(મિલાપ રૂપારેલ)Amreli, તા.10
રાજુલા તાલુકાના હિંડોરણા ગામ નજીક મંગળવારે રાત્રે એક હનીટ્રેપની ઘટનાં બનતાં પોલીસે ભોગ બનનાર યુવકની ફરિયાદ નોંધી આ હનીટ્રેપના બનવાની ગંભીરતા સમજી અને આ બનવામાં એક મહિલા આરોપી સહિત ત્રણને ગણતરીની કલાકોમાં ઝડપી લીધાં હતાં.
જાફરાબાદ તાલુકાના વારાહ સ્વરૂપ ગામે રહેતાં રોનકદાસ ભરતદાસ મેસવાણીયા નામનાં 21 વર્ષીય યુવકને ગત તા.7ના રાત્રે 11/05 વાગ્યે રાજુલા તાલુકાના હીંડોરણા ગામે રહેતાં આરોપી કરણભાઇ દંતુભાઇ પટાટે યુવકને ફોન કરી રાજુલાના હીંડોરણા ગામે આવેલ ક્રિષ્ના સોસાયટીથી આગળ બાવળની કાટમાં બોલાવેલ હતાં. જ્યાં અને રાજુલા ગામે રહેતાં આરોપી સમીનાબેન સેલોત તથા જીતુભાઇ રાઘવભાઇ ચૌહાણ સાથે યુવકની ઓળખાણ કરાવી હતી. અને આ યુવકને મહિલા સાથે બાવળની કાટમાં લઇ જતા હતાં.
ત્યારે એક અજાણ્યા આરોપીએ આવી યુવકને ગાલ ઉપર ત્રણ ચાર લાફા મારી તેમજ ઢીકાપાટુનો માર મારી મહિલા સાથે ખરાબ કામ કરવાનુ કહી મૃત્યુ નિપજાવવાનો ભય બતાવી ધમકી આપી યુવક તથા મહિલાનો વીડીયો ઉતારી લઇ યુવક પાસેથી પાંચ લાખ રૂપીયાની બળજબરી પુર્વક માંગણી કરી અને પાંચ લાખ નહી આપે તો બળાત્કારના કેસમાં ફીટ કરવાની તેમજ વીડીયો વાયરલ કરવાની તેમજ જાનથી મારી નાખવાની ધમકીઓ આપી યુવકનો નવો મોબાઇલ ફોન બળજબરીથી પોતાની પાસે રાખી લઇ આરોપીઓએ ગુન્હાહીત કાવતરૂ રચી માર માર્યાની યુવકે એક મહિલા સહિત પાંચ સામે પોલીસમાં ફરિયાદ નોંધાવી હતી.
આ અંગે રાજુલા પોલીસ સ્ટેશનના પોલીસ ઇન્સ્પે. વી.એમ.કોલાદરા અને તેમની ટીમે આ હનીટ્રેપના બનવાની ગંભીરતા સમજી અને આ બનવાનાં ત્રણ આરોપીઓ લખમણ પટાટ, કરણ પટાટ તથા મહિલા આરોપી સમીનાબેનને ગણતરીની કલાકોમાં ઝડપી લીધાં હતાં. જ્યારે આ બનાવમાં નાસતાં ફરતાં દેસુરભાઈ પટાટ તથા જીતુભાઈ ચૌહાણની શોધખોળ આદરી છે. અને આ બંને આરોપીઓની ઓળખ થઈ જતાં ઝડપી લેવાં ચક્રોગતિમાન કર્યાં છે.
