Rajkot, તા.20
છેલ્લા બે દિવસથી રાજયમાં ઉતર-પૂર્વનાં પવનો શરૂ થતા સવાર-સાંજ ઠંડીનો સામાન્ય ચમકારો અનુભવાઇ રહ્યો છે. ત્યારે ર4 કલાક દરમ્યાન ફરી ઠેર ઠેર 2 થી 3 ડિગ્રી તાપમાન ઘટતા આજે સવારે શિયાળાનો અહેસાસ થયો હતો અને 10 શહેરમાં 18 થી 14 ડિગ્રી સુધીનું લઘુતમ તાપમાન નોંધાયુ હતું.
આજે 14 ડિગ્રી સાથે સૌથી વધુ ઠંડી નલિયા અને વડોદરા ખાતે નોંધાઇ હતી. તેમજ રાજકોટમાં 16.8 ડિગ્રી , ગાંધીનગરમાં 17.2, અમદાવાદમાં 18.2, અમરેલીમાં 18.2, ભુજમાં 18.2, દમણમાં 16.6, ડિસામાં 15.5, દિવમાં 17, કંડલામાં 19.6 અને પોરબંદરમાં 19 ડિગ્રી લઘુતમ તાપમાન નોંધાયુ હતું.
જયારે જામનગર તારીખ જામનગર શહેરમાં દિવાળી પછી પણ ઠંડીનો પ્રારંભ થયો ન હતો તેમાં ગઈકાલે એકાએક વાતાવરણમાં પલટો આવ્યા પછી લઘુતમ તાપમાન નો પારો 20 ડિગ્રીએ પહોંચ્યો હતો જેને લઈનેગુલાબી ઠંડી નો અહેસાન આજે સવારથી જ થવા લાગ્યો હતો અને શહેરીજનોએ આજે સવારે પાર્ક સહિતના વિવિધ વિસ્તારમાં મોર્નિંગ કરતા શહેરીજનોમાં આનંદની લાગણી છવાઈ હતી.
આમ લાંબા સમય સુધી શિયાળાની રાહ જોયા બાદ આજે પ્રથમવાર ઠંડીનો ચમકારો જોવા મળ્યો હતો અને જેની અસર જનજીવન ઉપર જોવા પણ મળી હતી આમ જામનગરમાં આજે લઘુતમ તાપમાનનો પારો 20 ડિગ્રી નોંધાયો હતો.
જ્યારે મહત્તમ તાપમાન 33 ડિગ્રી રહ્યું હતું જ્યારે વાતાવરણમાં ભેજનું પ્રમાણ 62 ટકા નોંધાયું છે તો પવનની ગતિ પ્રતિ કલાક 5.4 કિલોમીટર રહી છે. આમ કારતક માસની અગિયારસથી જ આજે ઠંડી નો ચમકારો પ્રથમવાર અનુભવાયો હતો.

