Panchmahal,તા.૧૨
કાલોલમાંથી એક હૃદયદ્રાવક કિસ્સો સામે આવ્યો છે. પત્નીએ દિયરના પ્રેમમાં અંધ બનીને પોતાના જ પતિને મોતને ઘાટ ઉતારી દીધો. જેમાં તેનો પિતરાઈ ભાઈ એટલે કે પ્રેમી પણ સામેલ હતો. આરોપીઓએ લોકોને શંકા ન જાય તે માટે કેનાલ નજીક એક ખાડો ખોદી તેમાં મીઠું નાખી લાશના ટુકડા કરી દાટી દીધી હતી, પરંતુ પોલીસે આગવી ઢબે તપાસ અને પૂછપરછ કરતાં સમગ્ર મામલો સામે આવ્યો અને આરોપીઓને પોલીસે ઝડપી પાડ્યા હતા.
Panchmahal જિલ્લાના કાલોલ તાલુકામાં આવેલા ભાદરોલી બુઝર્ગ ગામમાં ૩૫ વર્ષીય રાજેશભાઈ નરવતસિંહ સોલંકીની અત્યંત ઘાતકી રીતે હત્યા કરવામાં આવી. હત્યાનું કારણ કોઈ સાથેની દુશ્મનાવટ નહીં પણ પત્નીની જ બેવફાઈ હતું. રાજેશભાઈની પત્ની શિલ્પાબેન અને રાજેશભાઈના પિતરાઈ ભાઈ ધર્મેન્દ્રસિંહ સોલંકી વચ્ચે આંખ મળી જતાં કથિત પ્રેમ સંબંધો બંધાયા હતા.
આ પ્રેમ સંબંધની રમતમાં જ્યારે પતિ રાજેશ નડતરરૂપ બનવા લાગ્યો ત્યારે પત્ની શિલ્પાને આંખમાં કણા જેમ ખૂંચવા લાગ્યો હતો અને શિલ્પાએ જ પ્રેમી ધર્મેન્દ્રને પોતાના જ પતિને પ્રેમ માર્ગમાંથી દૂર કરી દેવા દબાણ કરવાનું શરૂ કર્યું હતું. આખરે ધર્મેન્દ્રએ રાજેશને પ્રેમ માર્ગમાંથી દૂર કરવાનો માસ્ટર પ્લાન બનાવી લીધો અને પાર પણ પાડી દીધો.
ધર્મેન્દ્ર તેના અન્ય મિત્રો સાથે બાઇક પર રાજેશને સાથે લઈ ગયો ત્યારબાદ ધર્મેન્દ્ર અને રાજેશ હોટેલમાં સાથે જમ્યા અને અન્ય મિત્રની બાઇક પર ગામમાં પરત પણ ફર્યા, પરંતુ મોડી રાત્રે ભાભીના પ્રેમમાં અંધ બનેલો ધર્મેન્દ્ર પોતાના પિતરાઈ ભાઈ રાજેશને તળાવ તરફ લઈ ગયો. જ્યાં રાત્રિના અંધકારમાં ભાદરોલી ગામના મોટા તળાવ અને તૂટેલા ચેકડેમ પાસે પ્રેમી ધર્મેન્દ્રએ કસાઈ બનીને પાછળથી રાજેશભાઈના માથામાં ઈંટનો ઘા ઝીંકી દીધો.
આરોપીને એટલાથી પણ સંતોષ ન થતાં ધર્મેન્દ્રએ ચેકડેમના પથ્થર પર તેમનું માથું વારંવાર પછાડીને કમકમાટીભર્યું મોત નીપજાવ્યું. આ પાપને છુપાવવા માટે હત્યારાએ શિલ્પાના કહેવા મુજબ પુરાવાનો નાશ કરવા માટે તીક્ષ્ણ હથિયારથી મૃતક રાજેશના હાથ અને પગ કાપી નાખ્યા અને ટુકડા કરી ચેકડેમ નજીક ખાડો ખોદી, મીઠું નાખી દાટી દીધા.
રાજેશ નોકરી નહીં જતો હોવા ઉપરાંત ઘરે પણ નહીં આવતા મૃતકના નાના ભાઈ જગદીશભાઈએ પોતાનો ભાઈ રાજેશ ગુમ થયો હોવાની કાલોલ પોલીસ મથકે જાણવા જોગ ફરિયાદ નોંધાવી હતી. નાના ભાઈની ફરિયાદના આધારે પોલીસે આગવી સૂઝબૂઝ સાથે તપાસ શરૂ કરી અને મર્ડર મિસ્ટ્રીનો ભેદ ઉકેલી કાઢ્યો. પરિવારને પહેલેથી જ ધર્મેન્દ્ર અને શિલ્પાના આડા સંબંધો પર શંકા હતી.
જેનો અણસાર પોલીસને આવતાં જ પોલીસ અધિકારીએ ધર્મેન્દ્રને પોલીસ મથકે બોલાવીને આકરી પૂછપરછ કરી ત્યારે આખરે ધર્મેન્દ્ર ભાંગી પડ્યો અને હત્યાનો આખો ઘટનાક્રમ ખુલ્લો પડી ગયો. આરોપી ધર્મેન્દ્રના બતાવ્યા મુજબ પોલીસે પંચોની હાજરીમાં ખાડો ખોદાવ્યો અને ત્યાંથી રાજેશનો હાથ-પગ કપાયેલો મૃતદેહ બહાર કાઢવામાં આવ્યો અને પેનલ પીએમ કરાવવામાં આવ્યું.
જે પત્નીએ જીવનભર સાથ નિભાવવાના વચનો આપ્યા હતા, તેણે જ પોતાના પ્રેમી સાથે મળીને પતિની કબર ખોદી નાખી. પોલીસે મૃતકના ભાઈ જગદીશભાઈની ફરિયાદના આધારે શિલ્પા અને ધર્મેન્દ્ર વિરુદ્ધ હત્યાનો ગુનો નોંધી બંનેની ધરપકડ કરી કાયદેસરની કાર્યવાહી હાથ ધરી છે
