New Delhi,તા.04
ભારતીય ઓટોમોબાઈલ ક્ષેત્રે આજે એક નવો ઈતિહાસ રચાયો છે. દેશની સૌથી મોટી કાર નિર્માતા કંપની મારુતિ સુઝુકીએ પોતાની લોકપ્રિય કાર વેગનઆરનું ‘ફ્લેક્સ-ફ્યુઅલ’ વર્ઝન બજારમાં રજૂ કર્યું છે.
આ કારની સૌથી મોટી ખાસિયત એ છે કે, તે ભારતની સૌપ્રથમ ‘E100’ પેસેન્જર કાર છે, જેનો અર્થ એ થાય છે કે આ કાર સંપૂર્ણપણે 100 ટકા ઇથેનોલ પર ચાલી શકશે. દેશમાં સ્વચ્છ ગતિશીલતા અને વૈકલ્પિક ઇંધણના વપરાશને પ્રોત્સાહન આપવા માટે આ એક ખૂબ જ મહત્વપૂર્ણ પગલું માનવામાં આવી રહ્યું છે.
કેન્દ્રીય મંત્રીઓના હસ્તે લોન્ચિંગ
આ ઐતિહાસિક મોડલ પરથી પડદો હટાવવા માટે ખાસ કાર્યક્રમ યોજાયો હતો. મારુતિ સુઝુકી વેગનઆર ફ્લેક્સ-ફ્યુઅલ વર્ઝનનું લોન્ચિંગ કેન્દ્રીય માર્ગ પરિવહન અને રાજમાર્ગ મંત્રી નીતિન ગડકરી તેમજ કેન્દ્રીય પેટ્રોલિયમ અને કુદરતી ગેસ મંત્રી હરદીપ સિંહ પુરીના વરદ હસ્તે કરવામાં આવ્યું હતું. આ પ્રસંગે મંત્રીઓએ કંપનીનાં આ પ્રયાસને બિરદાવ્યો હતો અને દેશનાં ઉજ્જવળ ભવિષ્ય માટે તેને આવશ્યક ગણાવ્યો હતો.
વિદેશી તેલ પરની નિર્ભરતા ઘટશે
હાલમાં વૈશ્વિક સ્તરે જે પ્રકારની ભૌગોલિક-રાજકીય પરિસ્થિતિઓ સર્જાઈ રહી છે, તેનાં કારણે આંતરરાષ્ટ્રીય બજારમાં ક્રૂડ ઓઇલના ભાવમાં ભારે અનિશ્ચિતતા જોવા મળે છે. ભારત પોતાની જરૂરિયાતનું મોટાભાગનું ક્રૂડ ઓઇલ બહારથી આયાત કરે છે.
આવી સ્થિતિમાં, ઇથેનોલ જેવા સ્વદેશી વૈકલ્પિક બળતણનો ઉપયોગ વધારવાથી મોંઘા ક્રૂડ ઓઇલની આયાત પરની નિર્ભરતામાં મોટો ઘટાડો થશે અને દેશનાં અર્થતંત્રને મજબૂતી મળશે.
સરકારની ઇથેનોલ નીતિને વેગ મળશે
આ કારનું લોન્ચિંગ ભારત સરકારની ઇથેનોલ બ્લેન્ડિંગ વ્યૂહરચના સાથે સંપૂર્ણપણે સુસંગત છે. અત્રે નોંધનીય છે કે તાજેતરમાં જ કેન્દ્ર સરકાર દ્વારા ઇથેનોલ-મિશ્રિત ઇંધણને લઈને ફેરફાર કરવામાં આવ્યો છે.
મે મહિનામાં સરકારે પેટ્રોલ સાથે વધુ માત્રામાં ઇથેનોલ મિશ્રણ કરવા માટેના નવા ધોરણો જેવા કે E22, E25, E27 અને E30 ને સત્તાવાર મંજૂરી આપી દીધી છે. સરકારનાં આ પગલાથી આગામી સમયમાં દેશમાં ઇથેનોલ બ્લેન્ડિંગના આગામી તબક્કા માટે મજબૂત પાયો નંખાયો છે અને મારુતિની આ નવી કાર આ અભિયાનમાં પાયાનો પથ્થર સાબિત થશે.
