Bengaluru,તા.૧૦
કર્ણાટકની રાજધાની બેંગલુરુમાં પરવાનગી વગર મહિલાઓનો વીડિયો બનાવવા અને તેને સોશિયલ મીડિયા પર અપલોડ કરવા બદલ એક યુવકની ધરપકડ કરવામાં આવી છે. એક યુવતીએ સોશિયલ મીડિયા પર દાવો કર્યો હતો કે તેનો વીડિયો શહેરના ચર્ચ સ્ટ્રીટ પર રેકોર્ડ કરવામાં આવ્યો હતો અને પરવાનગી વગર અપલોડ કરવામાં આવ્યો હતો. હવે આ મામલો ચર્ચાનો વિષય બની ગયો છે અને લોકો આ ઘટના પર પોતાનો ગુસ્સો વ્યક્ત કરી રહ્યા છે.
ભારતના બંધારણમાં લોકોને કેટલાક મૂળભૂત અધિકારો આપવામાં આવ્યા છે. આ અધિકારોમાંથી એક કલમ ૨૧ હેઠળ ગોપનીયતાનો પણ છે. તેને ગોપનીયતાનો અધિકાર તરીકે ઓળખવામાં આવે છે. આ કારણોસર, જો તમે પરવાનગી વિના કોઈનો ફોટો કે વીડિયો લો છો અને તેને સોશિયલ મીડિયા પર અપલોડ કરો છો, તો તે વ્યક્તિની ગોપનીયતાનું ઉલ્લંઘન માનવામાં આવશે. આવી સ્થિતિમાં, જો સામેની વ્યક્તિ પોલીસમાં ફરિયાદ કરે છે, તો તમારી સામે પણ કાર્યવાહી થઈ શકે છે.
ભારતમાં, આવા કિસ્સાઓમાં આઇટી એક્ટ અથવા ઇન્ફર્મેશન ટેકનોલોજી એક્ટ, ૨૦૦૦ હેઠળ કાર્યવાહી કરી શકાય છે. આ કાયદાની કલમ ૬૬ઈ પરવાનગી વિના વ્યક્તિના ફોટા લેવા અને તેને સોશિયલ મીડિયા પર પોસ્ટ કરવા પર પ્રતિબંધ મૂકે છે અને તેને ગોપનીયતાનું ઉલ્લંઘન માને છે. આમ કરવા બદલ સજાની જોગવાઈ છે. આવું કરવા બદલ દોષિતને ૩ વર્ષ સુધીની જેલ અથવા ૨ લાખ રૂપિયા સુધીનો દંડ અથવા બંને સજા થઈ શકે છે. કલમ ૬૬ઈઃ પરવાનગી વિના કોઈના ગુપ્ત ભાગોના ફોટા લેવા અને તેને પ્રકાશિત કરવા એ ગુનાની શ્રેણીમાં આવે છે. દોષિતને ૩ વર્ષની જેલ અથવા ૨ લાખ રૂપિયા દંડ અથવા બંને સજા થઈ શકે છે. કલમ ૬૭ઃ ઇન્ટરનેટ અથવા કોઈપણ ઇલેક્ટ્રોનિક માધ્યમ દ્વારા અશ્લીલ સામગ્રીનું પ્રસારણ કરવું એ ગુનો છે. દોષિતને પહેલી વાર ૩ વર્ષ સુધીની જેલ અને ૫ લાખ રૂપિયા સુધીનો દંડ થઈ શકે છે. બીજી તરફ, જો બીજી વાર દોષિત ઠરે છે, તો તેને ૫ વર્ષ સુધીની જેલ અને ૧૦ લાખ રૂપિયા સુધીનો દંડ થઈ શકે છે.
