New Delhi,તા.01
ઇન્ટરનેશનલ ક્રિકેટ કાઉન્સિલ (ICC) અને ઇન્ટરનેશનલ ઓલિમ્પિક કમિટી (IOC) દ્વારા વર્ષ 2028માં લોસ એન્જલસ (LA) ખાતે રમાનારા ઓલિમ્પિક્સમાં ક્રિકેટની રમત માટે ક્વોલિફિકેશન સિસ્ટમની સત્તાવાર જાહેરાત કરી દેવામાં આવી છે.
ઓલિમ્પિકના પુરુષ અને મહિલા બંને વર્ગના ટી20 (T20) ઇવેન્ટ્સમાં કુલ છ-છ ટીમો ભાગ લેશે. હાલ પુરુષ વર્ગમાં હજુ સુધી કોઈ ટીમ ક્વોલિફાય થઈ શકી નથી, પરંતુ મહિલા વર્ગમાં ભારત સહિત ચાર ટીમોએ પોતાનું સ્થાન પાકું કરી લીધું છે.
લોર્ડ્સના મેદાન પર ઓસ્ટ્રેલિયા સામે કારમી હારનો સામનો કર્યા બાદ આંચકો અનુભવી રહેલી ભારતીય મહિલા ક્રિકેટ ટીમ માટે આ સમાચાર ખૂબ જ રાહત સમાન છે. વર્લ્ડ કપની રેસમાંથી બહાર થયા બાદ, હવે હરમનપ્રીત કૌરની આગેવાની હેઠળની ભારતીય સેના સામે ઓલિમ્પિક જેવું મોટું સ્ટેજ છે, જ્યાં તેઓ શાનદાર પ્રદર્શન કરીને પોતાની આ હારના ઘા પર મલમ લગાવી શકે છે.
મહિલા ટી20 વર્લ્ડ કપ 2026ના રેન્કિંગના આધારે ICC અને IOC દ્વારા ઓસ્ટ્રેલિયા, ગે્રટ બ્રિટન (ઇંગ્લેન્ડ), ભારત અને દક્ષિણ આફ્રિકાને LA28 ઓલિમ્પિક્સ માટે ક્વોલિફાય જાહેર કરવામાં આવ્યા છે.
નિયમ મુજબ આફ્રિકા, એશિયા, યુરોપ અને ઓશેનિયા ખંડને એક-એક સ્થાનની ગેરંટી આપવામાં આવી હતી, જેના આધારે આ મહાદ્વીપોમાંથી સર્વોચ્ચ સ્થાન મેળવનારી લાયક ટીમોએ સીધું ક્વોલિફિકેશન મેળવી લીધું છે.
ટૂર્નામેન્ટમાં પાંચમું સ્થાન યજમાન દેશ અમેરિકા (USA)ને ફાળવવામાં આવ્યું છે, પરંતુ તેની સામે એક કડક શરત રાખવામાં આવી છે. જો 30 જૂન 2026 થી 31 ડિસેમ્બર 2026 વચ્ચેના સમયગાળા દરમિયાન અમેરિકા આઈસીસી (ICC) ટી20 રેન્કિંગમાં ટોપ-15 (ટોચની 15 ટીમો)માં સ્થાન જાળવી નહીં રાખે, તો 1 માર્ચ 2027ના રોજ આ સ્થાન આઈસીસી રેન્કિંગમાં ત્યારપછીની સર્વોચ્ચ નોન-ક્વોલિફાઇડ ટીમને આપી દેવામાં આવશે.
જ્યારે છઠ્ઠી અને અંતિમ ટીમનો નિર્ણય વર્ષ 2027માં યોજાનારી પ્રથમ ‘ICC ઓલિમ્પિક ક્વોલિફાયર’ ટૂર્નામેન્ટ દ્વારા કરવામાં આવશે, જેમાં વિશ્વભરની 8 ટીમો ભાગ લેશે.
