(નયના દવે દ્વારા)
Jamnagar તા.૨૯ઃ
Jamnagar સ્થિત સૈનિક સ્કૂલ બાલાચડી ખાતે તા. ૨૮ ઓક્ટોબર, ૨૦૨૬ના રોજ ૬૩મી ઇન્ટર-હાઉસ વાર્ષિક એથ્લેટિક મીટ ૨૦૨૬-૨૭ ભારે ઉત્સાહ, પરંપરાગત ભવ્યતા અને જોશભર્યા વાતાવરણમાં સંપન્ન થઈ હતી. આ પ્રતિષ્ઠિત વાર્ષિક રમતગમત સ્પર્ધામાં કેડેટ્સે વિવિધ ટ્રેક અને ફિલ્ડ સ્પર્ધાઓમાં ઉત્સાહપૂર્વક ભાગ લીધો હતો અને પોતાની રમતગમતની કુશળતા, શિસ્ત, દૃઢ નિશ્ચય તથા ખેલદિલીનું ઉત્કૃષ્ટ પ્રદર્શન કર્યું હતું.
આ સમાપન સમારોહમાં એરફોર્સ સ્ટેશન, જામનગરના એર ઓફિસર કમાન્ડિંગ એર કોમોડોર શ્રેયાંશ કુમાર સિંઘ મુખ્ય અતિથિ તરીકે ઉપસ્થિત રહ્યા હતા. સૈનિક સ્કૂલ બાલાચડીના આચાર્ય, ગ્રુપ કેપ્ટન ઉજ્જવલ ઘોરમાડે દ્વારા તેમનું ઉષ્માભર્યું સ્વાગત કરવામાં આવ્યું હતું. તેમના આગમન પ્રસંગે મુખ્ય અતિથિને સ્કૂલ કેપ અર્પણ કરવામાં આવી હતી. ત્યારબાદ શાળાના સ્પોટ્ર્સ કેપ્ટન, કેડેટ આદિત્ય તોમરે સ્વાગત પ્રવચન આપ્યું હતું. સૈનિક સ્કૂલ બાલાચડીના ભૂતપૂર્વ વિદ્યાર્થી, ગ્રુપ કેપ્ટન જનમીત શર્મા આ સમારોહમાં વિશિષ્ટ અતિથિ તરીકે ઉપસ્થિત રહ્યા હતા.
આ સમારોહનું મુખ્ય આકર્ષણ વિવિધ સ્પર્ધાઓમાં શ્રેષ્ઠ પ્રદર્શન કરનારા કેડેટ્સને ઈનામો, ચંદ્રકો અને ટ્રોફી એનાયત કરવાનો કાર્યક્રમ રહ્યો હતો. સિનિયર કેટેગરીમાં આંગ્રે હાઉસ ચેમ્પિયન બન્યું હતું, જ્યારે સબ-જુનિયર કેટેગરીમાં શાસ્ત્રી હાઉસ વિજેતા બન્યું હતું. ટાગોર હાઉસના કેડેટ યુવરાજ જાડોન અને સરદાર પટેલ હાઉસના કેડેટ સૌરભ કુમારને અનુક્રમે સિનિયર અને જુનિયર કેટેગરીમાં શ્રેષ્ઠ એથ્લેટ જાહેર કરવામાં આવ્યા હતા.વોલીબોલ અને બાસ્કેટબોલમાં શ્રેષ્ઠ ખેલાડી તરીકે અનુક્રમે પ્રતાપ હાઉસના કેડેટ રુદ્ર ચૌધરી અને શિવાજી હાઉસના કેડેટ પ્રિયરાજ ચુડાસમાને તેમના અસાધારણ રમતગમતના પ્રદર્શન બદલ રામકૃષ્ણ રાવ મેમોરિયલ ટ્રોફી એનાયત કરવામાં આવી હતી.ગૌરવની વિશેષ ક્ષણ ત્યારે સર્જાઈ, જ્યારે શિવાજી હાઉસના કેડેટ જયરાજ પંવારનું સન્માન કરવામાં આવ્યું હતું. તેમણે હાઈ જમ્પ સ્પર્ધામાં ૧.૫૪ મીટરની ઊંચાઈ કૂદીને શાળાનો નવો વિક્રમ સ્થાપિત કર્યો હતો અને અગાઉનો ૧.૫૨ મીટરનો રેકોર્ડ તોડ્યો હતો. તેમની આ સિદ્ધિએ શાળાની રમતગમતની ઉપલબ્ધિઓમાં એક નવું સીમાચિહ્ન ઉમેર્યું હતું.ઉપસ્થિત જનમેદનીને સંબોધતાં મુખ્ય અતિથિએ વિજેતાઓ, સહભાગી કેડેટ્સ અને આયોજકોને આ રમતગમત સ્પર્ધાના સફળ આયોજન બદલ અભિનંદન પાઠવ્યાં હતાં. તેમણે સમગ્ર કાર્યક્રમ દરમિયાન કેડેટ્સ દ્વારા દર્શાવવામાં આવેલી ઉત્કૃષ્ટ ખેલદિલી, સ્પર્ધાત્મક ભાવના અને સમર્પણની પ્રશંસા કરી હતી. આ ઉપરાંત, શાળા પ્રત્યેની તેમની ઉત્કૃષ્ટ સેવા અને યોગદાન બદલ સાત ગ્રાઉન્ડ સ્ટાફના સભ્યોનું પણ સન્માન કર્યું હતું.
આ સમારોહમાં વિંગ કમાન્ડર કે. મારુતિ દેવી (નિવૃત્ત), સ્ક્વોડ્રન લીડર રાકેશ તિવારી ઉપાચાર્ય, શાળાના સ્ટાફ સભ્યો અને કેડેટ્સ ઉપસ્થિત રહ્યા હતા. કાર્યક્રમના અંતે સ્કૂલ કેપ્ટન, કેડેટ રુદ્ર ચૌધરીએ આભારવિધિ કરી હતી. તેમણે મુખ્ય અતિથિ, વિશિષ્ટ અતિથિ, શાળા વ્યવસ્થાપન, સ્ટાફગણ તથા આ વાર્ષિક રમતગમત સ્પર્ધાના સફળ આયોજનમાં યોગદાન આપનાર તમામનો આભાર વ્યક્ત કર્યો હતો.
