એમ.જે. એન્ટરપ્રાઇઝના ઓટોમેટેડ વ્હીકલ ટેસ્ટિંગ સેન્ટરમાં એ.સી.બી.નું લાંચ નું છટકું રૂ.૩૫૦૦ સ્વીકાર્યા, જેમાં રૂ.૨૧૨૦ લાંચની રકમ
(નયના દવે દ્વારા)
Jamnagar તા.૧ઃ
દેવભૂમિ દ્વારકા જિલ્લાના ખંભાળિયામાં ટ્રકનું ફિટનેસ (પાસિંગ) સર્ટિફિકેટ કાઢી આપવા માટે સરકારી ફી ઉપરાંત લાંચની માંગણી કરવામાં આવી હોવાની ફરિયાદના આધારે એ.સી.બી. દ્વારા આજે છટકું ગોઠવી બે શખ્સોને રૂ.૨૧૨૦ની લાંચની રકમ સાથે ઝડપી લેવામાં આવ્યા હતા.
પ્રાપ્ત વિગતો મુજબ, એક જાગૃત નાગરિકે પોતાના ટ્રકનું ફિટનેસ સર્ટિફિકેટ કઢાવવા માટે એમ.જે. એન્ટરપ્રાઇઝ ઓટોમેટેડ વ્હીકલ ટેસ્ટિંગ સેન્ટર, જામ ખંભાળિયાનો સંપર્ક કર્યો હતો. આ દરમિયાન આરોપી ખીમાભાઈ રાયસુરભાઈ ધારાણીએ ફિટનેસ સર્ટિફિકેટ માટેની રૂ.૧૫૦૦ની સરકારી ફી ઉપરાંત રૂ.૨૦૦૦ની લાંચની માંગણી કરી હતી. ફરિયાદી લાંચની રકમ આપવા માંગતા ન હોવાથી એ.સી.બી.નો સંપર્ક કર્યો હતો.
ફરિયાદના આધારે એ.સી.બી. દ્વારા આજે ખંભાળિયાના એમ.જે. એન્ટરપ્રાઇઝ ઓટોમેટેડ વ્હીકલ ટેસ્ટિંગ સેન્ટર ખાતે લાંચના છટકાનું આયોજન કરવામાં આવ્યું હતું. છટકા દરમિયાન આરોપી નં.૧એ ફરિયાદીને ફી સહિત કુલ રૂ.૩૫૦૦ આપવા જણાવ્યું હતું. ફરિયાદીએ રૂ.૩૫૦૦ આપતાં આરોપીએ તેમાંથી રૂ.૧૩૮૦ ફી પેટે રાખી બાકીની રૂ.૨૧૨૦ની રકમ લાંચ તરીકે સ્વીકારી હતી.
આ દરમિયાન એ.સી.બી.ની ટીમે કાર્યવાહી કરી આરોપી ખીમાભાઈ રાયસુરભાઈ ધારાણી, ઉંમર ૩૩ વર્ષ, એમ.જે. એન્ટરપ્રાઇઝ ફિટનેસ સેન્ટર, ખંભાળિયામાં મેન્યુઅલી વાહન ચેકિંગનું કામ કરતો તથા કુલદીપસિંહ મહિપતસિંહ વાઢેર, ઉંમર ૧૯ વર્ષ, લાઇન ઓપરેટર તરીકે ફરજ બજાવતો, બંનેને ઝડપી લીધા હતા. બંનેએ એકબીજાને મદદગારી કરી હોવાનું ફરિયાદમાં જણાવાયું છે.છટકા દરમિયાન લાંચની માંગણી કરાયેલી રૂ.૨૧૨૦ની રકમ તથા સ્વીકારાયેલી સમગ્ર રકમ એ.સી.બી. દ્વારા રિકવર કરવામાં આવી હતી.
આ કાર્યવાહી દેવભૂમિ દ્વારકા એ.સી.બી. પોલીસ સ્ટેશનના પોલીસ ઇન્સ્પેક્ટર શ્રી એસ.આઈ. મંધરાની આગેવાની હેઠળ જામનગર એ.સી.બી. સ્ટાફની મદદથી હાથ ધરવામાં આવી હતી.
