New Delhi, તા. 28
દેશમાં ઓગસ્ટ મહિનાથી દૈનિક વપરાશની ચીજવસ્તુઓ (FMCG), ઇલેક્ટ્રોનિક્સ અને ઓટોમોબાઇલ ક્ષેત્રે મોટો ભાવવધારો થવા જઈ રહ્યો છે. પશ્ચિમ એશિયા (મિડલ ઈસ્ટ) માં ચાલી રહેલાં તણાવ અને યુદ્ધની સ્થિતિના કારણે કાચા માલના ભાવ વધ્યાં છે. આ ઉપરાંત દરિયાઈ માલવાહક ભાડાં (ફ્રેટ રેટ) માં થયેલો વધારો અને રૂપિયાનાં મૂલ્યમાં થઈ રહેલી વધ-ઘટને કારણે ઉત્પાદન ખર્ચ વધી જતાં કંપનીઓએ ભાવવધારો કરવાનો નિર્ણય લીધો છે.
ચાલું વર્ષે મોટાભાગની કેટેગરીમાં આ ત્રીજો ભાવવધારો હશે. આગામી મહિનાથી પેક્ડ ચા, હેર ઓઈલ, રેફ્રિજરેટર, ટેલિવિઝન, બ્રાન્ડેડ કપડાં અને પેસેન્જર વાહનોની કિંમતોમાં 6 થી 8 ટકા સુધીનો વધારો જોવા મળી શકે છે. જોકે, કંપનીઓ આશા રાખી રહી છે કે તહેવારોની સીઝન શરૂ થાય તે પહેલાં જ આ ભાવવધારો પૂરો કરી લેવામાં આવે, જેથી ઓગસ્ટમાં ઓણમથી શરૂ થઈને નવરાત્રિ અને દિવાળી સુધી ચાલનારી તહેવારોની ખરીદી પર તેની બહુ મોટી અસર ન પડે.
ઇલેક્ટ્રોનિક્સ અને હોમ અપ્લાયન્સિસ ક્ષેત્રે ઓગસ્ટથી 4 થી 6 ટકાનો વધારો નક્કી મનાય છે. આ વર્ષે રેફ્રિજરેટર અને વોશિંગ મશીન પહેલાથી જ 10 ટકાથી વધુ મોંઘા થયાં છે, જ્યારે ટીવીના ભાવમાં 15 ટકાનો વધારો થયો છે. મેમરી ચિપના ભાવ છેલ્લાં 8-9 મહિનામાં ત્રણ ગણા વધી જતાં સ્માર્ટફોન અને ટીવી નિર્માતાઓ પર ભારણ વધ્યું છે. હાયર ઇન્ડિયાના સીઇઓ સતીશ એન.એસ. અનુસાર, કાચા માલ અને ક્રૂડ સંબંધિત કિંમતો ઊંચી રહેવાથી ઇન્ડસ્ટ્રી માટે આ કિંમત વધારવી મજબૂરી બની ગઈ છે.
ઓટોમોબાઈલ સેક્ટરમાં પણ મોંઘવારીનો આકરો ફટકો પડવા જઈ રહ્યો છે. દેશની સૌથી મોટી કાર ઉત્પાદક કંપની મારુતિ સુઝુકી ઓગસ્ટથી કારનાં ભાવમાં રૂ.30,000 સુધીનો વધારો કરશે. હોન્ડા કાર પણ 1 ઓગસ્ટથી કિંમતો વધારી રહી છે. આ ઉપરાંત મર્સિડીઝ-બેન્ઝ રૂપિયાનાં અવમૂલ્યનને કારણે આગામી ક્વાર્ટરમાં ભાવ વધારવાનું આયોજન કરી રહી છે, જ્યારે ટાટા મોટર્સ અને મહિન્દ્રા એન્ડ મહિન્દ્રા આ મહિનાની શરૂઆતમાં જ ભાવ વધારી ચૂકી છે.
કપડાં અને ફેશન બ્રાન્ડ્સ પણ હવે કિંમતો વધારવા તરફ આગળ વધી રહી છે. કેલ્વિન ક્લેઈન અને ટોમી હિલફિગર જેવી બ્રાન્ડ્સ વેચતી અરવિંદ ફેશન્સના સીઈઓ અમિષા જૈને સંકેત આપ્યો છે કે પડતર કિંમત વધવાને કારણે નવા સ્ટોક પર ભાવ સુધારો કરવો જરૂરી બન્યો છે. અત્યાર સુધી બ્રાન્ડ્સે જૂના સ્ટોકના આધારે જૂના ભાવ જાળવી રાખ્યા હતાં, પરંતુ હવે ઊંચા ભાવે ખરીદેલો નવો સ્ટોક બજારમાં આવતાં ભાવવધારો અનિવાર્ય બન્યો છે.
FMCG અને રોજિંદા વપરાશની વસ્તુઓ બનાવતી ટાટા કન્ઝ્યુમર પ્રોડક્ટ્સ અને બજાજ કન્ઝ્યુમર કેર જેવી કંપનીઓએ પણ મોંઘવારીના દબાણ અંગે ચિંતા વ્યક્ત કરી છે. બજાજ કન્ઝ્યુમરના મેનેજિંગ ડિરેક્ટર નવીન પાંડેના જણાવ્યા મુજબ, અત્યારે પાક (હાર્વેસ્ટ) ની સીઝન હોવા છતાં રાઈ અને બદામ તેલ જેવા ખાદ્ય તેલોના ભાવ અસામાન્ય રીતે ઊંચા છે. ઉપરાંત પેકેજિંગ મટીરીયલમાં વપરાતાં પ્લાસ્ટિક અને પેટ્રોલિયમ પેદાશોના ભાવ વધવાથી સપ્ટેમ્બર ક્વાર્ટરમાં કંપનીઓના માર્જિન પર દબાણ રહેશે.
