Morbi,તા.15
મોરબીમાંથી માનવતાને શરમાવે તેવી એક અત્યંત હૃદયદ્રાવક અને આઘાતજનક ઘટના સામે આવી છે. એક સગીર દીકરી, જેની રક્ષા કરવાની જવાબદારી તેના પિતાની હોય છે, તે જ પિતા પોતાની દીકરીનો સોદાગર બન્યો હોવાનો કિસ્સો પ્રકાશમાં આવતા સમગ્ર પંથકમાં ભારે રોષ જોવા મળી રહ્યો છે.
સગીરાના ભોળપણનો લાભ ઉઠાવીને મકાન માલિક સતત તેનું યૌન શોષણ કરતો હતો. જ્યારે આ કુકર્મની જાણ સગીરાના પરિવારના અન્ય સભ્યોને થઈ ત્યારે તેઓએ હિંમત દાખવી પોલીસ ફરિયાદ કરવાનું નક્કી કર્યું હતું. મોરબી સિટી એ ડિવિઝન પોલીસ મથકે મકાન માલિક અને અન્ય શખ્સો સામે દુષ્કર્મ તથા પોક્સો (POCSO) એક્ટની વિવિધ કલમો હેઠળ ગુનો નોંધવામાં આવ્યો છે.
આ મામલે પોલીસે ત્વરિત કાર્યવાહી કરતા દીકરીને નરાધમના હવાલે કરનાર સગા પિતાની પોલીસે ધરપકડ કરી લીધી છે. આ ઉપરાંત હવસખોર મકાન માલિકને પણ જેલના સળિયા પાછળ ધકેલી દેવામાં આવ્યો છે. જ્યારે આ ગુનામાં મદદગારી કરનાર ત્રીજા એક શખ્સનું નામ પણ સામે આવ્યું છે, જે હાલ ફરાર છે અને પોલીસ તેની સઘન શોધખોળ કરી રહી છે.
મોરબીના શહેરી વિસ્તારમાં ભાડે રહેતા એક પરિવારની સગીર દીકરી પર તેના જ મકાન માલિકે દુષ્કર્મ આચર્યું હોવાની ઘટના બની હતી. શરૂઆતમાં આ મામલો માત્ર મકાન માલિકની હેવાનિયતનો જણાતો હતો, પરંતુ જ્યારે પોલીસે મુખ્ય આરોપી મકાન માલિકની ધરપકડ કરી પૂછપરછ હાથ ધરી ત્યારે જે સત્ય બહાર આવ્યું તે સાંભળીને પોલીસ પણ ચોંકી ઉઠી હતી. તપાસમાં ખુલાસો થયો છે કે, નરાધમ પિતાએ મકાન માલિકને પોતાની સગીર દીકરી સાથે કુકર્મ કરવાની મંજૂરી આપી હતી.
