વડાપ્રધાન નરેન્દ્રભાઈ મોદીને ૨૫ વર્ષની અવિરત જનસેવા અને રાષ્ટ્ર સમર્પણ માટે ગુજરાતની જનતા જનાર્દન વતી અભિનંદન પાઠવતા Cm Bhupendra Patel

શ્રી નરેન્દ્રભાઈ મોદીએ રિફોર્મ, પરફોર્મ, ટ્રાન્સફોર્મના મંત્ર સાથે વિકાસની રાજનીતિ અને પોલિટિક્સ ઓફ પર્ફોર્મન્સનો નવો અધ્યાય શરૂ કર્યો: Cm Bhupendra Patel

Cm Bhupendra Patel પટેલે વડાપ્રધાન નરેન્દ્રભાઈ મોદીના જનસેવા અને રાષ્ટ્ર માટે સમર્પણના ૨૫ વર્ષ પૂર્ણ થવાના અવસરે તેમની અવિરત જનસેવા, રાષ્ટ્ર સમર્પણ અને નિર્ણાયક નેતૃત્વને બિરદાવતાં જણાવ્યું હતું કે, આ ૨૫ વર્ષ સંકલ્પથી સિદ્ધિ સુધીની યાત્રા છે, તેમાં સત્તા નહીં, સેવા અને રાષ્ટ્ર પ્રથમનો મંત્ર શાસનના કેન્દ્રમાં રહ્યો છે.

મુખ્યમંત્રીશ્રીએ ગાંધીનગરમાં  નાયબ મુખ્યમંત્રી શ્રી હર્ષ સંઘવી અને પ્રવકતા મંત્રી શ્રી જીતુ ભાઇ વાઘાણી સાથે પત્રકાર પરિષદને સંબોધતા વડાપ્રધાન શ્રી નરેન્દ્રભાઈ મોદીને ૨૫ વર્ષની અવિરત જનસેવા અને રાષ્ટ્ર સમર્પણ બદલ ગુજરાતની જનતા-જનાર્દન વતી હૃદયપૂર્વક અભિનંદન  પાઠવ્યા હતા.

તેમણે કહયું કે નાગરિક દેવો ભવનો ભાવ, જનકલ્યાણની ભાવના, સ્પષ્ટ વિઝન અને દૃઢ સંકલ્પ સાથે પડકારોને તકમાં પરિવર્તિત કરવાની વડાપ્રધાનશ્રીની કાર્યશૈલીએ ગુજરાત સહિત સમગ્ર દેશના વિકાસને આગવી દિશા આપી છે.

મુખ્યમંત્રીશ્રીએ ઉમેર્યું હતું કે, ૨૦૦૧ની ૭મી ઓક્ટોબરે શ્રી નરેન્દ્રભાઈ મોદીએ શાસન સેવા દાયિત્વ સંભાળ્યું ત્યારે પડકારોનો સામનો કરી રહેલા ગુજરાતમાં જ્યોતિગ્રામ યોજના દ્વારા ગામેગામ વીજળી, નર્મદા કેનાલ નેટવર્ક દ્વારા પાણીની સુવિધા અને ઇન્ફ્રાસ્ટ્રક્ચર વિકાસને વેગ મળ્યો. ૨૦૦૩માં શરૂ થયેલી વાઇબ્રન્ટ ગુજરાત ગ્લોબલ ઇન્વેસ્ટમેન્ટ સમિટે ગુજરાતને વૈશ્વિક રોકાણના નકશા પર આગવી ઓળખ અપાવી હોવાનું પણ મુખ્યમંત્રીશ્રીએ જણાવ્યું હતું.

મુખ્યમંત્રીશ્રીએ કહ્યું કે, શ્રી નરેન્દ્રભાઈ મોદીની વિઝનરી લીડરશીપમાં ગુજરાતની વિકાસયાત્રાની સફળતાને પગલે દેશવાસીઓએ પણ ૨૦૧૪માં તેમના નેતૃત્વને પ્રચંડ સમર્થન આપ્યું હતું. ૨૦૧૪ની લોકસભા ચૂંટણીઓમાં દેશનો વિશ્વાસ સંપાદિત કરીને તેઓ પ્રધાનસેવક તરીકે સેવારત રહ્યાં. એટલું જ નહિ, તેમણે વિકાસની રાજનીતિ-પોલિટિક્સ ઓફ પર્ફોર્મન્સની નવી કેડી કંડારી છે.

મુખ્યમંત્રીશ્રીએ કહ્યું કે, વડાપ્રધાનશ્રી માટે વિકાસ એટલે માત્ર રસ્તા, પુલ અને ઉદ્યોગોનું નિર્માણ નહીં, પરંતુ સમાજના છેવાડાના માનવીના જીવનમાં ગુણાત્મક પરિવર્તન લાવવું છે. તે જ વિકાસ ગરીબ કલ્યાણ મેળા, આવાસ, સ્વચ્છતા, ફાઈનાન્સિયલ ઈન્ક્લુઝન અને આરોગ્ય સુરક્ષા જેવી પહેલો દ્વારા સરકારી યોજનાઓના લાભો લાભાર્થીઓ સુધી સીધા પહોંચાડવાનો અભિગમ તેમણે અપનાવ્યો છે.

ખેડૂતોને દેશના વિકાસના ભાગીદાર બનાવવા – જેવી યોજનાઓ, પ્રાકૃતિક ખેતીને પ્રોત્સાહન અને મહિલાઓના સશક્તિકરણ માટે ઉજ્જવલા યોજના તથા મહિલાઓને નિર્ણય પ્રક્રિયામાં વધુ ભાગીદારીના પ્રયાસો સમાજના સર્વાંગી વિકાસની દિશામાં મહત્વપૂર્ણ બન્યા હોવાનું તેમણે ઉમેર્યુ હતું.

તેમણે જણાવ્યું હતું કે, ગુજરાતમાં સફળ થયેલી વિકાસલક્ષી અનેક પહેલોને રાષ્ટ્રીય સ્તરે વિસ્તૃત કરીને શ્રી નરેન્દ્રભાઈ મોદીએ જનકલ્યાણને નવી ઊંચાઈ આપી છે. માં અમૃતમથી આયુષ્માન ભારત, જ્યોતિગ્રામથી દીનદયાળ ઉપાધ્યાય ગ્રામ જ્યોતિ યોજના, નિર્મળ ગુજરાતથી સ્વચ્છ ભારત મિશન, જલમંદિરથી અમૃત સરોવર અને કન્યા કેળવણીથી બેટી બચાવો, બેટી પઢાવો ઉપરાંત ખેલ મહાકુંભથી ખેલો ઇન્ડિયા સુધીની યાત્રાએ રમતગમતને પણ નવી દિશા આપી હોવાનું જણાવ્યું હતું.

ગુજરાતમાં વડાપ્રધાનશ્રીના વિઝનથી સાકાર થઈ રહેલા મહત્વાકાંક્ષી પ્રોજેક્ટ્‌સનો ઉલ્લેખ કરતાં જણાવ્યું હતું કે, અમદાવાદ-ધોલેરા રેલ અને એક્સપ્રેસ-વે પ્રોજેક્ટ્‌સ, વેસ્ટર્ન ડેડિકેટેડ ફ્રેટ કોરિડોર, દાહોદનું રેલવે લોકોમોટિવ ઉત્પાદન એકમ, વડોદરામાં સંરક્ષણ ક્ષેત્રે વિમાન ઉત્પાદન,  સિટીમાં  અને ઇન્ડિયા ઇન્ટરનેશનલ બુલિયન એક્સચેન્જ જેવી પહેલો ગુજરાતના આર્થિક વિકાસને નવી ગતિ આપી રહી છે.

કચ્છના ખાવડામાં હાઇબ્રિડ રિન્યૂએબલ એનર્જી પાર્ક, ભાવનગરમાં  ટર્મિનલ અને સેમિકન્ડક્ટર ક્ષેત્રે ગુજરાતમાં થઈ રહેલા વિકાસથી રાજ્ય આધુનિક ટેકનોલોજી, સ્વચ્છ ઊર્જા અને ઉદ્યોગોના નવા કેન્દ્ર તરીકે ઊભરી રહ્યું છે. સેમિકન્ડક્ટર મિશન હેઠળ ૬ સેમિકન્ડક્ટર પ્રોજેક્ટ્‌સથી ગુજરાત સેમિકન્ડક્ટર હબ બનવાની દિશામાં આગળ વધુ છે.

મુખ્યમંત્રીશ્રીએ જણાવ્યું હતું કે, કોવિડ-૧૯ મહામારી દરમિયાન સ્વદેશી રસી વિકાસાવીને અન્ય દેશોને પણ પહોંચાડીને શ્રી મોદી સાહેબે વૈશ્વિક જવાબદારીનું ઉદાહરણ પૂરું પાડ્યું હતું. વસુધૈવ કુટુંબકમની ભાવના અને પર્યાવરણ સંરક્ષણ સાથે વિકાસના સંતુલનનો સંદેશ આપીને વિશ્વમંચ પર ભારતની આગવી ઓળખ શ્રી નરેન્દ્રભાઈ મોદીએ વધુ મજબૂત કરી છે.

તેમણે ઉમેર્યું હતું કે, વડાપ્રધાનશ્રીનું નેતૃત્વ દેશની યુવા શક્તિમાં આત્મવિશ્વાસ, નવીનતા અને કૌશલ્યનો સંચાર કરી રહ્યું છે. આત્મનિર્ભર ભારતના સંકલ્પ સાથે દેશ વૈશ્વિક સ્તરે નવી તકો ઊભી કરી રહ્યો છે અને વિકસિત ભારત-૨૦૪૭ના લક્ષ્ય તરફ આગળ વધી રહ્યો છે. સૌનો સાથ, સૌનો વિકાસ, સૌનો વિશ્વાસ અને સૌનો પ્રયાસના મંત્રથી વિકસિત ભારત-૨૦૪૭ના નિર્માણ માટેનો વડાપ્રધાનશ્રીનો સંકલ્પ વિકસિત ભારત માટે વિકસિત ગુજરાતનો સંકલ્પ બને તેવું આહવાન તેમણે કર્યું હતું.