સગીર પુત્રીને બોલ વાગતા શેરીમાં ક્રિકેટ નહિ રમવાનું કહેતા ઉશ્કેરાયેલા શખ્સોએ માથાકૂટ કરી: ગુનો નોંધાયો
Rajkot. તા.28
ઇન્દિરાનગરમાં દંપતી પર પાડોશી મહિલા સહીતની ત્રિપુટીએ પાઇપ અને પથ્થર વડે હુમલો કર્યો હતો. શેરીમાં બેઠેલી પુત્રીને વારંવાર બોલ વાગતો હોય તેણે શેરીમાં ક્રિકેટ નહિ રમવાનું કહેતા ઉશ્કેરાયેલા શખ્સોએ સગીર પુત્રી સાથે ઝગડો કર્યા બાદ ત્રિપુટી માતા-પિતા પર તૂટી પડી હતી. જે હુમલામાં મહિલાનું માથું ફૂટી ગયું હતું. જ્યારે પતિને ચહેરા અને છાતીના ભાગે ઇજા પહોંચી હતી. જે મામલે પ્ર.નગર પોલીસ મથકે ગુનો નોંધાયો હતો.
બનાવ અંગે ઇન્દિરાનગર સ્લમ ક્વાર્ટર પાછળ રહેતા 40 વર્ષીય સફાઈ કામદાર મહિલા નીતાબેન અમીતભાઈ પાટડીયાએ આરોપી તરીકે પાડોશમાં રહેતા સોનલબેન વાઘેલા, નિકુંજ (રહે. ગોંડલ) અને તુષાર (રહે. રૂખડીયાપરા )નું નામ આપી જણાવ્યું હતું કે, તેણી પતિ અમીતભાઇ, સાસુ જ્યોતીબેન અને બે સંતાન સાથે રહે છે. ગઇ તા. 21 ના રાત્રીના સાડા અગીયાર વાગ્યાની આસપાસ તેણી પતિ સાથે ઘરમાં ટી.વી. જોતા હતા. અને મારી દીકરી ઘરની બહાર શેરીમાં હનુમાન દાદાના મંદીર પાસે બેસવા ગયેલ હતી. ત્યારે શેરીમા પાડોશમાં રહેતો નીકુંજ, તુષાર તથા તેના મીત્રો ક્રીકેટ રમતા હતા. દરમિયાન દીકરી આનંદીને બે વખત બોલ વાગેલ જેથી દીકરીએ તેમને કહેલ કે, તમે અહી રમો નહિ. બાદ નિકુંજ તથા તુષાર ઉશ્કેરાઇ ગયેલ અને દીકરી સાથે ઝગડો કરવા લાગેલ હતા.
જેથી દીકરીની બહેનપણીએ ઘરે આવીને જાણ કરતા તુરંત જ ત શેરીમા ગયેલ હતા. જયા નીકુંજના સાસુ સોનલબેન પણ આવી ગયેલ હતા. તેને કહેલ કે, તમે મારી દીકરી સાથે કેમ ઝઘડો કરો છો? ત્યારે સોનલબેન, નીકુંજ તથા તુષાર ઝઘડો કરવા લાગેલ અને ગાળો આપવા લાગેલ હતા. સોનલબેને કહેલ કે, તુ અહિથી જતી રહેજે નહીંતર તને પણ મારી નાખીશુ કહી ત્રણેયએ અચાનક જ તેણી પર હુમલો કરેલ હતો.
તુષાર અને નીકુંજે હાથ પકડેલ હતો જયારે સોનલબેને માથાના ભાગે પાઇપ જેવી વસ્તુ વડે મારતા લોહી નીકળવા લાગેલ હતું. બાદ પતિ છોડાવવા આવતા નિકુંજે મારા પતિને ધક્કો મારી મોઢાના ભાગે પાઈપથી માર મારેલ હતો.
જેથી તે નીચે પડી ગયેલ અને બાદમાં તુષારે છાતીના ભાગે પથ્થર મારેલ હતો. બાદમાં ત્રણેય નાસી ગયેલ હતા. જે મામલે દંપતીએ સરકારી હોસ્પિટલમાં સારવાર લઇ પ્ર.નગર પોલીસ મથકે મહિલા સહીત ત્રણ વિરુદ્ધ ફરિયાદ આપતાં પોલીસે ગુનો નોંધી આરોપીની શોધખોળ આદરી હતી.
