Washington, તા.૯
અમેરિકાની મધ્યસત્રની ચૂંટણીમાં રિપબ્લિકન પાર્ટીને મળેલા પરાજય બાદ પ્રમુખ ડોનાલ્ડ ટ્રમ્પે ઇમિગ્રેશન નીતિ અંગે પોતાના વલણમાં ફેરફારના સંકેત આપ્યા છે. ટ્રમ્પે સ્વીકાર્યું છે કે તેમની સરકારની દેશનિકાલ નીતિ કદાચ જરૂર કરતાં વધુ કડક હતી. સાથે જ તેમણે ડેમોક્રેટ્સ સાથે ઇમિગ્રેશનના મુદ્દે સમજૂતી કરવાની તૈયારી પણ દર્શાવી છે.
સીબીએસના જાણીતા કાર્યક્રમ ’૬૦ મિનિટ્સ’ને આપેલા ઇન્ટરવ્યૂમાં ટ્રમ્પે જણાવ્યું હતું કે રિપબ્લિકન પાર્ટીની ચૂંટણીમાં થયેલી હાર પાછળ દેશનિકાલની કડક નીતિ પણ એક કારણ હોઈ શકે છે. તેમણે કહ્યું કે આ નીતિ કદાચ વધુ પડતી કડક હતી. જોકે, ડેમોક્રેટ્સ સાથે કઈ રીતે સમજૂતી કરવામાં આવશે તે અંગે તેમણે કોઈ સ્પષ્ટ વિગતો આપી નહોતી.
ટ્રમ્પે ગેરકાયદે રીતે અમેરિકામાં રહેતા હત્યારાઓ અને ડ્રગ્સના વેપારીઓને દેશમાંથી બહાર કાઢવાની નીતિનું સમર્થન કર્યું હતું. જોકે, તેમણે એવા ઇમિગ્રન્ટ્સને અમેરિકામાં રહેવાની છૂટ આપવાની શક્યતા પણ વ્યક્ત કરી હતી, જેઓ સારી રીતે કામ કરે છે, હોટેલ, લેન્ડસ્કેપિંગ સહિતના વ્યવસાયોમાં રોજગારી આપે છે અથવા કરે છે અને કરવેરો પણ ભરે છે.
ટ્રમ્પના નિવેદન વચ્ચે તેમની સરકારની કડક ઇમિગ્રેશન નીતિના મુખ્ય ઘડવૈયા સ્ટીફન મિલરને વ્હાઇટ હાઉસના ચીફ ઓફ સ્ટાફ તરીકે નિયુક્ત કરવામાં આવ્યા છે. આ નિમણૂકને લઈને ડેમોક્રેટિક નેતા ચક શૂમરે ટ્રમ્પ પર નિશાન સાધ્યું હતું. તેમણે સોશિયલ મીડિયા પર ટિપ્પણી કરતાં કહ્યું કે એક તરફ ટ્રમ્પ ઇમિગ્રેશન કાર્યવાહી વધુ પડતી કડક હોવાની વાત કરે છે, તો બીજી તરફ એ જ નીતિના જવાબદાર વ્યક્તિને પ્રમોશન આપે છે.
ટ્રમ્પના બીજા કાર્યકાળ દરમિયાન ઇમિગ્રેશન વિરોધી કાર્યવાહી સરકારની મુખ્ય પ્રાથમિકતાઓમાં રહી છે. અમેરિકાનાં અનેક શહેરોમાં ફેડરલ એજન્સીઓ દ્વારા દરોડા અને ધરપકડની કાર્યવાહી કરવામાં આવી હતી. આ કાર્યવાહીના વિરોધમાં થયેલા પ્રદર્શનો દરમિયાન ફેડરલ અધિકારીઓની ગોળીબારમાં બે અમેરિકન નાગરિકો રેની ગુડ અને એલેક્સ પ્રેટી માર્યા ગયા હતા. નવા કોંગ્રેસમાં ડેમોક્રેટ્સે ઇમિગ્રેશન એન્ડ કસ્ટમ્સ એન્ફોર્સમેન્ટ (ૈંઝ્રઈ) અને ડિપાર્ટમેન્ટ ઓફ હોમલેન્ડ સિક્યુરિટી (ડ્ઢૐજી)ની કામગીરી પર દેખરેખ વધારવાની વાત કરી છે. ઇન્ટરવ્યૂ દરમિયાન ટ્રમ્પે વર્ષ ૨૦૨૮ની પ્રમુખપદની ચૂંટણી અંગે પણ પોતાનો અભિપ્રાય વ્યક્ત કર્યો હતો. રિપબ્લિકન પાર્ટીમાં તેમના સંભવિત ઉત્તરાધિકારી અંગે પૂછવામાં આવતાં તેમણે ઉપપ્રમુખ જેડી વાન્સ ઉપરાંત વિદેશ મંત્રી માર્કો રુબિયોના નામનો ઉલ્લેખ કર્યો હતો. ટ્રમ્પે રુબિયોના વખાણ કરતાં તેમને શાનદાર ગણાવ્યા હતા. જોકે, તેમણે સ્પષ્ટ કર્યું હતું કે તેઓ ૨૦૨૮ની ચૂંટણીમાં કોઈ ઉમેદવારને સમર્થન આપશે કે નહીં તે અંગે હજુ નિર્ણય લીધો નથી. ચૂંટણીથી દૂર રહેવું પણ તેમના માટે એક વિકલ્પ હોઈ શકે છે.
