Palanpur,તા.૧૩
બનાસકાંઠાના વાવ-થરાદ વિસ્તારના સવપુરાગામે ઠાકોર સમાજનું ભવ્ય મહાસંમેલન યોજાયું હતું. મોટી સંખ્યામાં સમાજના અગ્રણીઓ, યુવાનો, મહિલાઓ અને ગ્રામજનોએ ઉપસ્થિત રહી કાર્યક્રમને સફળ બનાવ્યો હતો. સમાજના વિકાસ, શિક્ષણ અને સંગઠનની દિશામાં આ મહાસંમેલનને મહત્વપૂર્ણ માનવામાં આવ્યું.
કાર્યક્રમમાં ગુજરાત વિધાનસભાના અધ્યક્ષ શંકર ચૌધરી અને રાજ્ય સરકારના મંત્રી સ્વરૂપજી ઠાકોર વિશેષ ઉપસ્થિત રહ્યા હતા. બંને મહાનુભાવોએ સમાજને શિક્ષણ, એકતા અને વિકાસના માર્ગે આગળ વધવા અપીલ કરી હતી. તેમણે યુવા પેઢીને શિક્ષણને પ્રાથમિકતા આપવા અને સમાજના ઉત્કર્ષમાં સક્રિય યોગદાન આપવા પ્રેરણા આપી હતી.
મહાસંમેલનમાં વક્તાઓએ સમાજના સર્વાંગી વિકાસ માટે શિક્ષણને સૌથી મોટું સાધન ગણાવ્યું હતું. ખાસ કરીને દીકરીઓના શિક્ષણ, સ્પર્ધાત્મક પરીક્ષાઓની તૈયારી, ઉચ્ચ શિક્ષણ અને કૌશલ્ય વિકાસ જેવા મુદ્દાઓ પર વિસ્તૃત માર્ગદર્શન આપવામાં આવ્યું હતું. સાથે જ સમાજમાં એકતા, સહકાર અને પરસ્પર સંવાદ જાળવવાની જરૂરિયાત પર પણ ભાર મૂકાયો હતો. મહાસંમેલનના અંતે સમાજના આગેવાનોએ એકતા જ સમાજની સૌથી મોટી તાકાત હોવાનું જણાવી સૌને સંગઠિત રહી શિક્ષણ અને વિકાસના માર્ગે આગળ વધવા અપીલ કરી હતી. કાર્યક્રમે ઠાકોર સમાજમાં જાગૃતિ, સંગઠન અને પ્રગતિનો મજબૂત સંદેશ આપ્યો હતો.
કાર્યક્રમ દરમિયાન વિવિધ ક્ષેત્રોમાં નોંધપાત્ર કામગીરી કરનાર જનપ્રતિનિધિઓ અને સમાજના આગેવાનોનું સન્માન કરવામાં આવ્યું હતું. ઉપરાંત સમાજના વિકાસ, યુવાનોના સશક્તિકરણ, શિક્ષણ, રોજગાર અને સામાજિક સુધારણા જેવા મુદ્દાઓ પર ચર્ચા અને વિચારવિમર્શ કરવામાં આવ્યો હતો.
