New Delhi તા, 19
દિલ્હી પ્રીમિયર લીગમાં ઈસ્ટ દિલ્હી રાઈડર્સ અને ન્યૂ દિલ્હી ટાઈગર્સ વચ્ચે રમાયેલી મેચ દરમિયાન એક દુ:ખદ અકસ્માત સર્જાયો હતો. ન્યૂ દિલ્હી ટાઈગર્સની બેટિંગ દરમિયાન 18મી ઓવરમાં બેટ્સમેન લક્ષ્ય થારેજાએ મારેલો જોરદાર સ્ટ્રેટ ડ્રાઇવ શોટ સીધો ઓન-ફીલ્ડ અમ્પાયર ધર્મેશ ભારદ્વાજના ચહેરાનાં જમણાં ભાગ પર લાગ્યો હતો.
બોલની સ્પીડ એટલી વધારે હતી કે અમ્પાયરને ખસવાનો સમય જ મળ્યો નહોતો. અમ્પાયર તુરંત જ મેદાન પર ઢળી પડ્યા હતા, જેના પછી તબીબી ટીમે તાત્કાલિક મેદાન પર આવીને તેમને વધુ સારવાર માટે હોસ્પિટલનાં ICUમાં ભરતી કરાવ્યાં છે.
મેચમાં બનેલી આ કરૂણ અકસ્માતની ઘટના બાદ શોટ મારનાર ન્યૂ દિલ્હી ટાઈગર્સનો યુવા બેટ્સમેન લક્ષ્ય થારેજા અત્યંત ભાવુક અને દુ:ખી નજરે પડ્યો હતો. પોતાનાં શોટથી ઓન-ફીલ્ડ અમ્પાયર ધર્મેશ ભારદ્વાજને ગંભીર ઈજા પહોંચતાં અને તેઓ મેદાન પર જ ઢળી પડતાં બેટ્સમેન ખૂબ જ આઘાતમાં સરી પડ્યો હતો. ધર્મેશ ભારદ્વાજ સાથે આ જ સીઝનમાં આ બીજી વખત બોલ લાગવાની ઘટના બની છે.
