જૂનાગઢમાં ધાડના ઇરાદે કાર લઈ નીકળેલા 5 શખ્સોને વાંકાનેર ચોકડી પાસે પિસ્તોલ, છરી, ધોકા સાથે ઝડપ્યા’તા
(હરપાલસિહ)
Rajkot,તા.૧૯
Rajkot,તા.૧૯
આંગણીયા પેઢીમાં ધાડ પાડવા નીકળેલા ટોળકીને કુવાડવા નજીકથી પોલીસે હથિયાર સાથે ઝડપી લેવાના ગુનામાં જેલ હવાલે રહેલા ત્રણ આરોપીની જામીન અરજી અદાલતે ફગાવી દીધી છે. વધુ વિગત મુજબ જુનાગઢ ખાતે આંગણીયા પેઢીમાં ધાડ પાડવાના ઇરાદે કાર લઈ નીકળેલા પાંચ શખ્સોને કુવાડવા પાસે વાંકાનેર ચોકડી પાસેથી દેશી બનાવટની પીસ્તોલ, છરી, બેઝબોલના ધોકા, એલ્યુમિનિયમની સ્ટિક, તથા સ્ક્રુ ડ્રાઇવર વાળા હથિયારો સાથે પોલીસે ઝડપી લીધા હતા. આ અંગે કુવાડવા પોલીસ સ્ટેશનમાં ગુનો નોંધી જેલ હવાલે કર્યા હતા. જેલ હવાલે રહેલ આરોપીઓ પૈકી મહમદ સાહબાજ શેખ, સંજય સૂર્યનારાયણસિંગ રાજપુત અને જાકીર અલી લિયાકતઅલી કુરેશી (રહે ઉત્તર પ્રદેશ)એ જેલમાંથી જામીન ઉપર છૂટવા માટે સેશન્સ કોર્ટમાં રેગ્યુલર જામીન અરજી દાખલ કરી હતી. જે જામીન અરજી ચાલવા ઉપર આવતા સરકાર તરફે સરકારી વકીલ હાજર રહેલ અને જામીન અરજીનો વિરોધ કરતા રજૂઆત કરેલ કે આરોપીઓ હથિયારો ધારણ કરી ધાડ પાડવા નીકળેલા હોય આવા ગંભીર ગુનામાં આરોપીઓને જામીન આપવા જોઈએ નહીં જો તેને જામીન આપવામાં આવશે તો તેઓને કાયદાનો કોઈ ડર રહેશે નહીં અને ફરી પાછા આવા ગુના આચરશે તેમજ તેઓ અન્ય રાજ્યના હોય કોર્ટ મુદ્દેતે હાજર રહેશે નહીં અને કેસ ચાલવામાં વિલંબ થશે તેવી રજૂઆત કરેલ હતી. જે રજૂઆતો ગ્રાહ્ય રાખી સેશન્સ જજ પી. જે. કાયસ્થે ત્રણેય આરોપીની રેગ્યુલર જામીન અરજી રદ કરી છે.આ કામમાં સરકાર તરફે સરકારી વકીલ મુકેશભાઈ પીપળીયા રોકાયા હતા

