(નયના દવે દ્વારા) Jamnagarતા.૧૨
જામનગર જિલ્લાના મોટી ખાવડી ગામના ગોકુલ એવન્યુ ખાતે આવેલા રોઝલીના સ્પામાં દેહવ્યાપારની પ્રવૃત્તિ ચાલતી હોવાના ગુપ્ત ઈનપુટના આધારે મેઘપર (પડાણા) પોલીસે તપાસ હાથ ધરી હતી. જોકે, તપાસ દરમિયાન દેહવ્યાપારને લગતું કોઈ સાહિત્ય મળી આવ્યું નહોતું, પરંતુ સ્પાના રિસેપ્શન સેન્ટરના ટેબલ નીચેથી ભારતીય બનાવટની વિદેશી દારૂની ખુલ્લી બોટલ મળી આવતા પોલીસે સ્પાના મેનેજરને ઝડપી લીધો હતો.
પોલીસ ફરિયાદ મુજબ, પોલીસ મહાનિરીક્ષક (ઈન્ટેલિજન્સ), પોલીસ ભવન, ગાંધીનગર કચેરીના તા.૧૦ ઓગસ્ટના ગુપ્ત ઈનપુટના આધારે મેઘપર (પડાણા) પોલીસ સ્ટેશનના પોલીસ ઇન્સ્પેક્ટર એ.એલ. બારસીયાની સૂચનાથી પોલીસ ટીમ મોટી ખાવડી પહોંચી હતી. પંચોની હાજરીમાં ડમી ગ્રાહકને રોઝલીના સ્પામાં મોકલવામાં આવ્યો હતો, પરંતુ સ્પાના મેનેજરે આવી કોઈ માગણી નકારી કાઢી હતી. ત્યારબાદ પોલીસ દ્વારા પંચોની હાજરીમાં સાંજે સાડા પાંચ વાગ્યે સ્પામાં તપાસ કરવામાં આવી હતી.
તપાસ દરમિયાન રિસેપ્શન સેન્ટરના ટેબલ નીચેથી મેજિક મોમેન્ટ્સ ઓરેન્જ ફ્લેવર્ડ વોડકા લખેલી ૭૫૦ એમએલ ક્ષમતાની ખુલ્લી કાચની બોટલ મળી આવી હતી. તેમાં અંદાજે ૧૦૦ એમએલ જેટલો દારૂ હોવાનું જણાયું હતું. બોટલની કિંમત રૂ.૨૫૦ ગણવામાં આવી હતી અને એફએસએલ તપાસ માટે કબજે કરવામાં આવી હતી.
પોલીસે સ્થળ પરથી તરુણકુમાર કૌશીકભાઈ મિસ્ત્રી (સુથાર), ઉંમર ૩૯, વ્યવસાયે સ્પા મેનેજર, રહે. સરસ્વતી સોસાયટી, માર્કેટિંગ યાર્ડ, ગોધરા, પંચમહાલ, હાલ મોટી ખાવડી ખાતે હોવાનું જણાવી તેને પ્રોહિબિશન એક્ટની કલમ ૧૫(એ) મુજબ ગુનામાં અટક કરી કાયદેસરની કાર્યવાહી હાથ ધરી છે.
