Washington,તા.22
ઈરાન અને અમેરિકા વચ્ચે 40 દિવસના યુદ્ધ અને બે સપ્તાહના યુદ્ધ વિરામનો આજે અંત આવે તે પુર્વે જ અમેરિકાના પ્રમુખ ડોનાલ્ડ ટ્રમ્પે હવે હોર્મુઝની નાકાબંધી ચાલુ રાખવાની સાથે યુદ્ધ વિરામ હવે કોઈ અંતિમ મુદત વગર જ લંબાવી દીધુ છે તથા પાકિસ્તાનમાં જે બીજા તબકકાની મંત્રણા આજથી શરૂ થવાની હતી તે પણ હવે રદ કરી દીધી છે.
અમેરિકી પ્રમુખ ડોનાલ્ડ ટ્રમ્પે તેમના સોશ્યલ મીડીયા હેન્ડલ ટુથ સોશ્યલ પર આ જાહેરાત કરી હતી. સાથે એવો પણ દાવો કર્યો કે પાકના વડાપ્રધાન શાહબાઝ શરીફ અને જનરલ અસીમ મુનીરની અપીલ પર ઈરાન પર હુમલા રોકી દીધા છે પણ હોર્મુઝની નાકાબંધી ચાલુ જ રહેશે. બીજી તરફ અમેરિકી નાણામંત્રી સ્કોટ બેસેટે દાવો કર્યો કે ઈરાનની આર્થિક તાકાત પર હવે પ્રહાર કરશે અને હોર્મુઝની નાકાબંધી ચાલુ રહેશે.
જો કે અમેરિકાની આ પ્રતિક્રિયા પર ઈરાનનો આકરો પ્રતિભાવ આપ્યો છે. ઈરાનની સંસદનાં અધ્યક્ષના સલાહકાર મહદી મોહમ્મદને અમેરિકાના યુદ્ધ વિરામને ફગાવતા અમેરિકાને પરાજીત પક્ષ ગણાવતા ઉમેર્યુ કે હારવાવાળો પક્ષ કોઈ શરતો લાદી શકે નહી.
તેઓએ જણાવ્યું કે, પ્રમુખ ટ્રમ્પે જે યુદ્ધ વિરામ જાહેર કર્યુ તે અમોને સ્વીકાર્યુ નથી અને તેઓએ અમેરિકા વિરુદ્ધ સૈન્ય કાર્યવાહી ફરી શરૂ કરવાનું પણ આહવાન કર્યુ હતું. પ્રમુખ ટ્રમ્પે તેના સોશ્યલ મીડીયા હેન્ડલ પર લખ્યું કે ઈરાનની સરકાર ગંભીર રૂપે તૂટી ચુકી છે.
અમોએ ઈરાનને થોડો સમય આપવાનો નિર્ણય લીધો છે. મે મારા સૈન્યને હોર્મુઝ સહિતના ઈરાની બંદરોની ઘેરાબંધી પુરી રીતે ચાલુ રાખવા અને લડાઈ માટે તૈયાર રહેવા આદેશ આપ્યા છે. હોર્મુઝ જળમાર્ગ એ ઈરાનના ક્રુડતેલ વ્યાપારનો મહત્વનો માર્ગ છે અને તેના પર જો અમેરિકાની નાકાબંધી ચાલુ રહે તો ઈરાન માટે ક્રુડતેલ વ્યાપાર પર મોટી અસર થઈ શકે છે.
જો કે ઈરાને હોર્મુઝ જળમાર્ગ પર તેનો કબ્જો હોવાનું જણાવી અહી દુશ્મન દેશો સિવાયના જહાજોને ટોલટેક્ષ ભરી આવાગમન કરવા મંજુરી આપી છે પણ અમેરિકન નૌકાદળ હોર્મુઝ માર્ગ આગળ વધવા ઓઈલ ટેન્કર સહિતના જહાજોનો માર્ગ રોકી તેને પરત મોકલી રહ્યા છે તથા હાલમાં જ એક ઈરાની જહાજને પણ કબ્જે કર્યુ છે. આમ આ ક્ષેત્રમાં તનાવ યથાવત છે અને ગમે ત્યારે ભડકો બની શકે છે.
