Ahmedabad,તા.૧૩
Gujarat STએ ડિજિટલ ટિકિટ બુકિંગ ક્ષેત્રે નવો વિક્રમ સ્થાપ્યો છે. ભાઈબીજના દિવસે એટલે કે ૧૧ નવેમ્બર, ૨૦૨૬ના રોજ રાજ્યમાં એક જ દિવસમાં એસટી બસની ૧,૪૬,૮૭૫ સીટનું બુકિંગ નોંધાયું હતું. નિગમના ઇતિહાસમાં એક દિવસમાં થયેલું આ અત્યાર સુધીનું સૌથી વધુ બુકિંગ છે. ખાસ વાત એ છે કે કુલ બુકિંગમાંથી ૯૯,૪૦૨ સીટનું બુકિંગ માત્ર મોબાઇલ એપ્લિકેશન દ્વારા થયું હતું. આ આંકડા દર્શાવે છે કે મુસાફરોમાં ઓનલાઈન ટિકિટ બુકિંગનો ઉપયોગ સતત વધી રહ્યો છે.
જીએસઆરટીસીના જણાવ્યા અનુસાર, ભાઈબીજના દિવસે ડિજિટલ ટિકિટ બુકિંગ દ્વારા કુલ રૂ.૩.૫૫ કરોડની આવક થઈ હતી. તેમાંથી મોબાઇલ એપ્લિકેશનના માધ્યમથી જ રૂ.૨.૨૭ કરોડની આવક નોંધાઈ હતી. જ્યારે ૧૧ નવેમ્બરના રોજ નિગમની તમામ સેવાઓની કુલ આવક રૂ.૧૩ કરોડથી વધુ રહી હતી.
નિગમના જણાવ્યા મુજબ, ડિજિટલ બુકિંગ અને આવકની દૃષ્ટિએ દેશનાં રાજ્ય પરિવહન નિગમોમાં ગુજરાત પ્રથમ સ્થાને રહ્યું છે. જીએસઆરટીસીએ સતત સાતમા વર્ષે આ સ્થાન જાળવી રાખ્યું હોવાનું જણાવાયું છે.
જીએસઆરટીસીના ડિજિટલ બુકિંગના આંકડા પર નજર કરીએ તો વર્ષ ૨૦૧૯માં એક દિવસમાં ૭૪,૩૬૮ સીટનું બુકિંગ થયું હતું, જેના થકી રૂ.૧.૫૩ કરોડની આવક થઈ હતી. ત્યારબાદ વર્ષો દરમિયાન ડિજિટલ બુકિંગમાં સતત વધારો નોંધાયો છે. હવે ભાઈબીજના દિવસે આ આંકડો વધીને ૧,૪૬,૮૭૫ સીટ સુધી પહોંચ્યો છે.
આ સિદ્ધિ બદલ નાયબ મુખ્યમંત્રી હર્ષ સંઘવીએ જીએસઆરટીસીના ડ્રાઇવર, કંડક્ટર, મિકેનિક સહિત સમગ્ર સ્ટાફને અભિનંદન પાઠવ્યા હતા. તેમણે જણાવ્યું હતું કે તહેવારના દિવસોમાં કર્મચારીઓએ પોતાના પરિવાર સાથે સમય વિતાવવાને બદલે મુસાફરોને સુરક્ષિત અને સમયસર તેમના ગંતવ્ય સ્થાને પહોંચાડવા માટે ફરજ બજાવી હતી. કર્મચારીઓની મહેનત અને નિષ્ઠાને કારણે જ નિગમ આ સિદ્ધિ હાંસલ કરી શક્યું છે.
મુસાફરોને સરળ, પારદર્શક અને આધુનિક પરિવહન સુવિધા આપવા માટે જીએસઆરટીસી દ્વારા ડિજિટલ ટિકિટિંગને પ્રોત્સાહન આપવામાં આવી રહ્યું છે. ભાઈબીજના દિવસે થયેલું રેકોર્ડ બુકિંગ દર્શાવે છે કે હવે મોટી સંખ્યામાં મુસાફરો ટિકિટ કાઉન્ટર પર જવાને બદલે મોબાઇલ એપ અને ઓનલાઈન માધ્યમો દ્વારા ટિકિટ બુક કરવાનું પસંદ કરી રહ્યા છે.
