પોક્સો કોર્ટ માટે મહિલા વકીલોની અલગ પેનલ અને હાઇકોર્ટની માર્ગદર્શિકા મુજબ પારદર્શક પસંદગી કરવા તમામ જિલ્લા કલેક્ટરોને આદેશ
Rajkot,તા.28
રાજ્ય સરકાર દ્વારા તમામ જિલ્લાઓ ખાતે જિલ્લા પબ્લિક પ્રોસિક્યુટર અને એડિશનલ પબ્લિક પ્રોસિક્યુટરની નવી નિમણૂક માટેની પ્રક્રિયા ઝડપી બનાવવા મહત્વનો નિર્ણય લેવાયો છે. નવી જાહેરાત બહાર પાડી, ઇન્ટરવ્યૂ યોજીને યોગ્ય ઉમેદવારોની પેનલ તૈયાર કરવા માટે રાજ્યના તમામ જિલ્લા કલેક્ટર અને પ્રિન્સિપલ ડિસ્ટ્રિક્ટ જજને સ્પષ્ટ માર્ગદર્શક સૂચનાઓ સાથેનો પરિપત્ર જારી કરવામાં આવ્યો છે.
મળતી માહિતી મુજબ, પસંદગી પ્રક્રિયા દરમિયાન ગુજરાત હાઇકોર્ટના માર્ગદર્શિકાનું ચૂસ્તપણે પાલન કરવાનું રહેશે. ઉમેદવાર નિમણૂક યોગ્ય લાયકાત અને સ્વચ્છ ભૂતકાળ (ક્લીન રેકોર્ડ) ધરાવતા હોવા જોઈએ. તાલુકામાં સેશન્સ કોર્ટ હોય તે તાલુકાના બાર એસોસિએશનના વકીલો અને મહિલા વકીલોને પેનલમાં યોગ્ય પ્રતિનિધિત્વ આપવું ફરજિયાત છે. રાજ્યની ૫૪ સ્પેશિયલ પોક્સો કોર્ટમાં મહિલા પબ્લિક પ્રોસિક્યુટરની નિમણૂક માટે, દરેક કોર્ટની ૧ જગ્યા સામે ઓછામાં ઓછા ૩ મહિલા વકીલોની અલગ પેનલ બનાવીને મોકલવાની રહેશે. ઉમેદવારના ગુણપત્રક અને પસંદગી માટેના લેખિત અભિપ્રાય કારણો સરકારને મોકલવાના રહેશે. પસંદગી સમિતિમાં જિલ્લા કલેકટર અને ડિસ્ટ્રિક્ટ જજ ઉપસ્થિત રહેશે.સરકાર આ પ્રક્રિયા બિન-વિલંબે અને નિયત સમયમર્યાદામાં પૂર્ણ કરવા કડક આદેશ આપ્યા છે, સૂચના મળતાં જ નિશ્ચિત દિવસોમાં વર્તમાનપત્રમાં જાહેરાત આપવી. જાહેરાત પ્રસિદ્ધ થયાના ૭ થી ૧૫ દિવસની અંદર અરજીઓ મેળવવી.અરજીઓ સ્વીકારવાની છેલ્લી તારીખથી કામકાજના ૭ દિવસમાં સ્ક્રુટિની પૂર્ણ કરવી. ચકાસણી બાદ ૧૫ દિવસની અંદર ઇન્ટરવ્યૂની પ્રક્રિયા પૂર્ણ કરી પેનલ નક્કી કરવી.પેનલ નક્કી થયાના કામકાજના ૭ દિવસમાં સમગ્ર વિગતો અને અભિપ્રાયો સાથે રાજ્ય સરકારને રજૂ કરવાની રહેશે.
