Bahucharaji,તા.૮
ગુજરાતના પ્રસિદ્ધ યાત્રાધામ બહુચરાજી મંદિરમાં ભક્તોની શ્રદ્ધાનો મોટો ખજાનો સામે આવ્યો છે. મંદિરની દાનપેટીઓની ગણતરી દરમિયાન માત્ર ૧૦ દિવસમાં રૂ. ૨.૨૫ કરોડથી વધુનું દાન મળતાં મંદિર તંત્ર અને વહીવટી તંત્ર પણ આશ્ચર્યચકિત થઈ ગયું છે.
મંદિરમાં ભક્તો જ્યારે માતાજીનાં દર્શન કરવા પહોંચે છે ત્યારે પોતાની શ્રદ્ધા અને આસ્થા પ્રમાણે દાન પણ અર્પણ કરતા હોય છે. પરંતુ ગુજરાતના પ્રસિદ્ધ યાત્રાધામ બહુચરાજી મંદિરમાં ભક્તોની આ શ્રદ્ધાનું એક મોટું ઉદાહરણ સામે આવ્યું છે. મંદિરની દાનપેટીઓ ખોલીને ગણતરી શરૂ કરવામાં આવી ત્યારે દાનની રકમ કરોડોમાં પહોંચી ગઈ હતી. ગણતરીના આંકડા સામે આવતાં જ મંદિરને મળેલા દાનની ચર્ચા શરૂ થઈ છે. બહુચરાજી મંદિરને મળેલા દાનનો આંકડો રૂ. ૨.૨૫ કરોડને પાર કરી ગયો છે.
મળતી માહિતી મુજબ, બહુચરાજી મંદિરની દાનપેટીઓમાં છેલ્લા અઢી વર્ષ દરમિયાન ભક્તો દ્વારા અર્પણ કરવામાં આવેલી રકમની ગણતરી કરવામાં આવી રહી છે. લાંબા સમયથી દાનપેટીઓમાં એકત્ર થયેલી રોકડ રકમની ગણતરી માટે ખાસ વ્યવસ્થા કરવામાં આવી છે. આ પ્રક્રિયા દરમિયાન માત્ર ૧૦ દિવસની ગણતરીમાં જ દાનપેટીઓમાંથી રૂ. ૨.૨૫ કરોડથી વધુની રકમ મળી આવી છે. આ આંકડો સામે આવતાં મંદિરને મળતી ભક્તોની શ્રદ્ધા અને આસ્થાનો અંદાજ પણ લગાવી શકાય છે.
દાનની ગણતરીની કામગીરી પારદર્શક રીતે થાય તે માટે વહીવટી તંત્રના અધિકારીઓને પણ સાથે રાખવામાં આવ્યા છે. આ સમગ્ર પ્રક્રિયામાં કલેક્ટર, મામલતદાર સહિતના કર્મચારીઓની હાજરીમાં દાનની રકમ ગણવામાં આવી રહી છે. મોટી સંખ્યામાં એકત્ર થયેલી રોકડ રકમની ગણતરી કરવામાં સમય લાગી રહ્યો છે. તેથી ગણતરીની કામગીરી સતત ચાલુ રાખવામાં આવી છે.
મહત્ત્વની વાત એ છે કે હાલની ગણતરીમાં મળેલી રૂ. ૨.૨૫ કરોડથી વધુની રકમ અંતિમ આંકડો નથી. કારણ કે અઢી વર્ષ દરમિયાન એકત્ર થયેલા દાનની ગણતરી હજુ પૂર્ણ થઈ નથી. દિવાળીના તહેવાર બાદ પણ દાનપેટીઓમાંથી મળેલી રોકડ રકમની ગણતરી ચાલુ રાખવામાં આવશે. એટલે આગામી દિવસોમાં દાનની કુલ રકમમાં વધુ વધારો થવાની શક્યતા છે.
બહુચરાજી મંદિર ગુજરાતનાં મહત્ત્વનાં ધાર્મિક યાત્રાધામોમાં સ્થાન ધરાવે છે. અહીં વર્ષ દરમિયાન મોટી સંખ્યામાં શ્રદ્ધાળુઓ માતાજીનાં દર્શન કરવા આવે છે. ભક્તો પોતાની માનતા, આસ્થા અને શ્રદ્ધા પ્રમાણે માતાજીના ચરણોમાં દાન અર્પણ કરે છે. છેલ્લા અઢી વર્ષ દરમિયાન એકત્ર થયેલી દાનની રકમની ગણતરીમાં અત્યાર સુધી સામે આવેલા આંકડાએ મંદિર પ્રત્યે ભક્તોની અતૂટ શ્રદ્ધા દર્શાવી છે. હાલમાં દાનની ગણતરીની કામગીરી ચાલુ હોવાથી અંતિમ આંકડો જાણવા માટે હજુ રાહ જોવી પડશે. દિવાળી બાદ બાકી રહેલી રોકડ રકમની ગણતરી પૂર્ણ થયા પછી જ મંદિરને છેલ્લા અઢી વર્ષમાં કુલ કેટલું દાન મળ્યું છે તેની સંપૂર્ણ વિગતો સામે આવશે.
