Mumbai, તા. 30
નિતેશ તિવારીના નિર્દેશનમાં બનેલી બહુચર્ચિત અને બહુપ્રતિક્ષિત ફિલ્મ ‘રામાયણ’નું પહેલું ટ્રેલર આજ રોજ સવારે બ્રહ્મ મુહૂર્તમાં 4:15 વાગ્યે રિલીઝ કરવામાં આવ્યું છે. 4 મિનિટ અને 9 સેકન્ડનું આ ટ્રેલર પૌરાણિક કથા અને તેના વિશાળ સેટ્સની અદભુત ઝલક આપે છે.
આ મહાકાવ્ય આધારિત ફિલ્મ બે ભાગમાં સિનેમાઘરોમાં આવશે. પહેલો ભાગ આ વર્ષે દિવાળી (5 નવેમ્બર) ના રોજ રિલીઝ થશે, જ્યારે બીજો ભાગ દિવાળી 2027માં રજૂ કરવામાં આવશે.
ટ્રેલરની શરૂઆત સાઉથ સુપરસ્ટાર યશના દમદાર રાવણ અવતારથી થાય છે. ટ્રેલરમાં લંકા નગરી, પુષ્પક વિમાન અને રાવણના શક્તિશાળી વર્ચસ્વને ખૂબ જ ભવ્ય રીતે દર્શાવવામાં આવ્યું છે. ત્રણેય લોક પર રાજ કરવાનો દાવો કરતો રાવણનો ડાયલોગ અને તેનો સ્ક્રીન પરનો પ્રભાવશાળી લુક આ ટ્રેલરનું મુખ્ય આકર્ષણ બન્યો છે.
અધર્મનો નાશ કરવા અને સંતુલન જાળવવા માટે ભગવાન વિષ્ણુનાં રામ અવતાર તરીકે રણબીર કપૂરની આકર્ષક એન્ટ્રી થાય છે. તેની સાથે સાંઈ પલ્લવી સીતાનાં પાત્રમાં ખૂબ જ સરળ અને પ્રભાવશાળી દેખાઈ રહી છે.
ટ્રેલરમાં અયોધ્યા નગરી, રામ-સીતાના લગ્ન અને ત્યારબાદ કૈકેયીના નિર્ણયને કારણે મળેલાં વનવાસના દ્રશ્યો બતાવવામાં આવ્યાં છે. આ સિવાય રાજા દશરથના રોલમાં અરૂણ ગોવિલ, લક્ષ્મણ તરીકે રવિ દુબે, કૈકેયી તરીકે લારા દત્તા અને શૂર્પણખા તરીકે રકુલ પ્રીત સિંહ જોવા મળે છે.
આ ફિલ્મનું વિઝ્યુઅલ પ્રોડક્શન અને સંગીત આંતરરાષ્ટ્રીય સ્તરનું છે. ઓસ્કાર વિજેતા સંગીતકાર એ. આર. રહમાન અને હોલીવુડના મ્યુઝિક ડાયરેક્ટર હાન્સ ઝિમર દ્વારા તૈયાર કરવામાં આવેલું સંગીત દ્રશ્યોમાં પ્રાણ પૂરે છે. નમિત મલ્હોત્રા અને યશ દ્વારા નિર્મિત આ ફિલ્મે સોશિયલ મીડિયા પર રિલીઝ થતાની સાથે જ ચાહકોમાં મોટો ઉત્સાહ જગાડ્યો છે.
