New Delhi,તા.02
સુપ્રીમ કોર્ટે કહ્યું કે, શિક્ષણ સેવામાં રહેવા અથવા પ્રમોશન મેળવવા માટે શિક્ષક પાત્રતા પરીક્ષા (TET) ફરજિયાત છે. સુપ્રીમ કોર્ટે ફરજિયાત TET સંબંધિત કાયદાના અમલીકરણ પહેલાં નિયુક્ત શિક્ષકો માટે માર્ગદર્શિકા પણ જારી કરી હતી.
ન્યાયાધીશ દીપાંકર દત્તા અને મનમોહનની બેન્ચે અંજુમન ઇશાત-એ-તાલીમ ટ્રસ્ટ વિરૂધ્ધ મહારાષ્ટ્ર રાજ્ય અને અન્ય બંધારણીય સંદર્ભ સહિત અનેક સિવિલ અપીલોમાં શિક્ષક લાયકાતના મુદ્દાઓ પર પણ વિચારણા કરી.
રાષ્ટ્રીય શિક્ષક શિક્ષણ પરિષદ (NCTE) એ 29 જુલાઈ, 2011 થી TET ફરજિયાત બનાવી દીધી હતી. મુખ્ય પ્રશ્ન એ હતો કે શું આ પહેલા નિયુક્ત શિક્ષકોએ સેવામાં ચાલુ રહેવા અથવા બઢતી માટે TET પાસ કરવી જરૂરી છે? આ પ્રશ્ન ખાસ કરીને લઘુમતી સંસ્થાઓના શિક્ષકો માટે ઉઠાવવામાં આવ્યો હતો.
સુપ્રીમ કોર્ટે એક નિર્દેશ જારી કર્યો હતો કે જે શિક્ષકો પાસે પાંચ વર્ષથી ઓછી સેવા બાકી છે તેમને TET પાસ કર્યા વિના સેવા ચાલુ રાખવાની મંજૂરી આપવામાં આવશે. જોકે, તેમણે પ્રમોશન માટે TET પાસ કરવી પડશે.
બેન્ચે એમ પણ કહ્યું હતું કે, કાયદાના અમલીકરણ પહેલાં ભરતી કરાયેલા સેવારત શિક્ષકો, જેમની નિવૃત્તિ માટે 5 વર્ષથી વધુ સમય બાકી છે, તેમણે બે વર્ષની અંદર TET પાસ કરવી જરૂરી રહેશે. નિષ્ફળતાના કિસ્સામાં, તેમણે સેવા છોડી દેવી પડશે અથવા ફરજિયાત નિવૃત્તિ લેવી પડશે અને નિવૃત્તિ લાભો ચૂકવવા પડશે.
નિવૃત્તિ લાભો માટે પાત્રતાના આ નિયમો
નિવૃત્તિ લાભો માટે લાયક બનવા માટે, આવા શિક્ષકોએ નિયમો અનુસાર લાયકાત સેવા પૂર્ણ કરવી પડશે. જો કોઈ શિક્ષકે લાયકાત સેવા પૂર્ણ કરી નથી અથવા તેમાં કોઈ ખામી છે, તો સંબંધિત વિભાગ આ બાબત પર વિચાર કરી શકે છે. તમને જણાવી દઈએ કે 2010માં, NCTE એ વર્ગ 1 થી 8 સુધીના શિક્ષક નિમણૂક માટે કેટલીક લઘુત્તમ લાયકાત નક્કી કરી હતી. આ પછી, NCTE એ TET શરૂ કરી.
