સ્વસ્થ થતાં જ માતાના ખોળા સમાન જંગલમાં પરિવાર સાથે કરાવાયું સુખદ પુનઃમિલન
(મિલાપ રૂપારેલ દ્વારા)
Amreli તા.૧૭ઃ
અમરેલી જિલ્લાના ખાંભા પંથકમાંથી વન્યજીવ પ્રેમીઓના હૃદયને સ્પર્શી જાય તેવા સમાચાર સામે આવ્યા છે. આશરે બે મહિના પહેલાં ખાંભા તાલુકાના ધૂંધવાણા ગામની એક વાડીમાંથી જીવનની આશા લગભગ ગુમાવી ચૂકેલી હાલતમાં રેસ્ક્યુ કરાયેલા બે વર્ષના સિંહબાળને વન વિભાગની સતત સારવાર અને કાળજીથી નવજીવન મળ્યું છે. સિંહબાળ ફરીથી હરીફરી શકવા અને સ્વસ્થ જીવન જીવવા સક્ષમ બનેલા આ સિંહબાળને નવરાત્રિના પાવન પ્રસંગે તેની માતા સાથે પુનઃમિલન કરાવવામાં આવ્યું છે. બે મહિનાની સારવાર, સંભાળ અને સંઘર્ષ બાદ માતાના સાનિધ્યમાં પરત ફરેલા સિંહબાળની આ કહાની માત્ર વન વિભાગની કામગીરીની સફળતા નથી, પરંતુ માતાની મમતા અને વન્યજીવ સંરક્ષણના માનવીય અભિગમનું હૃદયસ્પર્શી ઉદાહરણ બની છે.
પ્રાપ્ત વિગતો મુજબ, ખાંભા તાલુકાના ધૂંધવાણા ગામની એક વાડીમાં આશરે બે વર્ષનું સિંહબાળ અત્યંત નબળી હાલતમાં મળી આવ્યું હતું. તેની સ્થિતિ એવી હતી કે તે પોતાના પગ પર ચાલી પણ શકે તેમ ન હતું. જંગલમાં સ્વતંત્ર રીતે જીવન જીવતા વનરાજના પરિવારના આ નાનકડા સભ્યની આવી હાલત જોઈ વન વિભાગે તાત્કાલિક રેસ્ક્યુ કામગીરી હાથ ધરી હતી.
આ સમયે વન વિભાગના કર્મચારીઓ સાથે ગ્રામ જનોએ પણ માનવતાભર્યો સહયોગ આપ્યો હતો. પિંજરું જાતે ઊંચકી અને મુશ્કેલ પરિસ્થિતિમાં પણ સ્થળ સુધી પહોંચાડવામાં આવ્યું હતું અને સિંહબાળને સુરક્ષિત રીતે બહાર કાઢવામાં આવ્યું હતું.
રેસ્ક્યુ બાદ સિંહબાળને સારવાર માટે આંબરડી એનિમલ કેર સેન્ટર ખાતે ખસેડવામાં આવ્યું હતું. અહીં પશુચિકિત્સકો અને સંભાળ રાખતા કર્મચારીઓએ તેની સારવારમાં કોઈ કચાશ રાખી નહોતી. સતત દેખરેખ, સારવાર અને કાળજીના પરિણામે ધીમે ધીમે સિંહબાળની તબિયતમાં સુધારો થવા લાગ્યો હતો. જે સિંહબાળ એક સમયે ચાલી પણ શકતું નહોતું, તે બે મહિનાની સારવાર બાદ ફરીથી સ્વસ્થ બન્યું હતું.
આ સમયગાળા દરમિયાન સિંહબાળને સ્વસ્થ બનાવી ફરી કુદરતી વાતાવરણમાં પરત મોકલવાની આશા સાથે વન વિભાગ દ્વારા સતત પ્રયાસો કરવામાં આવ્યા હતા. સિંહબાળની તબિયતમાં સુધારો થતાં તેને પોતાના પરિવાર સાથે ફરી જોડવાની કામગીરી હાથ ધરવામાં આવી હતી.
ગીર પૂર્વ વન વિભાગની તુલસીશ્યામ (ખાંભા) રેન્જ હેઠળના કોઠારિયા રાઉન્ડના ધૂંધવાણા રેવન્યુ વિસ્તારમાંથી રેસ્ક્યુ કરાયેલા આ સિંહબાળને આખરે તેની માતા સાથે પુનઃમિલન કરાવવામાં સફળતા મળી છે. તુલસીશ્યામ રેન્જ અને ખાંભા વન વિભાગના સંકલિત પ્રયાસોથી બે મહિનાની સારવાર બાદ સિંહબાળને તેના પરિવાર સુધી પરત પહોંચાડવાની કામગીરી સફળતાપૂર્વક પૂર્ણ થઈ છે.
પાવન પ્રસંગે માતા અને સિંહબાળનું આ મિલન પ્રકૃતિપ્રેમીઓ માટે આનંદ અને લાગણીનો વિષય બન્યું છે. બે મહિના પહેલાં જીવન માટે સંઘર્ષ કરી રહેલું સિંહબાળ આજે ફરી પોતાની માતા અને પરિવારના સાનિધ્યમાં પહોંચ્યું છે. વન વિભાગના કર્મચારીઓની કર્તવ્યનિષ્ઠા, પશુચિકિત્સકોની સારવાર અને ગ્રામજનોના સહયોગથી શક્ય બનેલી આ કામગીરીએ વન્યજીવ સંરક્ષણની સાચી ભાવનાને ઉજાગર કરી છે.
જંગલના રાજા સિંહના પરિવારના આ નાનકડા સભ્યને નવજીવન મળવાની આ ઘટના સાબિત કરે છે કે વન્ય જીવોના સંરક્ષણ માટે સમયસરની મદદ, સતત સારવાર અને સંવેદનશીલ અભિગમ કેટલો મહત્ત્વનો છે. નવરાત્રિના પાવન પર્વે માતાની મમતા સાથે ફરી જોડાયેલા સિંહબાળની આ કહાની માનવતા અને પ્રકૃતિ વચ્ચેના અતૂટ સંબંધની યાદ અપાવે છે
