Ahmedabad,તા.૫
અમદાવાદ શહેરના ચાંદખેડા વિસ્તારમાં આવેલા સેરેનીટી સ્પેસ સોસાયટીમાં એક જ્વેલરી અને કેશ ચોરીની મોટી ઘટના સામે આવી છે.
હેર સ્ટુડિયો સંચાલકના બંધ ફ્લેટને નિશાન બનાવીને ઘરમાં કામ કરતા નોકરે જ લાખોની ચોરીને અંજામ આપ્યો છે. પોલીસે આ મામલે ગુનો નોંધીને આરોપીઓની શોધખોળ હાથ ધરી છે.
ચાંદખેડામાં આવેલી સેરેનીટી સ્પેસ સોસાયટીમાં રહેતા અને હેર સ્ટુડિયો ચલાવતા સંચાલકના ઘરમાં લાખોની ચોરી થઈ છે. ઘરમાં કામકાજ માટે રાખવામાં આવેલા સુનિલ લીલારામ કલાસવા નામના ઘરઘાટીએ જ પોતાના બનેવી રાજુની સાથે મળીને આ હાથફેરો કર્યો હોવાનું સામે આવ્યું છે.
આરોપી સુનિલે ફ્લેટના કબાટનું લોકર તોડીને અંદર રાખેલી રોકડ તેમજ સોના-ચાંદીના કિંમતી દાગીનાની ચોરી કરી હતી. પ્રાપ્ત માહિતી અનુસાર, અંદાજે રૂ. ૧૫.૩૦ લાખની કિંમતના સોનાના ઘરેણાં, અંદાજે રૂ. ૫.૨૦ લાખની કિંમતના ચાંદીના દાગીના સહિત ૨૭.૫૦ લાખની ચોરી થઇ હતી.
ઘટના બાદ સોસાયટી અને આસપાસના વિસ્તારના ઝ્રઝ્ર્ફ ફૂટેજ તપાસવામાં આવતા ચોંકાવનારી વિગતો બહાર આવી હતી. ફૂટેજમાં આરોપી સુનિલ અને તેનો બનેવી રાજુ હાથમાં થેલીઓ લઈને શંકાસ્પદ હાલતમાં ફ્લેટમાંથી બહાર નીકળતા સ્પષ્ટ નજરે પડે છે.
ભોગ બનનાર દ્વારા ચાંદખેડા પોલીસ સ્ટેશનમાં ફરિયાદ નોંધાવવામાં આવી છે. પોલીસે સુનિલ લીલારામ કલાસવા અને તેના બનેવી રાજુ વિરુદ્ધ ગુનો નોંધીને કાયદેસરની કાર્યવાહી હાથ ધરી છે. ઝ્રઝ્ર્ફ ફૂટેજના આધારે નાસી છૂટેલા બંને આરોપીઓને ઝડપી પાડવા માટે પોલીસે ચક્રો ગતિમાન કર્યા છે અને શોધખોળ તેજ કરી છે.
