(નયના દવે દ્વારા)
Jamnagar તા.૨૩
Jamnagar શહેરના ઔદ્યોગિક દરેડ જીઆઈડીસી ફેસ-૩ માંથી એક અત્યંત ચોંકાવનારું અને કરોડો રૂપિયાનું જીએસટી કૌભાંડ પ્રકાશમાં આવ્યું છે. રાજ્ય વસ્તુ અને સેવા કર (એસ.જી.એસ.ટી.) વિભાગે સપાટો બોલાવીને ’માંડવરા ટ્રેડિંગ કંપની’ નામની પેઢી પર મેગા સર્ચ ઓપરેશન હાથ ધર્યું હતું. આ સઘન અને ઓચિંતી કાર્યવાહી દરમિયાન, બોગસ બિલિંગ અને ખોટી વેરાશાખ (આઈ.ટી.સી.) મેળવવાના અત્યંત ગંભીર ગુના સબબ કંપનીના સંચાલક પિતા-પુત્રની ધરપકડ કરવામાં આવી છે. સરકારી તિજોરીને નુકસાન પહોંચાડતી આ મેગા-રેડની ઘટનાને પગલે સમગ્ર જામનગરના ઔદ્યોગિક અને વ્યાપારી વર્ગમાં ભારે ફફડાટ વ્યાપી ગયો છે.
પ્રાપ્ત અને સત્તાવાર વિગતો અનુસાર, દરેડ ફેસ-૩ ના પ્લોટ નંબર-૩૧૨૮ પર કાર્યરત આ પેઢી દ્વારા એક સુનિયોજિત ષડયંત્ર રચીને આ કૌભાંડ આચરવામાં આવ્યું હતું. આર્થિક ગુનામાં સંડોવાયેલા આયુષ સુરેશચંદ્ર શાહ અને તેમના પિતા સુરેશચંદ્ર મૂલચંદ્ર શાહ દ્વારા વાસ્તવિક માલસામાનની હેરફેર વિના, માત્ર કાગળ પર જ બોગસ બિલો દર્શાવીને અંદાજે રૂ. ૨૩.૦૮ કરોડની જંગી અને તદ્દન ખોટી વેરાશાખ (ઇનપુટ ટેક્સ ક્રેડિટ) ઊભી કરવામાં આવી હતી. આ મસમોટા કૌભાંડ દ્વારા પિતા-પુત્રની જોડીએ સરકાર સાથે આયોજનબદ્ધ રીતે આર્થિક છેતરપિંડી આચરી હોવાનું પ્રાથમિક તપાસમાં સ્પષ્ટપણે ફલિત થતાં જ એસ.જી.એસ.ટી. વિભાગે બંનેની તાત્કાલિક ધોરણે અટકાયત કરી કાયદેસરની કાર્યવાહી હાથ ધરી છે.
૨૩ કરોડથી વધુના આ મસમોટા આર્થિક કૌભાંડનો પર્દાફાશ થતાં જ દરેડ જીઆઈડીસી વિસ્તારમાં વ્યાપક ખળભળાટ મચી જવા પામ્યો છે.એસ.જી.એસ.ટી. વિભાગ દ્વારા કાયદાનો ગાળિયો કસવામાં આવતા ટેક્સ ચોરી કરતા અન્ય તત્વોમાં પણ ડરનો માહોલ જોવા મળી રહ્યો છે. હાલમાં, તપાસ એજન્સીઓ દ્વારા આ કૌભાંડમાં સંડોવાયેલી ’માંડવરા ટ્રેડિંગ કંપની’ના અન્ય આર્થિક વ્યવહારો, બેંક ખાતાઓ અને અન્ય શંકાસ્પદ કનેક્શન્સ અંગે ઝીણવટભરી તપાસ તેજ કરવામાં આવી છે. સરકારી તિજોરીને થયેલા આ જંગી નુકસાનની ભરપાઈ કરવા અને કૌભાંડના મૂળ સુધી પહોંચવા વિભાગે કમર કસી છે, ત્યારે આગામી દિવસોમાં આ કેસમાં વધુ મોટા ખુલાસાઓ થવાની પ્રબળ શક્યતાઓ સેવાઈ રહી છે.
