Mumbai, તા. 9
કર્ણાટક સંગીતનાં મહાન ગાયિકા એમ.એસ. સુબ્બુલક્ષ્મીના જીવન પર એક બાયોપિક ફિલ્મ બનવા જઈ રહી છે. આ અંગે સોશિયલ મીડિયા પર ઘણી ચર્ચા ચાલી રહી છે. ફિલ્મમાં મુખ્ય ભૂમિકા કોણ ભજવશે, તેને લઈને અત્યારે અલગ-અલગ માહિતી સામે આવી રહી છે.
‘123 તેલુગુ’ ના જણાવ્યાં અનુસાર, રશ્મિકા મંદાનાને એમ.એસ. સુબ્બુલક્ષ્મીની બાયોપિક માટે પસંદ કરવામાં આવી છે. એવું પણ કહેવામાં આવી રહ્યું છે કે તાજેતરમાં જ આ રોલ માટે તેમના ઘરે એક લુક ટેસ્ટ પણ લેવામાં આવ્યો છે.
જો કે, થોડા સમય પહેલાં એવી માહિતી આવી હતી કે રશ્મિકા કે સાઈ પલ્લવીની જગ્યાએ કમિણી વસંતને આ રોલ માટે સાઈન કરવામાં આવી છે. પરંતુ સૌથી પહેલાં એવી ચર્ચા હતી કે સાઈ પલ્લવી આ પાત્ર ભજવશે અને તેમણે આ માટે કર્ણાટક સંગીત શીખવાનું પણ શરૂ કરી દીધું હતું. જો કે, ફિલ્મ મેકર્સ તરફથી હજુ સુધી કોઈ પણ નામ પર સત્તાવાર પુષ્ટિ કરવામાં આવી નથી.
એમ.એસ. સુબ્બુલક્ષ્મીની બાયોપિક પર બની રહેલી આ ફિલ્મનું નિર્દેશન ગૌતમ તિન્નાનુરી કરશે. ગૌતમ તિન્નાનુરીને સુપરહિટ ફિલ્મ ‘જર્સી’ બનાવવા માટે ઓળખવામાં આવે છે.
રશ્મિકા મંદાના આ દિવસોમાં પોતાની આગામી ફિલ્મ ‘કોકટેલ 2’ ને લઈને પણ ચર્ચામાં છે. તાજેતરમાં જ આ ફિલ્મનું ટ્રેલર રિલીઝ થયું છે, જેને દર્શકોનો ભરપૂર પ્રેમ મળ્યો છે. આ માટે રશ્મિકાએ સોશિયલ મીડિયા પર પોતાનાં ફેન્સનો આભાર પણ માન્યો હતો. ફિલ્મ ‘કોકટેલ 2’, 19 જૂન 2026ના રોજ સિનેમાઘરોમાં રિલીઝ થવા જઈ રહી છે.
