Ahmedabad,તા.25
સરકારી નોકરીઓ માટે અરજી કરનારાઓ માટે સરકાર એક જ પોર્ટલ બનાવવાની યોજના પર કામ કરી રહી હતી. તેના માટે કાર્મિક રાજ્ય મંત્રી ડો. જિતેન્દ્ર સિંહની અધ્યક્ષતામાં બેઠક યોજાઈ. જેમાં આ વાત પર સહમતિ થઈ. તેમણે મિટિંગ બાદ ઘોષણા કરી કે સરકાર તમામ સરકારી ભરતીઓના એકીકૃત નોકરી અરજી પોર્ટલ વિકસિત કરવાની દિશામાં કામ કરી રહી છે.
આ પોર્ટલની મદદથી, સરકાર એવા લોકોને વધુ સુવિધા આપવા માંગે છે જેઓ નોકરી માટે વિવિધ પોર્ટલ પર માહિતી શોધતા રહે છે. આ પહેલ નોકરી શોધનારાઓની ઊર્જા અને સમય બચાવશે. આ નિર્ણય કર્મચારી અને તાલીમ વિભાગમાં યોજાયેલી ઉચ્ચ સ્તરીય બેઠકમાં લેવામાં આવ્યો છે.
આ બેઠક દરમિયાન, કેન્દ્રીય મંત્રી જિતેન્દ્ર સિંહે જણાવ્યું હતું કે ભરતી પ્રક્રિયાને વધુ સરળ અને પારદર્શક બનાવવી પડશે જેના માટે તેમણે ટેકનોલોજી અને નવીનતાઓ અપનાવવાની સરકારની પ્રતિબદ્ધતાનો પુનરોચ્ચાર કર્યો હતો.
આ આદેશ અંગે મંત્રાલય દ્વારા એક સત્તાવાર નિવેદન પણ જારી કરવામાં આવ્યું છે. આ નિવેદન મુજબ, ડો. જીતેન્દ્ર સિંહે વિભાગના અધિકારીઓને શક્ય તેટલી વહેલી તકે ‘સિંગલ જોબ એપ્લિકેશન પોર્ટલ’ વિકસાવવા નિર્દેશ આપ્યો છે. તેમણે જણાવ્યું કે આ યોજના પર કામ શરૂ થઈ ગયું છે. આ ટૂંક સમયમાં પૂર્ણ થશે. હિન્દી અને અંગ્રેજી ઉપરાંત, આ પોર્ટલ 13 પ્રાદેશિક ભાષાઓમાં શરૂ કરવામાં આવશે.
કેન્દ્રીય મંત્રી જિતેન્દ્ર સિંહે કહ્યું છે કે સરકારનો ઉદ્દેશ્ય બંધારણની આઠમી અનુસૂચિમાં 22 ભાષાઓમાં સમાવિષ્ટ તમામ પ્રાદેશિક ભાષાઓમાં પરીક્ષાઓ લેવાનો છે.ભરતી ભરતી પ્રક્રિયાનો સમયગાળો પહેલા લગભગ 15 મહિનાનો હતો, જે હવે ઘટાડીને 8 મહિના કરવામાં આવ્યો છે. આવનારા સમયમાં તેમાં વધુ ઘટાડો થશે.
