Mumbai,તા.૨૭
શ્રેયસ ઐયરની કેપ્ટનશીપ હેઠળ ભારતીય ટીમે ટી ૨૦ આંતરરાષ્ટ્રીય સીઝનની શરૂઆત શરમજનક રહી છે. ત્રણ વખત ટી ૨૦ વર્લ્ડ કપ વિજેતા ટીમ ઈન્ડિયાને આયર્લેન્ડ સામે બે મેચની ્૨૦ શ્રેણીની પહેલી મેચમાં ૩૪ રનથી હારનો સામનો કરવો પડ્યો. ભારતીય ટીમને કોઈપણ ફોર્મેટમાં આયર્લેન્ડ સામે પહેલી હારનો સામનો કરવો પડ્યો છે. અગાઉ, ટીમ ઈન્ડિયા આયર્લેન્ડ સામે એક પણ મેચ હાર્યું ન હતું, ફક્ત ટી ૨૦ આંતરરાષ્ટ્રીય મેચોમાં જ નહીં, પણ વનડેમાં પણ. ૧૮૩ રનના લક્ષ્યાંકનો પીછો કરવા ઉતરેલી ભારતીય ટીમ ૧૮.૫ ઓવરમાં ૧૪૮ રનમાં ઓલઆઉટ થઈ ગઈ હતી.
ટી ૨૦ વર્લ્ડ કપ ૨૦૨૬ જીત્યા બાદ પોતાની પહેલી ટી ૨૦ આંતરરાષ્ટ્રીય મેચમાં પ્રવેશ કરનારી ટીમ ઈન્ડિયા પાસેથી સારા પ્રદર્શનની અપેક્ષા હતી. આયર્લેન્ડ સામે ૧૮૩ રનના લક્ષ્યાંકનો પીછો કરવા ઉતરેલી ટીમ ઈન્ડિયાની શરૂઆત ખરાબ રહી, જેમાં સંજુ સેમસન માત્ર પાંચ રન બનાવીને આઉટ થયા, જ્યારે ઈશાન કિશન માત્ર એક રન બનાવીને આઉટ થયા. ત્યારબાદ, કેપ્ટન તરીકે પહેલીવાર બેટિંગ કરી રહેલા શ્રેયસ ઐયર પાસેથી મોટી ઇનિંગ રમવાની અપેક્ષા હતી, પરંતુ તે પણ માત્ર ત્રણ રન બનાવીને પેવેલિયન પાછો ફર્યો. ઓપનિંગ બેટ્સમેન અભિષેક શર્માએ એક છેડો પકડી રાખ્યો હતો, પરંતુ તે પણ પોતાની ફિફ્ટી પૂરી કર્યા પછી ૫૦ રન બનાવીને આઉટ થયો હતો. ૯૦ રનના સ્કોર સુધીમાં, ટીમ ઈન્ડિયાએ મેચમાં પાંચ વિકેટ ગુમાવી દીધી હતી. રન રેટ વધારવાના દબાણ હેઠળ, ભારતે વિકેટ ગુમાવવાનું ચાલુ રાખ્યું, અને ઇનિંગ્સ ૧૮.૫ ઓવરમાં ૧૪૮ રનમાં સમેટાઈ ગઈ.
આયર્લેન્ડ માટે હમ્ફ્રીઝ, હોલાર્ડ અને મુંધ્રાએ બોલિંગમાં શાનદાર પ્રદર્શન કર્યું. કોઈપણ ફોર્મેટમાં ભારત સામે પહેલી જીત મેળવનાર આયર્લેન્ડે પ્રથમ ટી૨૦ મેચમાં તેના બોલરોએ મુખ્ય ભૂમિકા ભજવી હતી, જેમાં મેથ્યુ હમ્ફ્રીઝ અને મેથ્યુ હોલાર્ડે ત્રણ-ત્રણ વિકેટ લીધી હતી. વધુમાં, ભારતીય મૂળના આઇરિશ ખેલાડી જય મુંધ્રાએ, જે પોતાનું આંતરરાષ્ટ્રીય ક્રિકેટમાં પદાર્પણ કરી રહ્યા હતા, તેમણે પણ બોલિંગમાં શાનદાર પ્રદર્શન કર્યું હતું, બે મહત્વપૂર્ણ વિકેટ લીધી હતી. લિયામ મેકકાર્થી અને ગેરેથ ડેનાલીએ પણ એક-એક વિકેટ લીધી હતી. હવે બંને ટીમો વચ્ચે આ શ્રેણીની બીજી અને છેલ્લી મેચ ૨૮ જૂને બેલફાસ્ટના સ્ટેડિયમમાં રમાશે.
