Rajkot,તા.૧૯
રાજકોટ સ્પેશિયલ ઓપરેશન ગ્રુપ દ્વારા રાજકોટ શહેરના ભક્તિનગર વિસ્તારમાં કેવડાવાડી મેઈન રોડ પર આવેલ વોલ્ગા ઘી ડેપો ખાતે રેઇડ કરીને ૫૦૦ કિલોથી વધુ શંકાસ્પદ ઘીનો જથ્થો ઝડપી પાડવામાં આવ્યો છે. બનાવ સંદર્ભે સ્પેશિયલ ઓપરેશન ગ્રુપની ટીમ દ્વારા ભક્તિનગર પોલીસ સ્ટેશન ખાતે સ્ટેશન ડાયરીમાં નોંધ પણ કરાવવામાં આવેલ છે. સાથે જ રાજકોટ મહાનગરપાલિકાના આરોગ્ય વિભાગ અંતર્ગત આવતા ફૂડ વિભાગ દ્વારા લુઝ ઘીના ૩ નમૂના, હોમમેડ કાઉ ઘી, ગૌશાળાનું શુદ્ધ દેશી ગાયનું ઘી, કામધેનું પ્રીમિયમ ઘી સહિતના ઘીના કુલ છ જેટલા નમૂના લેવામાં આવ્યા છે. તેમજ પરીક્ષણ અર્થે તમામ છ નમૂના ચકાસણી અર્થે લેબોરેટરી ખાતે મોકલવામાં આવ્યા છે.
વિગતે વાત કરીએ તો, રાજકોટ એસઓજીની ટીમને ચોક્કસ રાહેથી હકીકત મળી હતી કે, રાજકોટ કેવડાવાડી મેઈન રોડ પર વોલ્ગા ઘી ડેપો ખાતે કેવલ ચંદ્રાણી નામના વેપારી સોયાબીન ઓઇલ તથા વનસ્પતિ ઘી તથા દૂધની બનાવટનું નિયમ મિક્સ કરી ભેળસેળ વાળું ઘી બનાવી અલગ અલગ ડબાઓમાં પેક કરી ગ્રાહકોને વેચાણ કરી રહ્યા છે. આ માહિતીના આધારે એસઓજી દ્વારા રેઈડ કરવામાં આવી હતી.
એસઓજીની રેડમાં ડેપો ખાતેથી ૫૦૦ કિલોથી વધુ શંકાસ્પદ ઘીનો જથ્થો મળી આવ્યો છે. પોલીસ તપાસ દરમિયાન જામખંભાળિયાનું શુદ્ધ ભેંસનું વલોણાનું ઘી લખેલા સ્ટીકર તેમજ ગૌશાળાનું શુદ્ધ દેશી ગાયનું ઘી લખેલા અલગ અલગ કિંમત લખેલા સ્ટીકર તેમજ શંકાસ્પદ ઘીના જથ્થા સહિત ૨,૮૩,૯૭૬ રૂપિયાની કિંમતનો મુદ્દામાલ મળી આવ્યો છે. તપાસ દરમિયાન ડેપો ખાતે પ્રાઈઝ લિસ્ટ પણ મળી આવ્યું છે. જેમાં પ્રતિ લીટર ઘીનો ભાવ ૪૦૦ રૂપિયાથી લઈને ૧૭૯૯ રૂપિયા સુધીનું હોવાનું સામે આવ્યું છે.
પોલીસ સૂત્રોના જણાવ્યા અનુસાર સામાન્ય રીતે સસ્તાની લાલચમાં લોકોના સ્વાસ્થ્ય સાથે લેભાગુ તત્વો ચેડા કરતા હોય છે. પરંતુ વોલ્ગા ઘી ડેપો ખાતે મોંઘા ભાવના ઘીના વેચાણમાં ભેળસેળ યુક્ત ઘી નામાંકિત ગૌશાળા તેમજ શહેરના નામથી વેચવામાં આવતું હતું. ત્યારે પરિક્ષણ દરમિયાન ઘીના નમૂના સબ સ્ટાન્ડર્ડ જાહેર થાય છે કે કેમ તે જોવું રહ્યું.
