માઇક્રોસોફ્ટે એક એવું AI ટૂલ તૈયાર કર્યું છે, જે ડોક્ટરની જેમ દર્દીને સવાલો પૂછીને, લેબોરેટરી તપાસના રિપોર્ટ સમજીને અને એક-એક ડગલું આગળ વધીને બીમારીનું સચોટ નિદાન કરી શકે છે. કંપનીએ દાવો કર્યો છે કે જટિલ રોગોના કિસ્સામાં આ ટૂલે સામાન્ય ડોક્ટરો કરતાં પણ વધુ સારું પ્રદર્શન કર્યું છે. હવે હોસ્પિટલોમાં તેનું વ્યવહા પરીક્ષણ કરવામાં આવશે.
`સાયન્સ’ જર્નલમાં પ્રકાશિત સંશોધન અનુસાર, આ AI મોડેલ નક્કી કરે છે કે દર્દીને કયા સવાલો પૂછવા જોઈએ અને કઈ તપાસ કરાવવી જોઈએ. આમાં એક ખાસ ટેકનોલોજીનો ઉપયોગ કરવામાં આવ્યો છે, જેને `ઓર્કેસ્ટ્રેટર’ કહેવામાં આવે છે.
આ ટેકનોલોજી નક્કી કરે છે કે AI કોઈ મેડિકલ સમસ્યાને કેવી રીતે ઉકેલશે. આ માટે તે વિવિધ મેડિકલ સ્પેશિયાલિસ્ટ તરીકે કામ કરતા AI ટેકનોલોજીનું એક જૂથ તૈયાર કરે છે, જે મળીને રોગનું નિદાન કરવાનો પ્રયાસ કરે છે.
સંશોધકોએ આ ટૂલને 300થી વધુ મેડિકલ કેસોમાં બીમારીનું નિદાન કરવાનું કામ સોંપ્યું હતું. આ પરીક્ષણમાં AI મોડેલે સાચું નિદાન કરવામાં સામાન્ય ડોક્ટરોની સરખામણીએ બમણા કરતાં પણ વધુ ચોકસાઈ દર્શાવી હતી.
AI દ્વારા શોધાયેલી ખામીઓ મુશ્કેલી વધારી શકે છે : નિષ્ણાતો
AI ની ટેકનિકલ પ્રગતિના કારણે સોફ્ટવેરમાં રહેલી નવી સાયબર ખામીઓની ઝડપથી ખબર પડી રહી છે, જેનાથી ભવિષ્યમાં વૈશ્વિક સ્તરે ઇન્ટરનેટ અને સરકારી વેબસાઇટ્સના કામકાજમાં ભારે મુશ્કેલી ઊભી થઈ શકે છે. સાયબર નિષ્ણાતોએ આ અંગે ચેતવણી આપી છે.
મેસાચુસેટ્સ સ્થિત થે્રટ ઇન્ટેલિજન્સ ફર્મ `વલ્નચેક’ ના રિસર્ચ અનુસાર, AI ની મદદથી સામે આવતી ડિજિટલ ખામીઓ/મર્યાદાઓની સંખ્યા બમણી થઈ ગઈ છે.
અન્ય AI મોડેલ્સથી તદ્દન અલગ
હાલના મેડિકલ AI મોડેલ્સ સામાન્ય રીતે એક જ વારમાં દર્દીના તમામ લક્ષણો, લેબ ટેસ્ટ રિપોર્ટ અને તપાસનું વિશ્લેષણ કરીને બીમારીનું નામ જણાવી દે છે. તેનાથી વિપરીત, આ નવું AI ટૂલ બીમારીનું નિદાન કરવા માટે તબક્કાવાર આગળ વધે છે.
સૌથી પહેલાં, AI એ નક્કી કરે છે કે દર્દીની અગાઉની બીમારીઓ, મેડિકલ હિસ્ટ્રી અને સ્વાસ્થ્ય સંબંધિત માહિતી અંગે કયા પ્રશ્નો પૂછવા જોઈએ. ત્યારબાદ તે એ સમજવાનો પ્રયાસ કરે છે કે દર્દીની શારીરિક તપાસમાં કઈ બાબતો મહત્વપૂર્ણ છે.
દર્દી પાસેથી મળેલી માહિતીના આધારે AI નક્કી કરે છે કે કયા ટેસ્ટ કરાવવાની જરૂર છે. પછી તે તપાસના પરિણામો પર વિચાર કરે છે અને જરૂર જણાતાં આગળની તપાસ કરાવવાનો નિર્ણય પણ લે છે.

