(નયના દવે દ્વારા)
Jamnagar તા.૩૧
જામનગર જિલ્લામાં જાહેરમાં ગંજીપત્તાના પાનાથી તીનપત્તીનો જુગાર રમાતો હોવાની મળેલી બાતમીના આધારે કાલાવડ, જામનગર તાલુકાના દરેડ તથા લાલપુર તાલુકાના બબરઝર ગામની કોટડા સીમમાં પોલીસે અલગ-અલગ ચાર દરોડા પાડી કુલ ૧૭ શખ્સોને ઝડપી લીધા હતા. પોલીસે આરોપીઓ પાસેથી રોકડ રકમ અને ગંજીપત્તાના પાના મળી કુલ રૂ. ૨૪,૮૦૦નો મુદ્દામાલ કબજે કરી જુગારધારા કલમ ૧૨ હેઠળ કાર્યવાહી હાથ ધરી છે.
કાલાવડના કૈલાશનગર વિસ્તારમાં પોલીસે દરોડો પાડી ગોળ કુંડાળું વળી તીનપત્તીનો જુગાર રમતા ધર્મેન્દ્રસિંહ હાલુભા જાડેજા (ઉ.વ. ૪૧), બાબુભાઈ ગોબરભાઈ સાગઠીયા (ઉ.વ. ૩૮), સંજયભાઈ માધાભાઈ શેખા (ઉ.વ. ૩૬) તથા ગૌતમભાઈ કાનજીભાઈ સાગઠીયા (ઉ.વ. ૪૪)ને ઝડપી લીધા હતા. તેમની પાસેથી તથા સ્થળ પરથી રૂ. ૧,૩૨૦ની રોકડ અને ગંજીપત્તાના ૫૨ પાના કબજે કરવામાં આવ્યા હતા.
જામનગર તાલુકાના દરેડ ગામે મસીતીયા રોડ પર અબ્બાસભાઈની હોટલ પાછળ પોલીસે દરોડો પાડી હબીબ અલ્લારખાભાઈ ખફી (ઉ.વ. ૪૨), મુરાદ ઈસ્માઈલ ખફી (ઉ.વ. ૩૯), સબીર અબ્દુલભાઈ મથુપોત્રા (ઉ.વ. ૩૨) તથા મૂળ ઉત્તર પ્રદેશના અભાર અહેમદ રંગરેજ (ઉ.વ. ૪૪)ને જુગાર રમતા ઝડપી લીધા હતા. પોલીસે તેમની પાસેથી તથા સ્થળ પરથી કુલ રૂ. ૨,૦૨૦ની રોકડ અને ગંજીપત્તાના પાના કબજે કર્યા હતા.
લાલપુર તાલુકાના બબરઝર ગામની કોટડા સીમમાં પણ પોલીસે બે અલગ-અલગ દરોડા પાડ્યા હતા. પ્રથમ દરોડામાં નરેશ વીરજીભાઈ ચાવડા (ઉ.વ. ૩૬), પ્રદીપ ધરમસીભાઈ રૂપારેલ (ઉ.વ. ૬૨), નથુ માલદેભાઈ ગાગીયા (ઉ.વ. ૩૩) તથા પોપટ રામાભાઈ ગાગીયા (ઉ.વ. ૬૪)ને ઝડપી લઈ તેમની પાસેથી રૂ. ૧૧,૪૫૦ની રોકડ રકમ કબજે કરવામાં આવી હતી. જ્યારે બીજા દરોડામાં પાંચ શખ્સોને ઝડપી લઈ તેમની પાસેથી રૂ. ૧૦,૦૧૦ની રોકડ તથા ગંજીપત્તાના પાના જપ્ત કરવામાં આવ્યા હતા.આમ, જામનગર જિલ્લામાં એક જ દિવસે પાડવામાં આવેલા ચાર જુગારના દરોડામાં કુલ ૧૭ શખ્સો ઝડપાયા હતા અને તેમની પાસેથી કુલ રૂ. ૨૪,૮૦૦ની રોકડ સહિતનો મુદ્દામાલ કબજે કરી તમામ વિરુદ્ધ જુગારધારા કલમ ૧૨ હેઠળ કાયદેસરની કાર્યવાહી હાથ ધરવામાં આવી છે.
