વિદ્યાર્થીઓના વિરોધ, મુદ્દો અને અન્ય પ્રશ્નો પર સરકાર-વિપક્ષ આમને-સામને; બંને ગૃહોમાં કાર્યવાહી ચાલી શકી નહીં
New Delhi,તા.૨૧
સંસદના ચોમાસુ સત્રના બીજા દિવસે પણ લોકસભા અને રાજ્યસભામાં ભારે હોબાળો જોવા મળ્યો હતો. વિપક્ષે વિદ્યાર્થીઓના વિરોધ પ્રદર્શન પર થયેલી પોલીસ કાર્યવાહી, દ્ગઈઈ્ પરીક્ષા વિવાદ સહિતના મુદ્દાઓને લઈને સરકાર સામે જોરદાર વિરોધ નોંધાવ્યો હતો.
સતત હંગામાને કારણે બંને ગૃહોમાં કોઈ મહત્વપૂર્ણ ધારાસભાકીય કામકાજ થઈ શક્યું નહીં અને અંતે લોકસભા તથા રાજ્યસભાની કાર્યવાહી બુધવાર, ૨૨ જુલાઈના રોજ સવારે ૧૧ વાગ્યા સુધી સ્થગિત કરવામાં આવી.
લોકસભાની કાર્યવાહી શરૂ થતાં જ વિપક્ષના સભ્યોએ વિવિધ મુદ્દાઓ પર ચર્ચાની માંગ સાથે સૂત્રોચ્ચાર શરૂ કર્યો હતો. ભારે હોબાળાને કારણે અધ્યક્ષે પ્રથમ કાર્યવાહી બપોરે ૧૨ વાગ્યા સુધી અને ત્યારબાદ ૨ વાગ્યા સુધી મુલતવી રાખી હતી. બપોરે ફરી બેઠક શરૂ થયા બાદ પણ સ્થિતિમાં કોઈ સુધારો ન થતાં આખા દિવસ માટે ગૃહની કાર્યવાહી સ્થગિત કરવાની ફરજ પડી હતી.
રાજ્યસભામાં પણ સમાન સ્થિતિ જોવા મળી હતી. કોંગ્રેસના અધ્યક્ષ અને રાજ્યસભામાં વિપક્ષના નેતા મલ્લિકાર્જુન ખડગેએ વિદ્યાર્થીઓ પર થયેલી પોલીસ કાર્યવાહીનો મુદ્દો ઉઠાવી સરકાર પાસેથી સ્પષ્ટતા માંગવાનો પ્રયાસ કર્યો હતો. જોકે, હોબાળાને કારણે રાજ્યસભામાં પણ કોઈ નિયમિત કાર્યવાહી થઈ શકી નહોતી.
સંસદની બહાર મીડિયા સાથે વાત કરતાં કોંગ્રેસના નેતા રાહુલ ગાંધીએ દેશની શિક્ષણ વ્યવસ્થા અંગે ચિંતા વ્યક્ત કરી હતી. તેમણે વિદ્યાર્થીઓની માંગણીઓને યોગ્ય ગણાવી અને કહ્યું કે પરીક્ષા પ્રણાલીમાં ઉભી થયેલી ખામીઓ અંગે સરકાર જવાબ આપે. તેમણે વડાપ્રધાન નરેન્દ્ર મોદી આ મુદ્દે મૌન કેમ છે તેવો સવાલ પણ ઉઠાવ્યો.
મલ્લિકાર્જુન ખડગેએ પણ સરકાર પર નિશાન સાધતાં જણાવ્યું કે વિપક્ષને સંસદમાં પોતાની વાત રજૂ કરવાની પૂરતી તક આપવામાં આવતી નથી. તેમણે વિદ્યાર્થીઓ પર થયેલી પોલીસ કાર્યવાહી અંગે ચર્ચા કરવાની માંગ પુનરાવર્તિત કરી અને કહ્યું કે સંવેદનશીલ મુદ્દાઓ પર સંસદમાં ખુલ્લી ચર્ચા થવી જરૂરી છે.
બીજી તરફ, સરકારનું કહેવું છે કે સંસદમાં મહત્વપૂર્ણ વિધેયકો અને જાહેર હિતના મુદ્દાઓ પર ચર્ચા થવી જોઈએ અને વિપક્ષે ગૃહનું કામકાજ અવરોધવાને બદલે ચર્ચામાં ભાગ લેવો જોઈએ. જોકે, દિવસભર ચાલેલા હોબાળાને કારણે કોઈપણ મહત્વપૂર્ણ ચર્ચા કે કાયદાકીય કાર્યવાહી આગળ વધી શકી નહોતી.
ચોમાસુ સત્રના પ્રથમ બે દિવસ સતત અવરોધોથી પ્રભાવિત રહ્યા છે. હવે બુધવારે બંને ગૃહોની બેઠક ફરી શરૂ થશે ત્યારે સરકાર અને વિપક્ષ વચ્ચે ચર્ચા માટે કોઈ સહમતિ બને છે કે ફરી હંગામો જોવા મળે છે, તેના પર સૌની નજર રહેશે.
