New Delhi,તા.27
રાજસ્થાન રોયલ્સનો વૈભવ સૂર્યવંશી આઈપીએલ ઈતિહાસમાં સૌથી ઝડપી 500 રન બનાવનાર બેટ્સમેન બની ગયો છે. ઉંમર અને અનુભવની ઉણપને તાકાત બનાવીને તે એવી ‘સંપૂર્ણ’ બેટિંગ શૈલી લઈને આવ્યો છે, જેને આધુનિક ટી-20 ક્રિકેટની નવી બ્લુપ્રિન્ટ માનવામાં આવે છે.
બાકીના લોકોથી અલગ
ગયા વર્ષ સુધી જે બેટ્સમેન માત્ર ઝલકમાં પોતાની ક્ષમતા બતાવતો હતો, આ વખતે તે એક સંપૂર્ણ અને અત્યંત ખતરનાક સ્વરૂપમાં સામે આવ્યો છે. 38.30ની સરેરાશ અને 220.40ના વિસ્ફોટક સ્ટ્રાઈક રેટ સાથે સૂર્યવંશીએ પોતાને બાકીના બેટ્સમેનોથી અલગ કરી દીધો છે.
ગુડ લેન્થ પર હુમલો
ટી-20 માં ‘ગુડ લેન્થ’ને બોલરોનો સૌથી સુરક્ષિત કિલ્લો માનવામાં આવે છે, પરંતુ વૈભવે આ કિલ્લાને ‘સ્કોરિંગ એરિયા’ માં ફેરવી દીધો છે. જ્યાં વિશ્વભરના બેટ્સમેનો આ લેન્થ પર રક્ષણાત્મક હોય છે, ત્યાં વૈભવે આવા 47 બોલમાં 119 રન બનાવ્યા છે, તે પણ 253.20 ના સ્ટ્રાઈક રેટથી અને માત્ર ત્રણ વખત આઉટ થયો છે. તેનો આ નીડર અંદાજ જસપ્રીત બુમરાહ જેવા વિશ્વસ્તરીય બોલરની સામે પણ ડગમગતો નથી, જેનું સ્વાગત તેણે પ્રથમ બોલ પર જ સિક્સર સાથે કર્યું હતું.
અલગ ટેકનિક
પૂર્વ ક્રિકેટર અભિનવ મુકુંદના જણાવ્યા અનુસાર, વૈભવની ‘બોટમ હેન્ડ ડોમિનેન્ટ ગ્રીપ’ તેને અસાધારણ તાકાત આપે છે. તેનું બેટ ‘લીવર-પુલી’ મોશનમાં ચાલે છે. પહેલા નીચે સ્વિંગ થવું અને પછી વીજળીની ઝડપે ઉપર જવું. આ જ કારણ છે કે તે ફ્રન્ટ ફૂટ પર 300+ ના સ્ટ્રાઈક રેટથી બેટિંગ કરે છે.
સ્પિન, પેસનો તફાવત નહીં
વૈભવ માટે બોલરનો પ્રકાર મહત્વનો નથી. ફાસ્ટ બોલરો સામે તેનો સ્ટ્રાઈક રેટ 236.80 છે, જ્યારે સ્પિન સામે પણ 189 થી ઉપર છે, જે ઓછામાં ઓછા 50 બોલ રમનાર બેટ્સમેનોમાં છઠ્ઠા સ્થાને છે. ડાબોડી સ્પિનરો સામે તો વૈભવ વધુ ઘાતક બની જાય છે, જ્યાં તેનો સ્ટ્રાઈક રેટ 280 ને પાર કરી જાય છે.
વૈભવના સ્લોગ અને સ્લોગ સ્વીપ જેવા શોટ્સ બતાવે છે કે તે કોઈપણ બોલરને જામવાની તક આપતો નથી. વૈભવ હવે માત્ર એક બેટ્સમેન નથી, પરંતુ ટી-20 બેટિંગનું તે આધુનિક મોડલ છે જ્યાં ‘ડિફેન્સ’ માટે કોઈ જગ્યા નથી.
રસપ્રદ: મેચ પહેલા કાર્ટૂન જુએ છે
સૂર્યવંશી આજે પણ મેચ પહેલા કાર્ટૂન જુએ છે. તે પોતે સ્વીકારે છે કે કાર્ટૂન જોવું એ તેની જૂની આદત છે, જે હજુ સુધી બદલાઈ નથી. તેના માટે કાર્ટૂન જોવું એ એક રીતે મગજને શાંત રાખવાની રીત છે, જેનાથી તે વધુ દબાણ વગર મેદાન પર ઉતરી શકે છે અને રમત પર ધ્યાન કેન્દ્રિત કરી શકે છે.
માત્ર આક્રમકતા નહીં, નિયંત્રણ પણ
એક ઉત્તમ ઉદાહરણ ભુવનેશ્વર કુમાર સામે જોવા મળ્યું, જ્યારે તેણે સ્લો બોલથી વૈભવને થાપ આપી. સૂર્યવંશીએ પહેલા આક્રમક શોટનો પ્રયાસ કર્યો, પણ બોલની ગતિ ઓળખતા જ પોતાની જાતને એડજસ્ટ કરી લીધી. આ ક્ષણ બતાવે છે કે તેની રમતમાં નિયંત્રણનું સ્તર પણ ઊંચું છે.
તોડ : દૂર જતો સ્વિંગ બોલ
વૈભવ સૂર્યવંશીને બોલથી દૂર સ્વિંગ કરાવવા પર પણ બોલરોને સફળતા મળી છે. ત્રણ વખત તે આ એંગલ સામે રમવાના પ્રયાસમાં આઉટ થયો હતો, જ્યાં તેની સરેરાશ 14.7 રહી હતી.
યોર્કર પણ વૈભવ પર અસરકારક
યોર્કર સામે જ વૈભવ સૂર્યવંશીની ઝડપ પર થોડી બ્રેક લાગતી દેખાય છે, જ્યાં તેનો સ્ટ્રાઈક રેટ 38 સુધી ઘટી જાય છે, જ્યારે ફુલ ટોસ પર તે
120 છે. પરંતુ યોર્કરમાં ભૂલને અવકાશ નહિવત હોય છે. જરાક પણ ચૂક થાય તો બોલ એ જ ઝોનમાં પહોંચી જાય છે, જ્યાં સૂર્યવંશી પહેલેથી જ તૈયાર રહે છે.
