Mumbai, તા.12
અમેરિકા-ઇરાન યુધ્ધ સમાપ્ત થવાના આરે હોવાના સંકેતોને પગલે શેરબજાર-સોના-ચાંદી-રૂપિયામાં જોરદાર ઉછાળો નોંધાયો હતો. જ્યારે ક્રૂડતેલ ઘટીને 90 ડોલરની નીચે ઉતરી ગયું હતું.ઇરાન યુધ્ધ મામલે અમેરિકન પ્રમુખ ડોનાલ્ડ ટ્રમ્પે ભયાનક હુમલો અટકાવવાની સાથે સમજુતી થઇ જવાના આરે હોવાનું જાહેર કરતાં ભારત સહિત એશિયાના શેરબજારોમાં જોરદાર તેજી થઇ હતી. યુધ્ધ સમાપ્ત થવાના સંજોગોમાં હોર્મુઝ સ્ટ્રેટ ફરી ખુલશે, પેટ્રોલીયમ સંકટ હળવું થશે, સપ્લાય ચેઇન નોર્મલ થવા લાગવા સહિતની આશા બંધાતા પોઝીટીવ અસર થઇ હતી.
માહોલ તેજીનો થઇ ગયો હતો. શરૂઆત જ ટોપઅપ હતી અને મોટાભાગના શેરો ગ્રીનઝોનમાં હતા. જાણીતા શેરબ્રોકરોના કહેવા પ્રમાણે બંને દેશો વચ્ચે સમજુતી થઇ જવાના સંજોગોમાં ટુંકાગાળામાં કોઇ નેગેટીવ કારણ રહેતા નથી અને તેજીનો ટ્રેન્ડ શક્ય છે.શેરબજારમાં આજે ભારત પેટ્રોલીયમ, હિન્દુસ્તાન પેટ્રોલીયમ સહિતના રીફાઇનરી શેરોમાં ઉછાળો હતો. મોતીલાલ ઓસવાલ, અશોક લેલેન્ડ, એચડીએફસી બેંક, આઇસીઆઇસીઆઇ બેંક, હિન્દાલકો, ઇન્ડીગો, વોડાફોન, યસ બેંક, સુઝલોન, અપાર ઇન્ડસ્ટ્રીઝ, જે.બી. કેમીકલ્સ, પતંજલી, ટાટા કેપીટલ, વારી એનર્જી વગેરેમાં ઉછાળો હતો. અંબર એન્ટરપ્રાઇઝ, ઓઇલ ઇન્ડિયા, ઓએનજીસી નબળા હતા.
મુંબઇ શેરબજારનો સેન્સેક્સ પ્રારંભિક કામકાજમાં 1000 પોઇન્ટ કરતા વધુ ઉંચકાયો હતો. ત્યારબાદ 714 પોઇન્ટના ઉછાળાથી 74546 સાંપડ્યો હતો તે ઉંચામાં 74859 તથા નીચામાં 74486 થયો હતો. નીફટી 185 પોઇન્ટ વધીને 23347 હતો તે ુંચામાં 23455 તથા નીચામાં 23327 હતો.ક્રૂડતેલમાં કડાકો હતો. ડબલ્યુટીઆઇ ક્રુડ 86.31 ડોલર તથા બ્રેન્ટ ક્રૂડ 88.78 ડોલર હતું. સોના-ચાંદીમાં ઉછાળો હતો. વિશ્વ બજારમાં સોનુ 4195 ડોલર થયું હતું. લોકલ વાયદામાં સોનુ 1230ના ઉછાળાથી 150165 હતું. ચાંદી 3275 વધીને 242930 થઇ હતી.કરન્સી માર્કેટમાં પણ પોઝીટીવ પ્રભાવ પડ્યો હતો. ડોલર સામે રૂપિયો 48 પૈસાના ઉછાળાથી 95.29 થયો હતો.
