Mumbai,તા.24
સંજુ સેમસનની તોફાની સદી બાદ, ચેન્નાઈ સુપર કિંગ્સે અકીલ હોસેનના નેતૃત્વ હેઠળના બોલરોના ઘાતક પ્રદર્શનના આધારે મુંબઈ ઈન્ડિયન્સને 103 રનથી હરાવ્યું. ગુરુવારે વાનખેડે ખાતે રમાયેલી મેચમાં ટોસ હારીને પ્રથમ બેટિંગ કરવા આવેલા ચેન્નાઈએ 20 ઓવરમાં છ વિકેટે 207 રન બનાવ્યા. જવાબમાં, મુંબઈની ટીમ 19 ઓવરમાં માત્ર 104 રન જ બનાવી શકી અને ઓલઆઉટ થઈ ગઈ.
ચેન્નઈ IPLમાં મુંબઈ ઈન્ડિયન્સ સામે સૌથી વધુ જીત મેળવનારી ટીમ બની ગઈ છે. બંને ટીમો વચ્ચે રમાયેલી 40 મેચમાં ચેન્નઈનો આ 19મો વિજય છે. પંજાબ કિંગ્સ આ યાદીમાં બીજા ક્રમે છે, જેણે મુંબઈ ઈન્ડિયન્સ સામે 18 વખત જીત મેળવી છે. દિલ્હી કેપિટલ્સ (17), RCB (16) અને રાજસ્થાન રોયલ્સ (15) અનુક્રમે ત્રીજા, ચોથા અને પાંચમા ક્રમે છે.
આ IPL માં મુંબઈ ઈન્ડિયન્સ સામે ચેન્નઈનો સૌથી મોટો વિજય પણ છે, રન માર્જિન અને એકંદર બંને રીતે. અગાઉ, ટીમે 2015માં ચેપોક ખાતે કિંગ્સ XI પંજાબ (હવે પંજાબ કિંગ્સ) ને 97 રનથી હરાવ્યું હતું. આ મુંબઈ ઈન્ડિયન્સનો રન માર્જિનથી સૌથી મોટો પરાજય છે.
અગાઉ, ટીમ 2013માં રાજસ્થાન રોયલ્સ સામે 87 રનથી હારી ગઈ હતી. વાનખેડે સ્ટેડિયમમાં પણ આ મુંબઈનો સૌથી મોટો પરાજય છે. અગાઉ, મુંબઈ આ મેદાન પર RCB સામે 39 રનથી હારી ગયું હતું.
આ મેચ પછી પોઈન્ટ ટેબલમાં મોટો ફેરફાર થયો છે. ચેન્નાઈની ટીમ પાંચમા સ્થાને પહોંચી ગઈ છે. સાતમાંથી ત્રણ મેચ જીતીને ચેન્નાઈના ખાતામાં છ પોઈન્ટ થયા છે અને તેનો નેટ રન રેટ +0.118 થઈ ગયો છે. તે જ સમયે, મુંબઈની ટીમ આઠમા સ્થાને છે. સાતમાંથી પાંચ મેચ હારીને મુંબઈનો નેટ રન રેટ -0.736 છે. પંજાબ કિંગ્સ ટોચ પર છે.
208 રનના લક્ષ્યનો પીછો કરવા ઉતરેલી મુંબઈ ઈન્ડિયન્સની શરૂઆત ખરાબ રહી. દાનિશ માલેવર અકીલ હુસૈનના બોલ પર શૂન્ય રને આઉટ થયા. ક્વિન્ટન ડી કોક પણ બેટિંગથી પ્રભાવિત કરવામાં નિષ્ફળ ગયા અને માત્ર 7 રન બનાવીને મુકેશ ચૌધરીના બોલ પર આઉટ થયા. 11 રનમાં ત્રણ વિકેટ ગુમાવ્યા બાદ, સૂર્યકુમાર યાદવ અને તિલક વર્માએ ટીમની ઇનિંગ્સને સ્થિર કરી. તેમણે ચોથી વિકેટ માટે 73 રનની ભાગીદારી કરી.
ચેન્નાઈ સુપર કિંગ્સે 20 ઓવરમાં 6 વિકેટ ગુમાવીને 207 રન બનાવ્યા. સંજુ સેમસનએ શાનદાર બેટિંગ કરી. તેણે ફક્ત 54 બોલમા અણનમ 101 રન બનાવ્યા. સેમસનની ઇનિંગમાં 10 ચોગ્ગા અને 6 છગ્ગા ફટકાર્યા. ચેન્નાઈ સુપર કિંગ્સની શરૂઆત સારી નહોતી.
કેપ્ટન તુરાજ ગાયકવાડ 14 બોલમાં 22 રન બનાવીને આઉટ થયા, જ્યારે સરફરાઝ ખાન 8 બોલમાં 14 રન બનાવીને મિશેલ સેન્ટનર દ્વારા આઉટ થયા. શિવમ દુબે ફક્ત 5 રન બનાવી શક્યો, જ્યારે ડેવાલ્ડ બે્રવિસે 21 રનનું યોગદાન આપ્યું.
કાર્તિક શર્મા (18) અને જેમી ઓવરટન (15) પણ બેટિંગમાં સારું પ્રદર્શન કરવામાં નિષ્ફળ રહ્યા. MI તરફથી, અલ્લાહ ગઝનફરે 4 ઓવરમાં 25 રન આપીને 2 વિકેટ લીધી, જ્યારે અશ્વની કુમારે 37 રન આપીને 2 વિકેટ લીધી.
