Washington, તા.1
અમેરિકન પ્રમુખ ડોનાલ્ડ ટ્રમ્પના ઇરાન પર યુધ્ધના પગલાથી વધેલી મોંઘવારી ઉપરાંત ટેરિફ, ડિપોર્ટેશન તથા વિઝા જેવી નીતિઓને કારણે અમેરિકામાં વસતા ગુજરાતીઓ ભારે પરેશાન બન્યા છે. અમેરિકામાં રહેવાનું મુશ્કેલ બની ગયાનો સૂર વ્યક્ત કરવા લાગ્યા છે.
પેન્સિલવેનિયામાં એક મોટેલમાં જોબ કરતા ગુજરાતીનું માનીએ તો મોંઘવારીએ ભૂક્કા કાઢી નાખ્યા છે, પહેલા શોપિંગ કરવા જાઓ ત્યારે 100 ડોલરમાં આખું કાર્ટ ભરાઈ જતું હતું જ્યારે હવે બસો-અઢીસો ડોલર પણ ઓછા પડે છે. તેમાંય જ્યારથી વોર ચાલુ થયું છે ત્યારથી તો મોંઘવારીએ એવી માજા મૂકી છે કે ગેસની સાથે તમામ ચીજવસ્તુઓના ભાવ બેફામ વધી રહ્યા છે.
મોંઘવારીની સાથે-સાથે હવે ટ્રમ્પે જે એન્ટી ઈમિગ્રન્ટ માહોલ ઉભો કર્યો છે તેના કારણે હવે ઈન્ડિયન્સ સીધા તેમના સમર્થકોના ટાર્ગેટ પર આવી ગયા છે. ટેક્સસ જેવા સ્ટેટમાં તો સોશિયલ મીડિયાની સાથે-સાથે જાહેરમાં પણ ઈન્ડિયન્સ સાથે રેસિસ્ટ વ્યવહાર થઈ રહ્યો છે. પોતાને થયેલો આવો જ એક અનુભવ શેર કરતા એક ગુજરાતી યુવકે જણાવ્યું હતું કે તે વોલમાર્ટમાં હતો.
ત્યારે એક અમેરિકને તેની નજીક આવીને બેફામ ગાળાગાળી કરીને ઈન્ડિયા પાછા જતા રહેવા માટે કહ્યું હતું. આ યુવકનું માનીએ તો આવા તો ઘણા કિસ્સા તાજેતરના દિવસોમાં બની રહ્યા છે જે સોશિયલ મીડિયા પર ઈન્ડિયન્સ સામે ફેલાવાઈ રહેલી નફરતનું પરિણામ છે.
બીજી તરફ, માસ ડિપોર્ટેશનને કારણે ગુજરાતી બિઝનેસ ઓનર્સને ધોળા દિવસે તારા દેખાઈ રહ્યા છે. શિકાગોમાં પોતાના બિઝનેસીસ ધરાવતા એક ગુજરાતીનું માનીએ તો હવે કલાકનો 17 ડોલર પગાર આપતા પણ માણસો નથી મળી રહ્યા. સમર સીઝનમાં બિઝનેસ ઠીક-ઠાક ચાલી રહ્યા છે અને તેવામાં જ કર્મચારી ના મળી રહ્યા હોવાના કારણે ઓનર્સને રોજના 12-14 કલાક ખડેપગે કામ કરવાનો વારો આવ્યો છે.
શિકાગોમાં તો હાલ 17 ડોલર પગારની સાથે-સાથે 100 ડોલર સાઈન-અપ બોનસ પણ ઓફર કરવામાં આવી રહ્યું છે, અને તેની સાથે-સાથે હોલીડે પેના આઠ કલાક ભરી આપવામાં આવે છે અને વર્ષનું પાંચ દિવસનું પેઈડ વેકેશન પણ ઓફર કરાઈ રહ્યું છે. શિકાગોના આ બિઝનેસ ઓનરનું એવું પણ કહેવું હતું કે હાલ કમાણી ઝીરો થઈ ગયું છે જ્યારે ખર્ચ વધી ગયું છે.
આ ઉપરાંત ટ્રમ્પના પ્રેસિડેન્ટ બન્યા બાદ સ્ટૂડન્ટ્સનું આવવાનું પણ સાવ ઘટી ગયું છે, જે સ્ટૂડન્ટ્સનું ભણવાનું પૂરું થઈ ગયું છે તે નોકરીએ લાગી ગયા છે અને જેમનું ભણવાનું ચાલુ છે તે હવે ઈલીગલી જોબ કરવા તૈયાર નથી કારણકે બધાયને ડિપોર્ટેશનની બીક લાગે છે. બિઝનેસ ઓનર્સ તો સ્ટૂડન્ટ્સને પણ કલાકના 12-13 ડોલર કેશ આપવા માટે તૈયાર છે, પરંતુ હવે સ્ટૂડન્ટ્સ તેમને દૂરથી જ રામ-રામ કરી રહ્યા છે.
જોકે, આ સ્થિતિમાં અત્યારસુધી નોકરીઓ માટે વલખા મારતા અને ઓનરના નખરા સહન કરીને થાકી ગયેલા ગુજરાતીઓ હવે ‘સો દિવસ સાસુના તો એક દિવસ વહુનો’ જેવી લાગણી અનુભવી રહ્યા છે.
ટ્રમ્પથી કંટાળેલા દેસીઓ હવે આતુરતાથી મિડટર્મ ઈલેક્શનની રાહ જોઈ રહ્યા છે. તેમનું કહેવું છે કે ખુદ અમેરિક્નસ પણ ટ્રમ્પના નામથી જ હવે ચીઢાવા લાગ્યા છે, કારણકે મોંઘવારી ઘટાડવા અને અફોર્ડેબિલિટી વધારવાને બદલે ટ્રમ્પે જાણી જોઈને ઈરાન વોર જેવી મુસીબત ઉભી કરીને લોકોના ખિસ્સા ખાલી કરી નાખ્યા છે.
