શાહી સ્નાન સાથે સિંહનો રોડ ક્રોસિંગનો વીડિયો થયો સોશિયલ મીડિયામાં વાયરલ
Amreli તા.
અમરેલી જિલ્લામાં વરસાદી માહોલ વચ્ચે જાફરાબાદ તાલુકાના હેમાળ ગામ નજીક રાજુલા-ઉના નેશનલ હાઈવે પર અચાનક સિંહ રોડ ક્રોસ કરતો જોવા મળ્યો હતો. સિંહના શાહી સ્નાન સાથે લટાર મારતો વીડિયો વાહનચાલકના મોબાઈલ કેમેરામાં કેદ થયો હતો. અને સોશિયલ મીડિયામાં વાયરલ થયો હતો. આ ઘટનાએ હાઈવે પરથી પસાર થતા વાહનચાલકોમાં ભારે કુતૂહલ સાથે સાવચેતીનો માહોલ સર્જ્યો છે.
અમરેલી જિલ્લામાં એશિયાટિક સિંહોની સંખ્યામાં સતત વધારો થતાં જંગલ વિસ્તાર સીમિત પડી રહ્યો છે. તેના પરિણામે હવે સિંહો જંગલની બહાર માનવ વસાહતો, ખેતી વિસ્તારો તેમજ હાઈવે માર્ગોની આસપાસ પણ વારંવાર જોવા મળી રહ્યા છે.
ચોમાસાના કારણે વરસાદી માહોલ વચ્ચે જાફરાબાદ તાલુકાના હેમાળ ગામ નજીક રાજુલા-ઉના નેશનલ હાઈવે પર એક સિંહ અચાનક રોડ પર આવી ચડ્યો હતો. અને નિર્ભય રીતે રોડ ક્રોસ કરતો જોવા મળ્યો હતો. આ સમગ્ર ઘટના ત્યાંથી પસાર થતા વાહનચાલકે પોતાના મોબાઈલમાં કેદ કરી હતી. ત્યારબાદ આ વીડિયો સોશિયલ મીડિયામાં ઝડપથી વાયરલ થયો છે.
વન્યજીવ જાણકારોના જણાવ્યા મુજબ પણ ચોમાસા દરમિયાન જંગલ વિસ્તારમાં પાણી ભરાઈ જવા તેમજ મચ્છર-માખીના ઉપદ્રવથી બચવા સિંહો ખુલ્લા અને ઊંચાણવાળા વિસ્તારો તેમજ રસ્તાઓ તરફ પણ આવી જતા હોય છે. જેના કારણે હાઈવે પર સિંહોની અવરજવર વધતી જોવા મળે છે.
વન વિભાગે વાહનચાલકોને અપીલ કરી છે કે હાઈવે પર સિંહ અથવા અન્ય વન્યપ્રાણી દેખાય તો વાહન ધીમું ચલાવવું, સુરક્ષિત અંતર જાળવવું, હોર્ન ન વગાડવો અને વન્યપ્રાણીઓને કોઈપણ પ્રકારની હેરાનગતિ ન પહોંચાડવી.
