Rajkot, તા.12
રાજ્યમાં છેલ્લા એક સપ્તાહથી વરસાદ ચાલુ રહેતા કમોસમી વરસાદે અનેક જગ્યાએ નુકસાન સર્જ્યું છે. વેસ્ટર્ન ડિસ્ટર્બન્સ બાદ હવે સૌરાષ્ટ્રમાં સર્જાયેલી સિસ્ટમના કારણે કેટલાક જિલ્લાને વરસાદ તરબોળ કરી રહ્યો છે. કમોસમી વરસાદે બાગાયચી પાક અને ડાંગર મકાઇ, જુવારના પાકને નુકસાન સર્જ્યું છે.
હજું પણ આગામી 2 દિવસ ગુજરાતમાં વરસાદની આગાહી છે. હવામાન વિભાગના અનુમાન મુજબ કચ્છ, બનાસકાંઠા, પાટણ, મહેસાણા,અમદાવાદ, મોરબીમાં વરસાદની શક્યતા છે. સુરેન્દ્રનગર, જામનગર, સાબરકાંઠા,અરવલ્લી, ગાંધીનગર, રાજકોટમાં વરસાદનું પણ સામાન્ય વરસાદનું અનુમાન છે.
કડીમાં ભારે વરસાદથી રેલવે અંડરપાસ પાણીમાં ગરકાવ થઇ ગયો હતો. પાણી ભરાતા વાહનો ફસાયા હતા. સ્થાનિકો અને પ્રશાસનની મદદથી વાહનોનું રેસ્ક્યૂ કરાયું હતું. જેસીબી મશીનની મદદ લેવી પડી હતી, આ પાણીમાં સ્કોર્પિઓ ગરકાવ થઇ જતાં એક વ્યક્તિનું મૃત્યુ થયું છે.
ખેરાલુમાં મોડી સાંજે વાતાવરણમાં પલટા બાદ વરસાદ થયું હતું. ખેરાલુ શહેર અને તાલુકાના અલગ-અલગ વિસ્તારમાં વરસાદે જનજીવનને પ્રભાવિત કર્યું છે. સામાજિક પ્રસંગોમાં વરસાદ વિઘ્નરૂપ બન્યો હતો.
સૌરાષ્ટ્રમાં સતત ચોથા દિવસે રવિવારે સવારે છ વાગ્યાથી રાત્રિના દસ વાગ્યા સુધીમાં 26 તાલુકામાં માવઠું થયુ છે. દેવભૂમિ દ્વારકા, જુનાગઢ અને જામનગર જિલ્લામાં દોઢથી અઢી ઈંચ સુધીનો આફતનો વરસાદ ખાબક્યો છે.
કમોસમી વરસાદના કારણે રાજ્યમાં કેરીના પાકમાં 50 અને તલના પાકમાં 40 ટકાનું નુકસાન થયાનો અંદાજ છે. પપૈયામાં 20, કેળામાં 15 અને ડાંગરના પાકને 15 ટકા નુકસાન થયાનો પ્રાથમિક અંદાજ છે. વરસાદ બંધ થયા બાદ સર્વેની કામગીરી શરૂ કરાશે.
ખેરાલુ પંથકમાં માવઠાથી ખેડૂતોની ચિંતામાં વધારો થયો છે. અરવલ્લી જિલ્લામાં માવઠાથી ખેતરમાં પાણી ભરાઇ ગયાછે. ભિલોડા તાલુકામાં પણ કમોસમી વરસાદે ખેડૂતોની ચિંતા વધારી છે. શામળાજીમાં પણ ભારે પવન સાથે વરસાદ વસસ્યો. સાબરકાંઠાના પોશીનામાં ભારે પવન સાથે વરસાદ વરસ્યો હતો.
સૌરાષ્ટ્રમાં પણ ભારે પવન સાથે ધોધમાર વરસાદ વરસતાં ચોમાસા જેવો માહોલ સર્જાયો હતો. જૂનાગઢ, રાજકોટ, ધોરાજી, ઉપલેટામાં ભારે વરસાદે વિસ્તારોને જળમગ્ન કરી દીધા હતા. હજું પણ 2 દિવસ સૌરાષ્ટ્રમાં વરસાદનું અનુમાન છે.
