Washington,તા.11
દેશની સૌથી મોટા કોર્પોરેટ ગૃહ રિલાયન્સ ઈન્ડસ્ટ્રીઝ હવે અમેરિકાની સરકાર સામે એક વિશાળ ઓઈલ રિફાઈનરી સ્થાપશે. અમેરિકાના પ્રમુખ ડોનાલ્ડ ટ્રમ્પે આ જાહેરાત કરતા જણાવ્યું કે 50 વર્ષ બાદ દેશમાં એક નવી ઓઈલ રિફાઈનરી 300 બિલિયન ડોલરના ખર્ચે સ્થપાશે અને તેમાં ભારતની રિલાયન્સ ઈન્ડસ્ટ્રી એક મોટા રોકાણકાર અને ભાગીદાર હશે.
એટલું જ નહી આ રિફાઈનરીમાં તૈયાર થનાર ઈંધણ ખરીદવા અને વેચવા રિલાયન્સ ઈન્ડસ્ટ્રીઝએ અમેરિકાની સરકાર સાથે 20 વર્ષના કરાર કર્યા છે. શ્રી ટ્રમ્પે અમેરિકા ઉર્જા પ્રભુત્વ વાળો દેશ બની જશે તેવી જાહેરાત તેમના સોશ્યલ મિડીયા હેન્ડલ પર કરી છે. જો કે રિલાયન્સ ઈન્ડસ્ટ્રીઝએ હજું સુધી કોઈ સતાવાર જાહેરાત કરી નથી.
ટ્રમ્પે જાહેર કર્યુ છે કે, અમેરિકાની આ પ્રથમ રિફાઈનરી ટેકસાસના બ્રાઉન્સવિલેમાં સ્થપાશે. ટ્રમ્પે આ રિફાઈનરીમાં ભાગીદાર થવા માટે ભારતનો આભાર માન્યો હતો અને જાહેર કર્યુ કે ભારતની ખાનગી કંપની રિલાયન્સ તેમાં મોટુ રોકાણ કરશે. આ નવી રિફાઈનરી ભૂમિપૂજન પણ આ વર્ષના બીજા છ માસના ગાળામાં કરવામાં આવશે.
ટ્રમ્પે જણાવ્યું કે, નવી રિફાઈનરી અમેરિકી અર્થતંત્રમાં અબજો ડોલર ઉમેરશે અને આ ક્ષેત્રમાં હજારો નોકરી પણ સર્જન કરશે. ટ્રમ્પે જણાવ્યું કે અમેરિકા ફસ્ટ એજન્ડામાં પરમીટ રાજ હટાવી કરવેરા ઘટાડી અને ટેરિફ ડીલથી દેશમાં બીલીયન ડોલર્સ આવી રહ્યા છે. નવી ઓઈલ રિફાઈનરી દેશની ઉર્જા સલામતી નિશ્ચિત કરશે અને નવી રિફાઈનરી પર્યાવરણની દ્રષ્ટીએ વિશ્વની સૌથી `સ્વચ્છ’ રીફાઈનરી હશે.
આ રીફાઈનરી રોજના 1.60 લાખ બેરલ ક્રુડ ઓઈલ પ્રોસેસ કરવાની ક્ષમતા ધરાવતી હશે અને તે ખાસ કરીને અમેરિકાની ધરતી પરથી નિકળતા `શેલ-ક્રુડ’ ને રીફાઈન કરવાની ક્ષમતા હશે. હાલ જે રીતે ઈરાન સામે અમેરિકાએ યુદ્ધ છેડયુ છે અને ક્રુડ તેમ પરિવહન મુદે હોર્મુઝના જળમાર્ગનો મુદો કેન્દ્રમાં છે તે સંદર્ભમાં ટ્રમ્પની આ જાહેરાત સૂચક છે.
2024માં ડલ્લાસ સ્થિત ઈલેમેન્ટ ફયુલ હોલ્ડીંગ અને અમેરિકાએ 50 વર્ષ બાદ પ્રથમ ઓઈલ રિફાઈનરી સ્થાપવા જાહેરાત કરી હતી પણ તે સ્ટાર્ટઅપ કંપની હતી. જયારે હવે ખુદ અમેરિકાની સરકાર જ રિલાયન્સના સહયોગથી આ જમ્બો રિફાઈનરી સ્થાપશે.
ટ્રમ્પની જાહેરાત કઈ રીતે મહત્વની છે!
આ પ્રોજેક્ટની સૌથી મહત્ત્વની કડી ભારતની રિલાયન્સ ઇન્ડસ્ટ્રીઝ છે. રિલાયન્સે આ નવી રિફાઈનરીમાં તૈયાર થનારા ઇંધણને ખરીદવા અને વેચવા માટે 20 વર્ષનો લાંબાગાળાનો કરાર કર્યો છે. જોકે, આ અંગે રિલાયન્સ તરફથી હજુ સુધી સત્તાવાર નિવેદન આવ્યું નથી, પરંતુ અમેરિકન મીડિયા અને વ્હાઇટ હાઉસ આ ડીલને ગેમ-ચેન્જર માની રહ્યા છે.
એનર્જી પ્રભુત્ત્વ
ટ્રમ્પ વહીવટીતંત્ર ‘અમેરિકન એનર્જી ડોમિનન્સ’ની નીતિ પર ભાર મૂકી રહ્યું છે. ઈરાન-ઈઝરાયેલ યુદ્ધને કારણે વધતા તેલના ભાવ વચ્ચે આ પગલું વૈશ્વિક ચિંતાઓને શાંત કરવા માટે લેવાયું છે.
ક્ષમતા
ટેક્સાસની આ રિફાઈનરી દરરોજ અંદાજે 1,60,000 બેરલ તેલ પ્રોસેસ કરવાની ક્ષમતા ધરાવશે. તેને ખાસ કરીને અમેરિકી શેલ તેલ (Shale Oil) પ્રોસેસ કરવા માટે ડિઝાઇન કરવામાં આવી છે.
રોજગારી અને ટેક્સ
આ પ્રોજેક્ટથી સાઉથ ટેક્સાસમાં હજારો નોકરીઓ ઉભી થશે અને અબજો ડોલરની આર્થિક પ્રવૃત્તિ વધશે.
ડોનાલ્ડ ટમ્પે દાવો કર્યો છે કે, આ દુનિયાની સૌથી ‘ક્લીન’ એટલે કે પર્યાવરણને ઓછું નુકસાન પહોંચાડનારી રિફાઈનરી હશે. તેમણે કહ્યું કે પરમિટ પ્રક્રિયા સરળ બનાવવી અને ટેક્સમાં ઘટાડો કરવાના કારણે જ અબજો ડોલરની ડીલ્સ અમેરિકામાં પરત આવી રહી છે. રિફાઈનરીનું નિર્માણ આ વર્ષના બીજા ક્વાર્ટરમાં શરૂ થવાની ધારણા છે.
