિતા-૨૦૨૩ની કલમ ૧૦૩(૧), ૧૧૫(૨), ૩૫૧(૩) તેમજ જી.પી. એક્ટની કલમ ૧૩૫ મુજબ ગુનો નોંધવામાં આવ્યો હતો. હત્યાની ગંભીરતાને ધ્યાને રાખીને રાજકોટ રેન્જના ડીઆઇજી નિર્લિપ્ત રાય અને રાજકોટ ગ્રામ્ય પોલીસ અધિક્ષક વિજયસિંહ ગુર્જરની સૂચના તેમજ ડીવાયએસપી કે.જી. ઝાલાના માર્ગદર્શન હેઠળ અલગ અલગ પોલીસ ટીમો બનાવવામાં આવી હતી. પોલીસે ટેકનિકલ સોર્સ અને હ્યુમન ઇન્ટેલિજન્સની મદદથી ફરાર આરોપીની શોધખોળ શરૂ કરી હતી. આખરે ગણતરીના કલાકોમાં જ પોલીસે મધ્યપ્રદેશના રાજુભાઈ રમેશભાઈ ડોડીયારને ઝડપી પાડ્યો હતો. સાથે જ હત્યામાં ઉપયોગમાં લેવાયેલું પાવડું પણ કબજે કરવામાં આવ્યું છે.
એક નાનકડા ઠપકાનો બદલો લેવા આરોપીએ એવું ઘાતક પગલું ભર્યું કે એક મહિલાએ પોતાનો જીવ ગુમાવ્યો અને હવે આરોપીને જેલના સળિયા પાછળ જવાનો વારો આવ્યો છે.આ ઘટના સમાજ માટે પણ ચેતવણી સમાન છે કે ગુસ્સા પરનો કાબૂ ગુમાવવાથી તેના પરિણામો કેટલા ભયાનક આવી શકે છે.બીજી તરફ, હત્યા બાદ ફરાર થયેલા આરોપીને ગણતરીના કલાકોમાં ઝડપી પાડતી ગોંડલ તાલુકા પોલીસની કામગીરી પણ નોંધપાત્ર રહી છે.
