Washington,તા.૨૦
યુએસ પ્રમુખ ડોનાલ્ડ ટ્રમ્પે ભૂતપૂર્વ બ્રિટિશ રાજકુમાર એન્ડ્રૂ માઉન્ટબેટન-વિન્ડસરની ધરપકડને શરમજનક અને શાહી પરિવાર માટે ખૂબ જ ખરાબ ઘટના ગણાવી છે. આ ધરપકડ જાતીય અપરાધી જેફરી એપસ્ટેઇન સંબંધિત કેસમાં થઈ છે. પત્રકારો સાથે વાત કરતા ટ્રમ્પે કહ્યું, “મને લાગે છે કે તે શરમજનક છે. તે ખૂબ જ દુઃખદ છે. તે શાહી પરિવાર માટે ખૂબ જ ખરાબ બાબત છે.”
એપ્સ્ટેઇન સાથેના તેના કથિત સંબંધોને લગતા જાહેર કાર્યાલયમાં ગેરવર્તણૂકના શંકાસ્પદ કેસમાં એર્ન્ડ્યુની ધરપકડ કરવામાં આવી છે. યુરો ન્યૂઝ સહિત અનેક મીડિયા રિપોર્ટ્સ અનુસાર, તપાસ દરમિયાન તેને મુક્ત કરવામાં આવ્યો છે. યુકે પોલીસે (થેમ્સ વેલી પોલીસ) બર્કશાયર અને નોર્ફોકમાં સ્થળોએ દરોડા પાડ્યા હતા અને એક ૬૦ વર્ષીય વ્યક્તિની ધરપકડ કરી હતી. જોકે પોલીસે શરૂઆતમાં તેનું નામ જાહેર કર્યું ન હતું, પરંતુ બાદમાં એર્ન્ડ્યુને પોલીસ સ્ટેશન છોડીને જતા જોવામાં આવ્યો હતો. ગુરુવારે એર્ન્ડ્યુનો જન્મદિવસ પણ હતો.
આ દરમિયાન, કિંગ ચાર્લ્સે એક નિવેદન બહાર પાડીને કહ્યું હતું કે, “કાયદાએ તેનું કામ કરવું જોઈએ.” કિંગના સત્તાવાર નિવેદનમાં કહેવામાં આવ્યું છે કે, “એર્ન્ડ્યુ માઉન્ટબેટન-વિન્ડસરને સંડોવતા જાહેર કાર્યાલયમાં ગેરવર્તણૂકની શંકાના અહેવાલો સાંભળીને મને ખૂબ જ ચિંતા છે. હવે આની સંપૂર્ણ, નિષ્પક્ષ અને યોગ્ય રીતે તપાસ કરવામાં આવશે. અમે અમારો સંપૂર્ણ અને પૂરા દિલથી સહયોગ આપીએ છીએ.” તેમણે વધુમાં જણાવ્યું હતું કે કાનૂની પ્રક્રિયા ચાલુ હોય ત્યાં સુધી કોઈ વધુ ટિપ્પણી યોગ્ય નથી. પરિવાર જનતા પ્રત્યેની તેમની ફરજ અને સેવા નિભાવવાનું ચાલુ રાખશે.
એન્ડ્રૂએ એપ્સટાઇન સંબંધિત તમામ આરોપોને નકારી કાઢ્યા છે. તેમણે જણાવ્યું હતું કે તેમણે ક્યારેય એપ્સટાઇન દ્વારા કોઈ ગુનાહિત પ્રવૃત્તિ જોઈ નથી કે શંકા નથી કરી. તેમણે નવા આરોપો પર કોઈ ટિપ્પણી કરી નથી. કિંગ ચાર્લ્સે પહેલાથી જ એન્ડ્રૂ પાસેથી “પ્રિન્સ”નું બિરુદ છીનવી લીધું છે. યુએસ જસ્ટિસ ડિપાર્ટમેન્ટ દ્વારા એપ્સટાઇન સંબંધિત નવા દસ્તાવેજો જાહેર થયા બાદ આ તપાસ વધુ તીવ્ર બની છે. કિંગે એન્ડ્રૂને તેમના વિન્ડસર ઘરમાંથી દૂર કરવાની પ્રક્રિયા પણ શરૂ કરી છે, જ્યાં તેઓ ૨૦૦૩ થી રહેતા હતા.
